နိုင်ငံတော်ရဲ့ ခေတ်စနစ်ပြောင်းလဲမှုအခြေအနေမှာ နိုင်ငံတစ်ဝန်းလုံးမှာရှိတဲ့ ပြည်သူလူထု အားလုံးသိရှိနိုင်ဖို့အတွက် သတင်းမီဒီယာကဏ္ဍဟာ အရေးကြီးတယ်လို့ ယူဆပါတယ်။ သတင်း မီဒီယာတွေခေတ်စနစ်နှင့်အညီ အများကြီးပေါ်ထွက်လာပါတယ်။ သတင်းစာတွေ၊ ဂျာနယ်တွေ၊ စာစောင်တွေ၊ ရုပ်မြင်သံကြားထပ်ဆင့်လွှင့်တဲ့လိုင်းများစွာ၊ ရေဒီယိုအသံလွှင့်တဲ့ လိုင်းများစွာလည်း ရှိနေပြီဖြစ်ပါတယ်။ ဒါပေမယ့်လည်း ကျွန်တော်တို့ နိုင်ငံတစ်ဝန်းမှာရှိတဲ့ ၇၀ ရာခိုင်နှုန်းသော ကျေးလက်နေ ပြည်သူလူထုဟာ အခြေအနေအမျိုးမျိုးကြောင့် နိုင်ငံတော်ရဲ့ ပြုပြင်ပြောင်းလဲမှု အခြေ အနေတွေ တိုးတက်လာတဲ့အခြေအနေတွေကို မှန်မှန်ကန်ကန်သိနိုင်ဖို့အတွက် လက်လှမ်းမမီနိုင်သေး တဲ့ အနေအထားကို ရှိပါတယ်။ မြန်မာ့ရုပ်ရှင်လုပ်ငန်း လက်အောက်မှာရှိတဲ့ သတင်းမော်ကွန်း ရုပ်ရှင်ဌာနကနေပြီးတော့ ဟိုးအရင်နှစ်ပေါင်းများစွာတုန်းက နိုင်ငံအနှံ့မှာရှိတဲ့ ကျေးလက်ပြည်သူ တွေကို သတင်းရုပ်ရှင်မော်ကွန်းကားများ လှည်‌့လည်ပြသခြင်းဟာ ကျေးလက်နေပြည်သူတွေအတွက် ဆွဲဆောင်နိုင်မှုရှိပြီး စိတ်ဝင်စားမှုရှိတဲ့ လုပ်ငန်းတစ်ခုဖြစ်တဲ့အတွက် ဒီလုပ်ငန်းတွေကို ပြန်လည် လုပ်ဆောင်သင့်တယ်လို့ယူဆပြီး ဒီမေးခွန်းကို မေးရခြင်းဖြစ်ပါတယ်ခင်ဗျား။

နိုင်ငံရေးစနစ်၊ အုပ်ချုပ်ရေးစနစ်၊ စီးပွားရေးစနစ် ပြောင်းလဲဖြစ်ပေါ်တိုးတက်မှုများအား ပြည်သူလူထုအကြား သိရှိနိုင်ရန်အတွက် ဆောင်ရွက်ပေးနိုင်သည့် မော်ကွန်းရုပ်ရှင်မှ နိုင်ငံ၏နေရာအနှံ့အပြားသို့ သတင်းစဉ်များ လှည့်လည်ပြသသည့် လုပ်ငန်းများပြန်လည် ဆောင်ရွက်နိုင်ရန် အစီအစဉ်ရှိ/မရှိ သိရှိလိုပါတယ်။ အစီအစဉ်ရှိပါကလည်း နိုင်ငံတော်ရဲ့တိုးတက်ပြောင်းလဲနေမှု ပကတိအခြေအနေတွေကို နိုင်ငံတော်အတွင်းမှာရှိတဲ့ အခြေခံအကျဆုံး ပြည်သူလူထုသိရှိနိုင်ဖို့ မည်ကဲ့သို့စီစဉ်ဆောင်ရွက်ထားသည်ကို သိရှိလိုပါကြောင်း မေးမြန်းပါသည်။