ပြည်သူ့ဝန်ထမ်းများအတွက် ဌာနလုပ်ငန်းတစ်ခုဆီမှာ ရာထူးအဆင့် လစာနှုန်းကို အမှုထမ်းအဆင့်မှာ ၆ ဆင့်နှင့် အရာထမ်းအဆင့်မှာ ၆ ဆင့်၊ ပေါင်း ၁၂ ဆင့် နှင့် ဖွဲ့စည်းပြီးတော့မှ သတ်မှတ်စံစားခွင့်ပြုထားပါတယ်။ အဆိုပါစံစားခွင့်အနက် အမှုထမ်း ၆ ဆင့်မှာ အနိမ့်ဆုံးအမှုထမ်းရဲ့ တစ်လလစာငွေဟာ လစာရင်း ၃၅၀၀၀ ကျပ် ဖြစ်ပါတယ်။ အမြင့်ဆုံးအမှုထမ်း ရဲ့ လစာရင်းဟာ ၆၅၀၀၀ ကျပ်သာ ဖြစ်ပါတယ်။ အနိမ့်ဆုံးဝန်ထမ်းတစ်ဦးရဲ့ တစ်ရက်ဝင်ငွေဟာ ကျပ် ၁၀၀၀ ကျော်သာရှိပြီးတော့မှ အမြင့်ဆုံးအမှုထမ်းတစ်ဦးရဲ့ တစ်ရက်လစာဝင်ငွေဟာ ကျပ် ၂၀၀၀ ကျော်သာရရှိမှာ ဖြစ်ပါတယ်။ အဲ့ဒီဝင်ငွေနဲ့ သူတို့ရဲ့မိသားစုအတွက် စားသောက်စရိတ်၊ ပညာရေး စရိတ်၊ ကျန်းမာရေးစရိတ်အပါအဝင်နှင့် နေထိုင်မှုစရိတ်အဝဝကို ဆင်းရဲပင်ပန်းစွာနှင့် ဖြေရှင်းနေကြ ရမှာ သေချာပါတယ်။ ယခုနိုင်ငံတော်က အပိုထောက်ပံ့ကြေးငွေ ၃၀၀၀၀ ခွင့်ပြုထားသဖြင့် အပြည့်အဝမဟုတ်သော်လည်းပဲ အချိန်ကာလတစ်ခုအထိတော့ အဆင်ပြေသွားတာ မြင်တွေ့ရမှာ ဖြစ်ပါတယ်။

နေ့စဉ်စားဝတ်နေရေး၊ ပညာရေး၊ ကျန်းမာရေးအတွက် အခက်အခဲများစွာနှင့် ဖြေရှင်းနေကြရတဲ့ အဓိကအမှုထမ်းများအနက် ရိုးသားပြီးတော့မှ အခက်အခဲကို ခါးစည်းခံနိုင်ကြတဲ့ ဝန်ထမ်းများရှိသလိုပဲ အခက်အခဲကို မခံနိုင်တော့လို့ မတရားသဖြင့်ပြုတဲ့ လာဘ်ပေးလာဘ်ယူ ပြုခြင်း၊ အလွဲသုံးစားပြုခြင်း၊ ခိုးယူခြင်းစသည့် အလွယ်လမ်းလိုက်မိကြတဲ့ ဝန်ထမ်းများလည်း ရှိကြပါတယ်။ ဝန်ထမ်းများလည်း အဲ့ဒီလို မတရားနည်းလမ်းကိုလိုက်လို့မို့လို့ ဆုံးရှုံးနေကြရပါတယ်။ နိုင်ငံတော်အတွက်လည်းပဲ နစ်နာမှုတွေက နေ့စဉ်၊ လစဉ်၊ နှစ်စဉ် ဖြစ်ပေါ်နေပါတယ်။ ဒီနေ့ဝန်ထမ်း များဟာဆိုရင် ဝန်ထမ်းဘဝမှာပင် နေ့စဉ်အသုံးစရိတ်ကို အနိုင်နိုင်ဖြေရှင်းရုန်းကန်နေကြပြီးတော့မှ အငြိမ်းစားယူကြတဲ့အခါမှာ ဆိုရင်တော့ ရရှိမယ့်အငြိမ်းစားလစာနှင့် လုပ်သက်ဆုငွေတို့နဲ့ ဆက်လက် ဖြတ်သန်းကြရမယ့် ဘဝရဲ့စားဝတ်နေမှု၊ ပညာ၊ ကျန်းမာမှုအတွက်ကို ရတက်မအေးဖွယ်ရာနှင့် တာဝန် ထမ်းဆောင်နေကြရတာဖြစ်ပါတယ်။ လက်ရှိပင်စင်ပေးရေးဥပဒေအရ ဝန်ထမ်းဘဝမှာ လုပ်သက် အများဆုံး ၄၂ နှစ်ဖြင့် အငြိမ်းစားယူကြရတဲ့အမှုထမ်းများအနက် အနိမ့်ဆုံးအမှုထမ်းတစ်ဦးရရှိတဲ့ တစ်လုံးတစ်ခဲတည်း လုပ်သက်ဆုငွေဟာ ကျပ် ၈ သိန်းကျော်နှင့် လစဉ်ပင်စင်ငွေ ကျပ် ၂၀၀၀၀ ကျော်သာရရှိနိုင်မှာ ွဖစ်ပါတယ်။ အမြင့်ဆုံးအမှုထမ်းတစ်ဦးအနေဖြင့် တစ်လုံးတစ်ခဲတည်း လုပ်သက် ဆုငွေ ကျပ် ၁၄ သိန်းကျော်နှင့် လစဉ်ပင်စင်ငွေ ကျပ် ၄၀၀၀၀ ကျော်သာရရှိမှာ ဖြစ်ပါတယ်။ ကျန်လုပ်သက်နည်းတဲ့ ဝန်ထမ်းများအတွက်ကတော့ ထို့ထက်ပြီးမှလျော့နည်းရရှိကြမှာ ဖြစ်တာကို တွေ့ရှိရမှာ ဖြစ်ပါတယ်။

ဝန်ထမ်းများနှင့် အငြိမ်းစားအများစုမှာ ကိုယ်ပိုင်အိမ်ရာရှိသူ လွန်စွာနည်းပါးကြပါတယ်။ အများစုက အိမ်ငှားဘဝနှင့်နေထိုင်ကြတာလည်း တွေ့မြင်နေကြရပါတယ်။ အချို့ဝန်ထမ်းများဆိုရင် ဝန်ထမ်းဘဝစတင် တာဝန်ထမ်းဆောင်စဉ်ကတည်းက ဌာနပိုင်နေအိမ်ခန်းများမှာ နေထိုင်ကြပြီးတော့ အငြိမ်းစားယူတဲ့အခါမှာ အဲ့ဒီအိမ်ခန်းများက ဖယ်ရှားခြင်းခံရလို့မို့လို့ သူတို့ရဲ့ မိသားစုလူမှုရေးဘဝဟာ ကြီးမားတဲ့အခက်အခဲများနှင့် ရင်ဆိုင်ကြုံတွေ့နေရကြောင်းလည်းပဲ တွေ့မြင်ကြားသိနေရပါတယ်။ တာဝန်ထမ်းဆောင်တဲ့ ဝန်ထမ်းအချို့မှာတော့ဖြင့် နိုင်ငံတော်ကချမှတ်ပေးတဲ့ မြေကွက်များ ရရှိကြသော်လည်းပဲ နည်းပါးလှတဲ့ဝင်ငွေဖြင့် မြေကွက်တန်ဖိုးကို အနိုင်နိုင်ရှာဖွေပေး သွင်းဝယ်ယူခဲ့ကြရပါတယ်။ ဒါကြောင့်မို့လို့လည်းပဲ သင့်တင့်တဲ့နေအိမ်ဆောက်ဖို့ မတတ်နိုင်လို့ အဲ့ဒီမြေကွက်ကိုပဲ ရရှိရာ အနိမ့်ရင်းအမြတ်နဲ့ ပြန်လည်ရောင်းချနေရတာကိုလည်းပဲ တွေ့မြင်ကြားသိ နေရပါတယ်။ ဝန်ထမ်းအိမ်ရာစီမံကိန်းအနေဖြင့် အခုအခါ ရန်ကုန်တိုင်းဒေသကြီး ဒဂုံဆိပ်ကမ်းမြို့နယ် မှာ လာမည့် ၂၀၁၃-၂၀၁၄ ဘဏ္ဍာရေးနှစ်မှာ ဝင်ငွေနည်းမိသားစုများအတွက် တန်ဖိုးနည်းအိမ်ခန်း ယူနစ် ၁၀၀၀၀ ကျော်ကို နိုင်ငံတော်ဘတ်ဂျက်မှ ကျခံဆောက်လုပ်ပေးရန် စီစဉ်ထားကြောင်းကိုလည်း ပဲ ဝမ်းမြောက်ဖွယ်ရာကြားသိရပါတယ်။ ဒါ့အပြင် လွတ်လပ်တဲ့ဈေးကွက်စီးပွားရေးမူဝါဒနှင့်အညီ ပြည်သူ့လွှတ်တော်က ပြင်ဆင်ချက်ဖြင့် အတည်ပြုပေးပို့ခဲ့သော ၂၀၁၁ ခုနှစ် အနည်းဆုံးအခကြေးငွေ ဥပဒေကြမ်းကိုလည်းပဲ အမျိုးသားလွှတ်တော်က ဆွေးနွေးစဉ်းစားနိုင်ဖို့အတွက်ကို ပေးပို့ထားဆဲ အဆင့်မှာသာ ဖြစ်ပါတယ်။ အတည်ပြုပြဋ္ဌာန်းနိုင်ခြင်းမရှိသေးပါဘူး။ ဖော်ပြပါအဘက်ဘက်က စီစဉ် ဆောင်ရွက်ပေးနေသကဲ့သို့ ဝန်ထမ်းများနှင့်အငြိမ်းစားများအတွက်ကိုလည်းပဲ နိုင်ငံတော်မှ လိုအပ်သလိုစီစဉ်ဆောင်ရွက်ပေးနိုင်ရန် ဆက်လက်တင်ပြလိုပါတယ်။ ပြည်သူ့ဝန်ထမ်းအပိုင်းနှင့် ပတ်သက်ပြီးတော့မှ နိုင်ငံတော်မှ သတ်မှတ်ထားသော ရာထူးအဆင့်၊ လစာနှုန်းအလိုက်၊ လစာနည်း ဝန်ထမ်းများကို ဦးစားပေးပြီးတော့မှ လုပ်ခ၊ လစာကို ခေတ်ကာလနှင့်အညီ ပြင်ဆင်တိုးမြှင့်သွားပါရန် တာဝန်ထမ်းဆောင်စဉ်ကာလအတွင်း ရိုးသားကြိုးစားပြီး နိုင်ငံ့တာဝန်ကို အပြစ်ကင်းစင်စွာ ထမ်းဆောင်ခဲ့တဲ့ ပြည်သူ့ဝန်ထမ်းများကိုလည်းပဲ လုပ်သက်နှစ်အလိုက် ဂုဏ်ပြုချီးမြှင့်ငွေများ ပေးအပ် ပေးပါရန် အဆင့်လိုက်သင့်လျော်သည်‌့ ဝန်ထမ်းအိမ်ရာများကို ဆောက်လုပ်ပြီးတော့ သင့်လျော်သော တန်ဖိုးနှင့် လစဉ်အရစ်ကျလစာငွေပေးသွင်းစေပြီး ကျန်ငွေကို အငြိမ်းစားယူတဲ့နေရာမှာ တစ်လုံးတစ်ခဲ တည်းလုပ်သက်ဆုကြေးမှ အကျေဖြတ်တောက်၍ အိမ်ပိုင်များဖြစ်အောင် ဆောင်ရွက်ပေးပါရန်။

