ဦးဉာဏ်ဝင်း(လှိုင်သာယာမဲဆန္ဒနယ်)

လှိုင်သာယာမြို့နယ်က ဧရိယာ ၂၆.၀၁ စတုရန်းမိုင် ကျယ်ဝန်း၍ အိမ်ခြေ ၅၇၇၇၀လုံး၊ အိမ်ထောင်စု ၅၈၆၄၅စု၊ လူဦးရေ ၃၈၀၀၀၀ ခန့်နေထိုင် လျက်ရှိသည့်မြို့ဖြစ်ပါတယ်။ လှိုင်သာယာမြို့နယ်တွင် စက်မှုဇုန်များတည်ရှိသဖြင့် စက်ရုံ အလုပ်သမားများ အများအပြားနေထိုင်ကြသည့်အပြင် လက်လုပ်လက်စား အခြေခံလူတန်းစားများ များပြားသဖြင့် မြို့နယ်အတွင်းသို့ ခရီးသည်တင်မော်တော်ယာဉ်လိုင်း ၃၃ လိုင်း ပြေးဆွဲပေးနေရသည့် လူဦးရေစည်ကားတဲ့ မြို့တစ်မြို့လည်းဖြစ်ပါတယ်။ လှိုင်သာယာမြို့နယ်သို့ ဆက်သွယ်ထားရှိသည့် မြစ်ကူးတံတားလေးစင်းရှိပြီး ၎င်းတို့မှာ လှိုင်မြစ်ကိုဖြတ်၍ လှိုင်သာယာမြို့နယ်နှင့် မရမ်းကုန်းမြို့နယ် တို့ဆက်သွယ်ထားသည့် ဘုရင့်နောင်တံတား၊ လှိုင်မြစ်ကိုဖြတ်၍ လှိုင်သာယာမြို့နယ်နှင့် အင်းစိန် မြို့နယ်တို့ ဆက်သွယ်ထားသည့် အောင်ဇေယျတံတား၊ လှိုင်မြစ်ကိုဖြတ်၍ လှိုင်သာယာမြို့နယ်နှင့် ရွှေပြည်သာမြို့နယ်တို့ဆက်သွယ်ထားသည့် ရွှေပြည်သာတံတား၊ ပန်းလှိုင်မြစ်ကိုဖြတ်၍ လှိုင်သာယာ မြို့နယ်နှင့် တွံတေးမြို့နယ်တို့ဆက်သွယ်ထားသည့် ပန်းလှိုင်တံတားတို့ဖြစ်ကြပါတယ်။ ယင်းတံတား လေးစင်းအနက် ရွှေပြည်သာတံတားနှင့် ပန်းလှိုင်တံတားမှာ မော်တော်ယာဉ်ဖြတ်သန်း သွားလာမှု နည်းပါး၍ ဘုရင့်နောင်တံတားနှင့် အောင်ဇေယျတံတားတို့မှာ ယာဉ်ကြီးယာဉ်ငယ်များ ဖြတ်သန်း သွားလာမှုများပြားသည့် တံတားများဖြစ်ကြပြီး ၎င်းတံတားနှစ်စင်းအနက် ဘုရင့်နောင်တံတားမှာ လှိုင်သာယာမြို့နယ်အတွင်းမှ ပြင်ပမြို့နယ်များနှင့် ရန်ကုန်မြို့တွင်းသို့သွားရောက်ကြရသည့် အစိုးရ ဝန်ထမ်းများ၊ လက်လုပ်လက်စားများ၊ ခရီးသွားလုပ်သားပြည်သူများ၊ ကုန်သည်ပွဲစားများအပြင် ရခိုင်ပြည်နယ်နှင့် ဧရာဝတီတိုင်းဒေသကြီးတို့မှ ခရီးသွားလုပ်သားပြည်သူများအနေဖြင့်လည်း လှိုင်သာယာမြို့နယ်အားဖြတ်သန်း၍ ဘုရင့်နောင်တံတားမှတစ်ဆင့် အခြားမြို့နယ်များနှင့် ရန်ကုန်မြို့ တွင်းသို့ သွားလာကြရသဖြင့် ကိုယ်ပိုင်ယာဉ်များ၊ အခြားယာဉ်များနှင့် ခရီးသည်တင်ယာဉ် လိုင်းများမှ မော်တော်ယာဉ်အများအပြား အားထားဖြတ်သန်းသွားလာနေကြရတဲ့ တံတားတစ်စင်းလည်း ဖြစ်ပါ တယ်။ ဘုရင့်နောင်တံတားမှာ ပင်မတံတားအရှည် ၁၆၄၀ပေရှိပြီး၊ လူသွားလမ်းအကျယ် တစ်ဖက်      ၄ ပေစီနှင့် ယာဉ်သွားလမ်းအကျယ် တစ်ဖက် ၂၈ ပေရှိသည့် နှစ်လမ်းသွား သံပေါင်သံကူကွန်ကရစ် အမျိုးအစား တံတားဖြစ်၍ ခံနိုင်ရည်ဝန်အားမှာ ၄၀ တန်ခံနိုင်ရည်ရှိသည့်တံတား ဖြစ်ပါတယ်။ ယခုအခါ ဘုရင့်နောင်တံတားမှာ ဖြတ်သန်းသွားလာသည့်မော်တော်ယာဉ် များပြားလာသဖြင့် တံတား ပေါ်တွင် မော်တော်ယာဉ်များ ရှင်လောင်းလှည့်သလို ဖြည်းညှင်းစွာ မောင်းနှင်ကြရပြီး မကြာခဏ တံတားတစ်လျှောက်ပေါ်တွင် မော်တော်ယာဉ်များ ပိတ်ဆို့ရပ်တန့်နေကြရသဖြင့် အချိန်ကြန့်ကြာသည့် အပြင် ယင်းမော်တော်ယာဉ်များ၏ အလေးချိန်စုစုပေါင်းသည် တံတား၏ ခံနိုင်ဝန်ထက်များနေသဖြင့် ‌ရေရှည်တွင်တံတားကျိုးပဲ့ပျက်စီးမည်ကို စိုးရိမ်ရပြီး တံတားကျိုးပဲ့ ပျက်စီးခဲ့ပါက ယင်းတံတားအား အားထားဖြတ်သန်းသွားလာနေကြသည့် လုပ်သားပြည်သူများ ခရီးသွားလာရေးအခက်အခဲနှင့် ကြုံတွေ့ရမည်ဖြစ်သဖြင့် ဘုရင့်နောင်တံတားနှင့်ယှဉ်လျက် အခြားတံတားတစ်စင်းဆောက်လုပ် ပေးရန် ဒေသခံပြည်သူများမှ လိုလားတောင့်တလျက်ရှိနေကြသဖြင့် ဒေသခံပြည်သူများ၏ကိုယ်စား အောက်ပါကြယ်ပွင့်ပြမေးခွန်းအား တင်ပြမေးမြန်းအပ်ပါတယ်ခင်ဗျား။

လှိုင်မြစ်ကိုဖြတ်၍ လှိုင်သာယာမြို့နယ်နှင့် မရမ်းကုန်းမြို့နယ်သို့ ဆက်သွယ်ထားသည့် ဘုရင့်နောင်တံတားနှင့် အပြိုင်အခြားတံတားတစ်စင်းအား ထပ်မံဆောက်လုပ်ပေးရန် အစီအစဉ်ရှိ၊မရှိ နှင့်အစီအစဉ်ရှိပါက မည်သည်‌့အချိန်တွင် ဆောက်လုပ်ပေးမည်ကို သိလိုကြောင်း မေးမြန်းပါသည်။