ပြည်ထောင်စုဝန်ကြီးဌာနတစ်ခုဖြစ်သော စီးပွားရေးနှင့် ကူးသန်းရောင်းဝယ်ရေးဝန်ကြီးဌာန သည် FDA စစ်ဆေးမှုအောင်မြင်ပြီး သတ်မှတ်စံချိန်စံညွှန်းနှင့်ညီသော အများပြည်သူစားသုံးရန် သင့်တော်သည့် စားအုန်းဆီများကို ပြည်ပမှတင်သွင်းခွင့်ပြုလျက်ရှိကြောင်း သိရပါတယ်။ ပထမအကြိမ် ပြည်သူ့လွှတ်တော် စတုတ္ထပုံမှန်အစည်းအဝေးကာလ၌ မေးမြန်းထားသော ကျွန်တော်ရဲ့ ကြယ်ပွင့်မပြမေးခွန်းကို ပြန်ကြားရာ၌ ဤဝန်ကြီးဌာနအနေနဲ့ နယ်စပ်ဒေသမှလည်း သတ်မှတ်ချက်နဲ့ ညီညွတ်လို့ရှိရင် တစ်ရက်အတွင်း သွင်းကုန်လိုင်စင်ခွင့်ပြုမိန့်ချပေးလျက်ရှိကြောင်း ပါရှိပါတယ်။ ဒါပေမယ့် ဒေသခံမဲဆန္ဒရှင်များ ကုန်သည်များရဲ့ တင်ပြချက်အရ ကျွန်တော့်အနေနဲ့ ပထမအကြိမ် ပြည်သူ့လွှတ်တော် စတုတ္ထပုံမှန်အစည်းအဝေးအပြီးမှာ မြဝတီနယ်စပ်ကုန်သွယ်ရေး ညွှန်ကြားမှုဦးစီး ဌာနကို အဲဒီကိစ္စနှင့်ပတ်သက်ပြီး မေးမြန်းတဲ့အခါမှာ ညွှန်ကြားရေးမှူးမှ FDA အောင်မြင်ပြီးတော့ လည်းပဲ ပြည်နယ်အစိုးရရဲ့ ခွင့်ပြုချက်ရမှသာ နေပြည်တော်သွင်းကုန်လိုင်စင် လျှောက်ထားနိုင် ကြောင်း ပြန်ကြားခဲ့ပါတယ်။

နိုင်ငံတော်ဖွဲ့စည်းပုံအခြေခံဥပဒေ အခန်း(၈) နိုင်ငံသား၊ နိုင်ငံသားများ၏ မူလအခွင့်အရေးနှင့်တာဝန်များအခန်း ပုဒ်မ ၃၄၉ မှာ ဖော်ပြထားတာက နိုင်ငံသားများဟာ အောက်ပါ လုပ်ငန်းလုပ်ဆောင်ရာတွင် တူညီသောအခွင့်အလမ်း ရရှိစေရမည်ဟု ဖော်ပြပါရှိပြီး ၎င်းပုဒ်မခွဲ (ခ)နှင့် (ဂ) မှာ အလုပ်လုပ်ကိုင်မှု၊ ကုန်သွယ်ရောင်းဝယ်ဖောက်ကားမှုကို ဆက်လက်ဖော်ပြထားပါတယ်။ မိမိတို့နိုင်ငံအချို့ဒေသက ကုန်သည်များအနေနဲ့ ပြည်ပမှ စားအုန်းဆီတင်သွင်းရာမှာ သတ်မှတ်ချက် နှင့်ပြည့်မီရင် တင်သွင်းခွင့်ရရှိပြီးတော့ နယ်စပ်ဒေသမှကုန်သည်များအနေနဲ့ ဝန်ကြီးဌာနမှ ဖြေကြားလွှာပါအတိုင်း ဆောင်ရွက်ခွင့်မရရှိမှုဟာ အခြေခံဥပဒေက ပေးအပ်ထားတဲ့ နိုင်ငံသားများရဲ့ မူလအခွင့်အရေးဆုံးရှုံးနေကြောင်း ဖော်ပြရာရောက်ပါတယ်။ သို့ဖြစ်ပါ၍ ကျွန်တော်မေးလိုသည်မှာ ပြည်ထောင်စုသမ္မတမြန်မာနိုင်ငံတော် တစ်ဝန်းလုံးမှာ နယ်စပ်၊ ပြည်မ မခွဲခြားဘဲနဲ့ ဥပဒေ၊ နည်းဥပဒေ၊ အမိန့်ကြော်ငြာစာ၊ လုပ်ထုံးလုပ်နည်းများ တစ်ပြေးညီဖြစ်စေရေး ပြည်ထောင်စုအစိုးရမှ ကြပ်မတ် ထိန်းသိမ်းပေးရန် အစီအစဉ်ရှိ၊ မရှိ သိလိုကြောင်း မေးမြန်းပါသည်။