မြန်မာနိုင်ငံရဲ့ အိမ်နီးချင်းနိုင်ငံကြီးနှစ်ခု တရုတ်ပြည်သူ့သမ္မတနိုင်ငံနှင့် အိန္ဒိယနိုင်ငံအပါအဝင် ကမ္ဘာ့နိုင်ငံအများစုမှာ နိုင်ငံ့ဝန်ထမ်းများအတွက် နေအိမ်တိုက်ခန်း၊ အရာထမ်းများအတွက် မော်တော်ယာဉ်အပါအဝင် အသုံးအဆောင်ပစ္စည်းများကို လစာမှအရစ်ကျပေးသွင်းတဲ့ စနစ်နဲ့ ရောင်းချပေးလျက်ရှိတာ ကြာခဲ့ပါပြီ။ ဒါကြောင့်မို့လို့ ဝန်ထမ်းများဟာ တာဝန်ထမ်းဆောင်ချိန် ကာလအတွင်းမှာပဲ နေအိမ်တိုက်ခန်းပိုင်၊ မော်တော်ယာဉ်ပိုင် အခြေအနေတို့ကို ရရှိကြပါတယ်။ အကယ်၍ တာဝန်ထမ်းဆောင်ချိန်ကာလအတွင်းမှာ အဂတိလိုက်စားမှု၊ တာဝန်ပျက်ကွက်မှု၊ စည်းကမ်း ဖောက်ဖျက်မှုတို့ကြောင့် တာဝန်မှ ရပ်စဲခြင်းခံရပါက မူလသတ်မှတ်ကာလအတွင်းမှာ ကျန်တဲ့ ကြွေးကျန်ကို အကြေပြန်ဆပ်ရပါတယ်။ ပျက်ကွက်ပါက တရားစွဲဆိုပြီးမှ ပစ္စည်းများ ပြန်လည် သိမ်းဆည်းခြင်း ခံရပါတယ်။ ဒါကြောင့် လုပ်သက်ပြည့်ပင်စင်ရယူနိုင်တဲ့အချိန်အထိ တာဝန်ကို လေးလေးစားစား ထမ်းဆောင်ကြပါတယ်။ လာဘ်ပေးလာဘ်ယူမှုအပါအဝင် ဝန်ထမ်းစည်းကမ်းနှင့် မကိုက်ညီသည့် အမှုကိစ္စများကို ပြုလုပ်ရန် ထိုနိုင်ငံများမှ ဝန်ထမ်းများဟာ လွန်စွာဝန်လေးကြ ပါတယ်။

အရာထမ်း၊ အမှုထမ်းဝန်ထမ်းများ ကောင်းမွန်လျှင် သန့်ရှင်းသော အစိုးရ ဖြစ်လာပါမယ်။ သန့်ရှင်းသောအစိုးရဖြစ်လာလျှင် ကောင်းမွန်သောစီမံအုပ်ချုပ်မှုကလည်း အလိုအလျောက်ဖြစ်လာမှာ ဖြစ်ပါတယ်။ ဒါကြောင့်မို့လို့ အငြိမ်းစားများနှင့် ပတ်သက်ပြီးတော့ ဆက်လက် တင်ပြလိုတာကတော့ လက်ရှိအငြိမ်းစားလစာနှင့် တစ်လုံးတစ်ခဲတည်း လုပ်သက်ဆုငွေတွက်ချက်မှုကို ခေတ်ကာလနှင့်အညီ လိုအပ်သလို ပြန်လည်ညှိနှိုင်းသတ်မှတ် စံစားခွင့်ပြုပေးပါရန်၊ နောက်တစ်ချက် ကိုယ်ပိုင်အိမ်ရာ မရှိသော အငြိမ်းစားယူသည့်ပုဂ္ဂိုလ်များအတွက်လည်း ရန်ကုန်တိုင်းဒေသကြီးမှ ပြည်သူများအတွက် စီစဉ်ပေးသလို