ကျွန်တော်တို့နိုင်ငံရဲ့ နိုင်ငံရေး၊ စီးပွားရေး၊ လူမှုရေးစနစ်များကို ဒီမိုကရေစီကျင့်စဉ်များနှင့်အညီ သိသာထင်ရှားစွာတဖြည်းဖြည်း ပြောင်းလဲကျင့်သုံးနေတာကို ပြည်တွင်းမှာရော၊ ပြည်ပမှာပါ အားလုံးနားလည် လက်ခံလာကြပြီဖြစ်ပါတယ်။ ဒီမိုကရေစီနိုင်ငံများမှာ အဓိကအရေးကြီးတဲ့ အချက်ဟာ တရားဥပဒေစိုးမိုးရေးပဲဖြစ်ပါတယ်။ ပြည်သူများအားလုံးဟာ အေးချမ်းစွာနေထိုင် လိုကြပါတယ်။ ပြည်သူများရဲ့နေ့စဉ်ဘဝ၊ အသက်အိုးအိမ် စည်းစိမ်လုံခြုံရေးအတွက် မြန်မာနိုင်ငံပြည်သူ့ရဲတပ်ဖွဲ့ကြီးကို အားကိုးအားထားပြုနေကြပါတယ်။ ပြည်သူ့ရဲတပ်ဖွဲ့များ အနေနဲ့လည်း စီမံချက်များချမှတ်ပြီးတော့ တရားဥပဒေစိုးမိုးရေးအတွက် ဆောင်ရွက်နေကြတာ ကိုလည်း ကျွန်တော်တို့ကြားသိနေရပါတယ်။ ဒါပေမယ့် မင်းမဲ့စရိုက်ဆန်ဆန် အုပ်စုဖွဲ့ပြီးတော့ ရမ်းကားမှုတွေ၊ မတရားအနိုင်ကျင့်မှုတွေ၊ ခြိမ်းခြောက်မှုတွေ၊ လူသတ်မှုတွေ၊ ဖောက်ထွင်းခိုးယူမှုတွေကို ကြားသိနေရဆဲပဲဖြစ်ပါတယ်။ ပြည်သူများဘဝကိုခြိမ်းခြောက်မှုများရှိလာ နိုင်ပါတယ်။ လေးစားအပ်ပါသော ပြည်သူ့လွှတ်တော်ဥက္ကဋ္ဌကြီးခင်ဗျား။ ကျွန်တော့်အနေနဲ့ မြန်မာနိုင်ငံ ရဲတပ်ဖွဲ့ကြီးကို ပြည်သူတွေယုံကြည်ကိုးစားပြီးတော့ အားကိုးနေတာကိုမြင်ချင်ပါတယ်။ သံသယစိတ် တွေ၊ စိတ်ပျက်အားငယ်တဲ့စိတ်တွေနဲ့ မြန်မာနိုင်ငံရဲတပ်ဖွဲ့ကြီးကို ယုံကြည်မှုလျော့ပါးလာတာကို ကျွန်တော်တို့ မမြင်စေချင်ပါဘူး။ မြန်မာနိုင်ငံရဲတပ်ဖွဲ့အနေနဲ့လည်း မိမိတို့ဆောင်ရွက်ချက်များကို ပြည်သူများကြားမှာပေါ်လွင်စေချင်ပါတယ်။ ထင်သာမြင်သာလည်း ရှိစေချင်ပါတယ်။ ထင်သာမြင်သာ ရှိအောင်လည်း ဆောင်ရွက်ဖို့လိုပါတယ်။ ဒါကြောင့် ပြည်သူလူထုကိုယ်စား အောက်ပါမေးခွန်းများကို မေးမြန်းခွင့်ပြုပါရန် တင်ပြအပ်ပါတယ်-

(၁)     မြန်မာနိုင်ငံမှာ တရားဥပဒေစိုးမိုးနိုင်ရေးဆောင်ရွက်နိုင်မှုအခြေအနေနှင့် မြန်မာနိုင်ငံရဲ တပ်ဖွဲ့ဝင်များကို နိုင်ငံတကာရဲတပ်ဖွဲ့ဝင်များကဲ့သို့ ကိုယ်ရည်ကိုယ်သွေးထက်မြက်စေရန် မည်ကဲ့သို့ ဆောင်ရွက်နေပါသလဲ။

(၂)     မြန်မာနိုင်ငံရဲတပ်ဖွဲ့ဝင်များကို နိုင်ငံတကာရဲတပ်ဖွဲ့ဝင်များကဲ့သို့ ခေတ်မီကိရိယာများ တပ်ဆင်ထားနိုင်မှုရှိ၊ မရှိအခြေအနေ။

(၃)     နိုင်ငံတကာအဖွဲ့အစည်းများနဲ့ မည်ကဲ့သို့ချိတ်ဆက်ဆောင်ရွက်နေကြောင်း ပြည်သူများ သိသင့်သောအချက်များရှိပါက ဖြေကြားပေးနိုင်ပါရန် မေးမြန်းပါသည်။