(ဇ)-ပျော်ဘွယ်ပြည်သူ့ဆေးရုံအား ခုတင် ၅၀ စံကိုက်ဆေးရုံအဖြစ်သတ်မှတ်ပေးပြီး လိုအပ်သည့် ဆရာဝန်၊ ဝန်ထမ်းများ၊ အရိုးအထူးကုဆရာဝန်တစ်ဦးနှင့် လူနာတင်ယာဉ်တစ်စီးချထားပေးရန် အစီအစဉ် ရှိ/မရှိ နှင့်စပ်လျဉ်းသည့် မေးခွန်း
ပျော်ဘွယ်မြို့မှာ လူဦးရေဟာ ၂၈၅၀၀၀ ခန့်ရှိပါတယ်။ ရပ်ကွက်ကျေးရွာအုပ်စု ၈၃ စုရှိပြီးတော့ ကျေးရွာပေါင်း ၃၁၇ ရွာရှိတဲ့ မြို့ကြီးတစ်မြို့ ဖြစ်ပါတယ်။ ကိုယ်ပိုင်အုပ်ချုပ်ခွင့်ရဒေသတစ်ခုထက်မက ပြည်နယ်ငယ်တစ်ခု လူဦးရေနီးပါးလောက် ရှိပါတယ်။ ကျွန်တော်တို့မြို့နယ်ဆေးရုံဟာ ခုတင် ၅၀ ဆံ့ သာမန်ဆေးရုံဖြစ်ပါတယ်။ ယခုအခါမှာ နိုင်ငံတော်ရဲ့ စေတနာနှင့် အခမဲ့ဆေးဝါးကုသမှုအစီအစဉ်တွေနဲ့ ကုသပေးတော့ လူနာဦးရေဟာလည်း ပိုမိုများပြား လာပါတယ်။ ကျွန်တော်တို့မြို့နယ်မှာ တာဝန်ကျမြို့နယ်ဆရာဝန်ကြီးအပါအဝင် ဆရာဝန်ကြီး ၄ ဦး ဖွဲ့စည်းပုံရှိပြီးတော့ ဆရာဝန် ၁ ဦးဟာ ဘွဲ့လွန်သင်တန်းတက်ရောက်နေပြီးတော့ လစ်ဟာနေပါတယ်။ လက်ရှိလက်ထောက်ဆရာဝန် ၂ ဦးသာရှိနေပြီး တစ်ခါတရံမှာ အခက်အခဲများရှိပါတယ်။ သားဖွား လူနာဦးရေဟာလည်း လစဉ် ၃၀ မှ ၄၀ ခန့် ရှိပါတယ်။ ပျော်ဘွယ်မြို့ရဲ့ လူဦးရေနှင့်ကိုက်ညီဖို့အတွက် ပျော်ဘွယ်မြို့နယ် ပြည်သူ့ဆေးရုံဟာ ခုတင် ၅၀ စံကိုက်ဆေးရုံအဖြစ် သတ်မှတ်ပေးပြီးတော့ လိုအပ်တဲ့ ဆရာဝန်နဲ့ ဝန်ထမ်းဦးရေဖြည့်ဆည်းပေးခြင်းနှင့် ရန်ကုန်-မန္တလေးမူလလမ်းမကြီး ဖြတ်သန်းသွားခြင်း နောက်ထပ်အသစ်ဖောက်လုပ်တဲ့ ရန်ကုန်-မန္တလေးအဝေးပြေးလမ်းမ အသစ်ဖြတ်သန်းသွားခြင်းနှင့် ရှမ်းပြည်နယ်မှလမ်းများဆုံရာဖြစ်တဲ့မြို့ဖြစ်တဲ့အတွက်ကြောင့် ယာဉ်ထိခိုက်မှုအန္တရာယ်များလွန်စွာရှိ ပါတယ်။ အရေးပေါ်ထိခိုက်ဒဏ်ရာရလူနာများအတွက် အရိုးအထူးကုဆရာဝန်တစ်ဦးနှင့် လူနာတင် ယာဉ်တစ်စီးကို ပျော်ဘွယ်မြို့နယ် ပြည်သူ့ဆေးရုံအတွက် ချထားပေးဖို့လည်း တင်ပြတောင်းခံအပ်ပါ တယ်။ အစိုးရအဖွဲ့ကို အကြံပြုလိုသည်မှာ နောင်တစ်ချိန်မှာ Without ဆိုင်ကယ်များကိုလိုင်စင်ပေးခဲ့ မယ်ဆိုရင်လည်း အရိုးအထူးကုဆရာဝန်များလည်း ထပ်မံတိုးချဲ့ဖို့နဲ့ နောက် ကျွန်တော်တို့ လမ်းတွေ လည်းထပ်မံတိုးချဲ့ပေးဖို့လည်း စဉ်းစားပေးပါ ဆိုတဲ့အကြောင်းလည်း အကြံပြုလိုပါတယ်။ ဒါ့ကြောင့် ကျွန်တော်တို့မြို့နယ်အတွက် တောင်းခံတဲ့ကိစ္စများကိုလည်း စီစဉ်ပေးနိုင်/မပေးနိုင် သိရှိလိုပါ၍ မေးမြန်းပါသည်။