အငြိမ်းစားဝန်ထမ်းများအတွက် သီးသန့်တန်ဖိုးနည်းအိမ်ရာများကို နိုင်ငံတော်မှ ဆောက်လုပ်ပြီးတော့မှ သင့်တင့်တဲ့ဈေးနှုန်းနဲ့ ဆောင်ရွက်ပေးပါရန်၊ အချုပ်အားဖြင့် လက်ရှိတာဝန်ထမ်းဆောင်နေကြတဲ့ ဝန်ထမ်းများကို ဝန်ထမ်းလောကရဲ့ အနိဌာရုံဖြစ်တဲ့ လာဘ်ပေး လာဘ်ယူမှုပပျောက်ရေး၊ ပြည်သူပိုင်ပစ္စည်းအလွဲသုံးစားမှုပပျောက်ရေး၊ ပြည်သူပိုင်ပစ္စည်းခိုးယူမှု စသည့်အပြုအမှုများ ကင်းရှင်းကြစေရန်အလို့ငှာ နိုင်ငံတော်ဘက်စုံဖွံ့ဖြိုး တိုးတက်ရေးအတွက် သမ္မတကြီးက လမ်းညွှန်မှာကြားထားတဲ့အတိုင်းပဲ နိုင်ငံတော်ရဲ့ တတိယအဆင့်ဖြင့် အစိုးရဌာနများ၊ အဖွဲ့အစည်းများရဲ့ စီမံခန့်ခွဲမှုစနစ် လျင်မြန်ကောင်းမွန်စွာ တိုးတက်ပြောင်းလဲလာရေးအတွက် လည်းကောင်း၊ ပြည်သူ့ဝန်ထမ်းဘဝမှာ အငြိမ်းစားယူကြရမယ့် မိမိဝန်ထမ်းများ တစ်နည်းအားဖြင့် နိုင်ငံ၏သက်ကြီးရွယ်အိုများတို့ကို စောင့်ရှောက်ပေးသည့် အနေဖြင့်လည်းကောင်း၊ နိုင်ငံတော်အတွက် အစစအဆင်ပြေသောအချိန်တွင် ထပ်တင်ပြပါမယ်။ နိုင်ငံတော်အတွက် အစစအဆင်ပြေသော အချိန် တွင် ဖော်ပြပါအချက်များနှင့် အစီအမံများကို ဆောင်ရွက်ပေးရန်တင်ပြလိုပါတယ်။ ဒီကိစ္စဟာ ခက်ခဲ သောလုပ်ငန်းကြီးမဟုတ်ပါဘူး။ နှစ်စဉ်ဝန်ကြီးဌာနများတွင် ဖြစ်ပွားနေတဲ့ လေလွင့်ဆုံးရှုံးမှုများ၊ နိုင်ငံ အတွက်၊ ပြည်သူအတွက် အကျိုးအမြတ်မရရှိနိုင်တဲ့ စိတ်ကူးယဉ်လုပ်ငန်းစီမံကိန်းကြီးများ၊ ဒါတွေ လျော့နည်းပပျောက်အောင် စီမံဆောင်ရွက်ပေးနိုင်လျှင်ပင် လုံလောက်မည်ဖြစ်ကြောင်း ရဲရဲကြီး အာမခံရဲပါတယ်။ ဒါကြောင့် ပြည်သူ့ဝန်ထမ်းများနှင့် အငြိမ်းစားများအတွက် စံစားခွင့်အရပ်ရပ်ကို အချိန်ကာလအလိုက် ပြန်လည်စိစစ်၍ လိုအပ်သလို  ပြင်ဆင်တိုးမြှင့် စံစားခွင့်ပြုနိုင်ရန် အစီအစဉ်ရှိ/ မရှိ အကယ်၍ မရှိသေးပါက အကျိုးအကြောင်းရှင်းလင်းဖြေကြားပေးပါရန် မေးမြန်းပါသည်။