ကျွန်တော့်အနေနဲ့ ပထမအကြိမ် ပြည်သူ့လွှတ်တော် ပဉ္စမပုံမှန်အစည်း အဝေးမှာ အဆိုတစ်ခုတင်သွင်းဖို့ လုပ်ခဲ့ပါတယ်။ အဲ့ဒီအဆိုရဲ့ခေါင်းစဉ်ဟာ ဒီနေ့ နိုင်ငံတော်မှာ စွမ်းအင်နှင့်ပတ်သက်ပြီးတော့ ဘယ်လိုသုံးစွဲနေတယ်။ အနာဂတ်မှာ ဘယ်လိုသုံးစွဲမယ်ဆိုတဲ့ ကိစ္စရပ် တွေကို ပြည်သူ့လွှတ်တော်အနေနဲ့ စနစ်တကျလေ့လာပြီးတော့ ပြည်သူ့လွှတ်တော်သို့ ပြန်အစီရင်ခံရန် ဆိုတဲ့ အဆိုဖြစ်ပါတယ်။ ဒီအဆိုကို အချိန်မရတဲ့အတွက်ကြောင့် မေးခွန်းအဖြစ်သို့ ပြောင်းလဲတဲ့အတွက် ကြောင့် ဒီမေးခွန်းကို မေးရခြင်း ဖြစ်ပါတယ်။ ကျွန်တော် ဆိုလိုတဲ့ စွမ်းအင်ဆိုတာ ရေနံနှင့် သဘာဝ ဓာတ်ငွေ့စတဲ့ ဇီဝရုပ်ကြွင်းလောင်စာမျိုးသက်သက်ကို ဆိုလိုတာမဟုတ်ပါဘူး။ နေရောင်ခြည်၊ လေရောင်ခြည်၊ လျှပ်စစ်စွမ်းအင်၊ အဏုမြူစွမ်းအင်၊ ဘိုင်အိုမတ်၊ ဘိုင်အိုဖြူးရယ်စတဲ့ စွမ်းအင်ပေါင်းစုံ ကို ဆိုလိုခြင်းဖြစ်ပါတယ်။ ယခုကျွန်တော့်မေးခွန်းကို ဖြေဖို့လာရောက်တာ စွမ်းအင်ဝန်ကြီးဌာနမှ ဖြစ်တဲ့အတွက်ကြောင့် ကျွန်တော်ရေနံနှင့်သဘာဝဓာတ်ငွေ့နှင့်ပတ်သက်တဲ့ လုပ်ငန်းများကို ဆွေးနွေး လိုပါတယ်။ ဆွေးနွေးပြီး မေးခွန်းမေးချင်ပါတယ်။ ကျွန်တော့်မေးခွန်းအထောက်အကူပြုနိုင်ရန်အတွက် Power Point Slide ၂ ချက်ခန့် အသုံးပြုခွင့်ပေးပါလို့ တင်ပြလိုပါတယ်။ အခုတင်ပြတဲ့ Slide မှာ ကြည့်လိုက်ရင် ဒီနေ့အချိန်အခါဟာ ၂၀၁၃-၂၀၁၄ ဘဏ္ဍာရေးနှစ်ရဲ့ ဘတ်ဂျက်ကို ရေးဆွဲနေတဲ့ အချိန်ဖြစ်ပါတယ်။ နိုင်ငံတော်က တင်ပြထားတဲ့ ဘတ်ဂျက်ရဲ့ နောက်ဆက်တွဲ ၃ ဇယား ၅၉ မှာ ယခုတင်ပြထားတဲ့ ကိန်းဂဏန်းကိုဖော်ပြထားတာကြည့်ရင် ၂၀၁၂-၂၀၁၃ ခုနှစ်မှာ ဓာတ်ဆီဂါလန် ပေါင်း ၁၃၁.၆၉၆ သန်း ထုတ်လုပ်မယ်လို့ လျာထားတယ်။ ၂၀၁၃-၂၀၁၄ မှာ ဂါလန်သန်းပေါင်း ၇၈ သန်းခန့်သာလျှော့ပြီး ထုတ်တဲ့အတွက်ကြောင့် ပြောင်းလဲမှုရာနှုန်းဖြင့် ၄၀.၄ ရာနှုန်း လျော့နည်းထုတ် မယ်လို့ နောက်ဆက်တွဲ ၃ မှာ အတိအကျဖော်ပြထားပါတယ်။ အလားတူ ဒီဇယ်ထုတ်လုပ်မှုမှာ ၂၀၁၂-၂၀၁၃ မှာ သန်းပေါင်း ၄၉.၇၉၉ သန်းကနေ ၂၀၁၃-၂၀၁၄ မှာ ၄၂.၁၉၉ သန်းသို့ ပြောင်းလဲတဲ့ အတွက်ကြောင့် ပြောင်းလဲမှု ၁၅.၅ ရာခိုင်နှုန်း လျှော့ပြီးထုတ်လုပ်မယ်ဆိုပြီးတော့ ရေးထားပါတယ် ခင်ဗျား။ အဲ့ဒီတော့ ဒီဟာ ဆက်စပ်ပြီးပြရင် စာမျက်နှာ ၆၀ မှာ ဒီနေ့နိုင်ငံတော်က မော်တော်ကား ထုတ်လုပ်မှုနှုန်းဟာ ၂၀၁၂-၂၀၁၃ မှာ ထုတ်လုပ်တဲ့စီးရေ ၁၄၇၃၀ ကနေ ၂၀၁၃-၂၀၁၄ မှာ ၁၀၄၅၀ ခု ၂၉ ရာခိုင်နှုန်းအထိ လျှော့ သွားတာတွေ့ရပါတယ်။ မော်တော်ယာဉ်တင်သွင်းမှုဟာ ပဉ္စမကာလတို ငါးနှစ်စီမံကိန်းရဲ့ ဇယား ၈၅ မှာ ဖော်ပြထားတာက ၂၀၁၁-၂၀၁၂ မှာ လူ ၁၀၀၀ မှာ ကား ၆.၅ စီး ထိရှိတယ်။ အကြမ်းအားဖြင့် စီးရေပေါင်း ၃၉၀၀၀၀ လောက်ရှိတယ်။ ဒီနေ့ ၂၀၁၃ ခုနှစ် ဇန်နဝါရီလ မှာ မော်တော်ကားစီးရေ ၄၅၀၀၀၀ ကျော်ရှိတယ်လို့ သိရပါတယ်။ လူဦးရေသန်း ၆၁၀ နှင့်စားကြည်‌့ ရင် လူ ၁၀၀၀ မှာ ၇.၅ စီးနှုန်းဖြစ်ပါတယ်။ ပဉ္စမကာလတိုငါးနှစ်စီမံကိန်းရဲ့ ဇယား ၈၅ မှာ ပြတဲ့အတိုင်း ပဲ ၂၀၁၅-၂၀၁၆ မှာ လူ ၁၀၀၀ မှာ ၁၃ စီးအထိဖြစ်လာရင် မော်တော်ကားစီးရေ ၇၈၀၀၀၀ ဖြစ်လာ မှာပါ။ အဲ့ဒီတော့ တစ်ဖက်မှာ ထုတ်လုပ်မှုကျသွားတယ်။ မော်တော်ကားတွေမှာသုံးတဲ့ ဒီဇယ်၊ ဓာတ်ဆီ လိုတယ်။ ဒါပေမယ့် မော်တော်ကားစီးရေတွေ အရမ်းများလာပါတယ်။ ဒီနေ့ မြန်မာနိုင်ငံကို အလုံးအရင်းနဲ့ မော်တော်ကားတွေ ဝင်ရောက်လာတာကိုတွေ့ရပါတယ်။ ဒီနေရာမှာ မော်တော်ကား အများအပြားဟာ ကိုယ်ပိုင်စီးယာဉ်တွေပဲ ဖြစ်ပါတယ်။ ရန်ကုန်မြို့လို မြို့ကြီးတစ်မြို့မှာ ကိုယ်ပိုင် မော်တော်ကားနှင့် ခရီးသွားလို့ရှိရင် လူတစ်ယောက် ၁ မိုင်သွားဖို့အတွက် BTU ၃၆၇၁  BTU သုံးရပြီး တော့ စီးတီးဘတ်စ်လို့ခေါ်တဲ့ အများပြည်သူသုံးဘတ်စ်နဲ့သွားမယ်ဆိုရင် BTU ၈၁၆ BTU ခန့်သာကျ တဲ့အတွက်ကြောင့် ကိုယ်ပိုင်မော်တော်ကားနှင့်ခရီးသွားခြင်းဟာ ဘတ်စ်ကားနှင့်သွားတာထက် ဆီ ၄.