ပျော်ဘွယ်မြို့နယ်အတွင်းမှ သာစည်မြို့နယ်၊ မင်းလှကန်အတွင်းသို့ စီးဝင်လျက်ရှိသော ချောင်းကောက် နှင့် မြင်းကျချောင်းများ ပိတ်ဆို့တိမ်ကောပြီး ချောင်းရိုးပြောင်းလဲခြင်းများကြောင့် ချောင်းရိုးများ ပြန်လည်တူးဖော်ထိန်းသိမ်းပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

မန္တလေးတိုင်းဒေသကြီး၊ ပျော်ဘွယ်မြို့နယ်အတွင်း ၂၀၁၇ ခုနှစ်၊ စက်တင်ဘာလ ၆ ရက်နေ့ မနက် ၂ နာရီမှ  ၅ နာရီခွဲအတွင်း မိုးရေချိန်လက်မသုံးလက်မကျော် ရွာသွန်းခဲ့သည့်အတွက် ဧကရာဇ်ကုန်း ကျေးရွာအုပ်စု၊ ဧကရာဇ်ကုန်းကျေးရွာ၊ ရွာသစ်ကျေးရွာ၊ ဘုမကုန်းကျေးရွာနှင့် ရေလည်ကွေ့ ကျေးရွာများရှိ အဆောက်အဦများ၊ စိုက်ခင်းများ  ရေကြီးနစ်မြုပ်မှုဖြစ်ပေါ်ခဲ့ပါကြောင်း၊ ရေကြီးနစ်မြုပ် ရသည့် ကျေးရွာများသည် ပျော်ဘွယ်မြို့နယ်၊ မြောက်ဘက်က မိတ္ထီလာမြို့နယ်နှင့် အ‌ရှေ့ဘက်က သာစည်မြို့နယ် ဖြစ်ပါကြောင်း၊

ရေကြီးရသည့်အကြောင်းအရင်းကို မြို့နယ်ဆည်မြောင်းဦးစီးဌာနမှတာဝန်ရှိသူများ၊ ကျေးရွာ အုပ်ချုပ်ရေးမှူးများနှင့် ရပ်မိရပ်ဖများ ကွင်းဆင်းစစ်ဆေးသည့်အခါ ပျော်ဘွယ်မြို့နယ်နှင့် မိတ္ထီလာ မြို့နယ်စပ်မှ သာစည်-မင်းလှကန်ထဲကိုစီးဝင်သွားသော ချောင်းကောက်ချောင်းနှင့် မြင်းကျချောင်း များသည် ပျော်ဘွယ်မြို့နယ်အတွင်းရှိ ဧကရာဇ်ကုန်းကျေးရွာအုပ်စုက ဧကရာဇ်ကုန်းကျေးရွာ၊ ရွာသစ်ကျေးရွာ၊ ဘုမကုန်းကျေးရွာနှင့် ရေလည်ကွေ့ကျေးရွာများအနီးတွင် ဖြတ်သန်းစီးဆင်းလျက် ရှိပါကြောင်း၊ အဆိုပါချောင်းများသည် သစ်ပင်၊ ခြုံနွယ်များ ပိတ်ဆို့ပြီး ချောင်းရိုးတိမ်ကောသွားခြင်း၊ မူလရေကြောင်းပြောင်းလဲမှုကြောင့် အချိန်တိုအတွင်း မိုးရေချိန်လက်မ မြောက်မြားစွာ ရွာသွန်းလာသည့်အခါ အထက်တွင်ရှိသည့်ချောင်းကောက်ဆည်နှင့် ရေလျှံကန်ကျိုးပေါက်ပြီး ကျေးရွာ စိုက်ခင်းများနှင့် ရွာအတွင်း ရေများစီးဝင်ပြီး နစ်မြုပ်ရခြင်းဖြစ်ပါကြောင်း၊

ဆည်မြောင်းဦးစီးဌာနနှင့် ပဏာမတိုင်းတာမှုအရ ၎င်းချောင်းရိုးကိုပြန်လည်ပြုပြင်မည်ဆိုပါက တင်ပြပါ အတိုင်း ချောင်းကောက်ဝီယာမှ မင်းလှကန်ထိ ချောင်းကောက်ချောင်းကို ကိုက် ၁၇၀၀၀ ခန့်နှင့် မြင်းကျချောင်းကို ကိုက် ၁၂၀၀၀ ခန့် ပြန်လည်တူးဖော်ရမည်ဖြစ်ပါကြောင်း၊ ချောင်းရိုးများ တိမ်ကောပိတ်ဆို့ပြီး ချောင်းများပြောင်းလဲနေသည့်အတွက် ပုံမှန်မဟုတ်သော မိုးရွာသွန်းမှု၊ ရာသီဥတု ဖောက်ပြန်မှုများနှင့် မိုးရွာသွန်းမှုများလာတိုင်း ကျေးရွာများရေနစ်မြုပ်မှုဒဏ်ကို ခံစားဖြစ်ပေါ်ရမည် ဖြစ်သည့်အတွက် ကျေးရွာများ၊ စိုက်ခင်းများ ရေကြီးနစ်မြုပ်ခြင်းမှကင်းဝေးရန်အတွက် တင်ပြပါ ချောင်းနှစ်ချောင်းတိမ်ကောပိတ်ဆို့ပြောင်းလဲမှုကို ဆည်ယူထိန်းသိမ်းရေး သို့မဟုတ် အခြားနည်းလမ်း တစ်ခုဖြင့် ကာကွယ်ရေးဆောင်ရွက်ပေးနိုင်ပါရန်  တင်ပြပါကြောင်းနှင့် ပျော်ဘွယ်မြို့နယ်အတွင်းမှ သာစည်မြို့နယ်၊ မင်းလှကန်အတွင်းသို့ စီးဝင်လျက်ရှိသော ချောင်းကောက်ချောင်းနှင့် မြင်းကျ ချာင်းများ ပိတ်ဆို့တိမ်ကောပြီး ချောင်းရိုးပြောင်းလဲခြင်းကြောင့် ကျေးရွာများရေကြီးနစ်မြုပ်မှု ဘေးအန္တရာယ် ဖြစ်ပေါ်လျက်ရှိသဖြင့် အဆိုပါရေဘေးအန္တရာယ်မှ ကာကွယ်‌ရေးအတွက် ချောင်းရိုး များ ပြန်လည်တူးဖော်ထိန်းသိမ်းပေးရန် အစီအစဉ်ရှိ/မရှိနှင့် ဆောင်ရွက်ရန်ရှိပါက မည်သည်‌့ကာလ တွင် ဆောင်ရွက်နိုင်မည်၊ ဆောင်ရွက်ရန်မရှိပါက ရေကြီးနစ်မြုပ်မှုဘေးအန္တရာယ်မှ  မည်သို့ကာကွယ် ပေးနိုင်မည်ကို သိရှိလိုပါကြောင်း မေးမြန်းပါသည်။