မြန်မာလူမျိုးမှန်ရင် မြန်မာ့ယဉ်ကျေးမှုအမွေအနှစ်တွေကို ထိန်းသိမ်းဖို့အတွက် အားလုံးမှာတာဝန်ရှိပါ တယ်။ ယနေ့ အိန္ဒိယနိုင်ငံမြောက်ပိုင်းမှာရှိတဲ့ ဥတ္တရာပရာဒေ့ခ်ျပြည်နယ်၊ ယူပီပြည်နယ်မှာ သင်္ဂသနဂိုလိုဒေသမျိုးအပါအဝင် ဒေသအတော်များများမှာ တန်ဖိုးမဖြတ်နိုင်တဲ့ ယဉ်ကျေးမှု အမွေအနှစ်များစွာရှိပါတယ်။ နှစ်စဉ်လည်း မြန်မာနိုင်ငံကနေပြီးတော့ နိုင်ငံသား ၂၀၀၀၀ ကျော် လောက်ကသွားရောက်ပြီးတော့ လေ့လာနေတာကိုလည်းတွေ့ရပါတယ်။ သို့သော် ဒီနေရာများသည်၊ ဒီဒေသများသည် ပြုပြင်မှုအားနည်းတဲ့အတွက်ကြောင့်၊ ထိန်းသိမ်းစောင့်ရှောက်မှုအားနည်းတဲ့အတွက် ကြောင့် များစွာပျက်စီးပြီးတော့ မကြာခင်ကာလမှာ ပျောက်ကွယ်သွားမယ့်အနေအထားဖြစ်ပါတယ်။ ဒါကြောင့် ဒီလိုဒေသတွေကို နိုင်ငံတော်အစိုးရအနေနဲ့ ယခုခေတ်အခါမျိုးမှာ အိန္ဒိယနိုင်ငံအစိုးရနှင့် ကျွန်တော်တို့နဲ့ဆန္ဒတူတဲ့နိုင်ငံတွေနဲ့ ညှိနှိုင်းတောင်းဆိုပြီးတော့ ကျွန်တော်တို့ရဲ့ဒေသ သူတို့မှာရှိတဲ့ ယဉ်ကျေးမှုအမွေအနှစ်ထိန်းသိမ်းမယ့်ဒေသတွေကို သူတို့နိုင်ငံရဲ့ ရှေးဟောင်းသုတေသနဦးစီးဌာနကို သိမ်းသွင်းပြီးတော့ ရှေးဟောင်းအမွေအနှစ်အနေနဲ့ ထိန်းသိမ်းပေးမယ်ဆိုရင် ရေရှည်မှာယဉ်ကျေးမှု အမွေအနှစ်တွေမပျောက်မပျက်ဘဲနဲ့ ထိန်းသိမ်းနိုင်မှာဖြစ်ပါတယ်။ ဥပမာအနေနဲ့တင်ပြရရင် ကုလသမဂ္ဂအထွေထွေအတွင်းရေးမှူးချုပ် တာဝန်ယူခဲ့တဲ့ ဦးသန့် သူကသူ့ကာလလက်ထက်မှာ လုမ္မနီကို နီပေါနိုင်ငံမှာအခုလိုပဲကြိုးစားခဲ့ပါတယ်။ ဒါကြောင့် ယနေ့ လုမ္မနီကိုသွားရောက်လေ့လာရင် ကျွန်တော်တို့နိုင်ငံရဲ့ယဉ်ကျေးမှုအမွေအနှစ်တွေဟာ မပျောက်မပျက်ဘဲနဲ့ ထည်ထည်ဝါဝါနဲ့ ထိန်းသိမ်း ထားနိုင်တာကိုတွေ့ရပါတယ်။ ဒါကြောင့် ကျွန်တော်တင်ပြလိုတာကတော့ ကျွန်တော်တို့ နိုင်ငံတော် အစိုးရအနေနဲ့ ယနေ့ ခေတ်သစ်စနစ်သစ်ပြောင်းလဲနေတဲ့အခါမှာ ထင်သာမြင်သာပွင့်ပွင့်လင်းလင်းနဲ့ ညှိနှိုင်းကြမယ်ဆိုရင် ကျွန်တော်တို့ရဲ့တန်ဖိုးကြီးမားတဲ့အမွေအနှစ်တွေကို ထိန်းနိုင်မှာ ဖြစ်ပါတယ်။ ဒါကြောင့် ကျွန်တော် ဥက္ကဋ္ဌကြီးကတစ်ဆင့် မေးမြန်းလိုတဲ့မေးခွန်းကတော့ မြန်မာ့ယဉ်ကျေးမှု အမွေအနှစ်တွေ ထိန်းသိမ်းစောင့်ရှောက်တဲ့အနေနဲ့ အိန္ဒိယနိုင်ငံမှာရှိတဲ့ ဥတ္တရာပရာဒေ့ခ်ျပြည်နယ်၊ သင်္ဂသနဂိုရှိမှာရှိတဲ့ ယဉ်ကျေးမှုဒေသတွေအပါအဝင် အထိမ်းအမှတ်နေရာများကို ကျွန်တော်တို့နဲ့ ဆန္ဒတူတဲ့နိုင်ငံများနဲ့ ပူးပေါင်းညှိနှိုင်းပြီးတော့ ပြန်လည်ဖော်ထုတ်ထိန်းသိမ်းဖို့ အစီအစဉ်ရှိ၊ မရှိ မေးမြန်းကြောင်း မေးမြန်းပါသည်။