၅ ဆပိုပြီးတော့ များတယ်ဆိုပြီးတော့ နိုင်ငံတကာသုတေသနတွေ ပြုလုပ်ထားတာတွေ့ရပါတယ်။ ကျွန်တော် ယခုလိုဆွေးနွေးခြင်းဟာ နိုင်ငံမှာ ကားစီးရေများလာတယ်။ Mass Rapid Transit  ခေါ်တဲ့ MRT System လို့ မရှိသေးဘူး။ အဲ့ဒီတော့ ဆီသုံးစွဲမှုဟာ ပိုများလာတယ်။ ဒါပေမယ့် ကာလတိုငါးနှစ် စီမံကိန်း ကျွန်တော်တို့ဆီကို တင်ထားတာကိုကြည်‌့လိုက်ရင် ဒီဇယ်နှင့်ဓာတ်ဆီ ထုတ်လုပ်မှုဟာ ၂၀၁၂-၂၀၁၃ ကထက်တဖြည်းဖြည်းလျှော့ကျသွားတာတွေ့ရပါတယ်။ တစ်ဖက်က ကဏ္ဍတွေတိုးတက်အောင် လုပ်လာတယ်။ တစ်ဖက်မှာ ထုတ်လုပ်မှုက လျော့ကျသွားတယ်။ ဒီနှစ်ခုဟာ ဆန့်ကျင်ဘက်ဖြစ်နေ တယ်။ အဲဒီအတွက်ကြောင့် ကျွန်တော်တို့နိုင်ငံဟာ ဒီဇယ်၊ ဓာတ်ဆီဆိုတာလည်း တွင်းထဲကထွက်တဲ့ ရေနံစိမ်းကိုချက်ရတာ သူ့ကိုပိုထုတ်ပါလို့ပြောလို့မရဘူး။ ရှိသလောက်ပဲထုတ်ပြီးတော့ ဒီဇယ်၊ ဓာတ်ဆီ ချက်ရပါတယ်။ အဲဒီတော့ ဒီနေ့ နိုင်ငံခြားကအမြောက်အမြားတင်သွင်းနေရတယ်။ မှောင်ခိုတောင် တင်သွင်းနေရတယ်။ မှောင်ခိုတင်သွင်းသွင်း၊ တရားဝင်ဝယ်ဝယ် ကျွန်တော်တို့နိုင်ငံက ပိုက်ဆံတွေဟာ Cut Flow အနေနဲ့ နိုင်ငံခြားကို ထွက်သွားပါတယ်။ အဲ့ဒီတော့ ဘယ်ကဲ့သို့ စွမ်းအင် Security ကို ဘယ်လိုလုပ်ထားလဲဆိုတာကို သိချင်ပါတယ်။ အကယ်၍ ကျွန်တော်တို့ရဲ့ စွမ်းအင်သုံးစွဲမှုဟာ နိုင်ငံခြားအပေါ်မှာ အရမ်းမှီတင်းနေရင် တိုင်းပြည်တစ်ပြည်နဲ့ စစ်ဖြစ်လို့ရှိရင် စွမ်းအင်လမ်းကြောင်း ကို ဖြတ်ပိတ်လိုက်ရင် ဘာမှ Security မရှိပါဘူး။ ဒီနေ့ နိုင်ငံကထုတ်တဲ့ ဓာတ်ဆီ၊ ဒီဇယ်ဆီဟာ အလွန် နည်းပါးတယ်။ ကျွန်တော်မေးလိုတဲ့မေးခွန်းကတော့ စွမ်းအင်ဝန်ကြီးဌာနအနေနဲ့ တဖြည်းဖြည်း လျော့ကျသွားတဲ့ ဒီဇယ်၊ ဓာတ်ဆီ တစ်ဖက်က သုံးစွဲမှုရှိလာတဲ့ ယာဉ်၊ ရထားတွေ ဒီကိစ္စတွေအပေါ်မှာ မည်ကဲ့သို့သော Energy Security Plan အား ဆောင်ရွက်ထားပါသလဲ ဟု မေးမြန်းပါသည်။