(ခ)-ငပလီမြို့ အမှတ်(၃)၊ လင်းသာရပ်ကွက်အတွင်းရှိ ငပလီရေလှောင်တမံ၏ တရားဝင်နယ်နိမိတ် သတ်မှတ်ဧရိယာကို ဒေသခံပြည်သူများ ထင်ရှားစွာသိမြင်နိုင်အောင် သတ်မှတ်ပေးရန်နှင့် သတ်မှတ်ဧရိယာအတွင်း တရားမဝင်ကျူးကျော် ဝင်ရောက်နေထိုင်မှုများကို ရပ်တန့်အောင် မည်ကဲ့သို့ တားဆီးပေးမည်ကို သိလိုခြင်းနှင့်စပ်လျဉ်းသည့်မေးခွန်း

ငပလီမြို့အမှတ် (၃) လင်းသာရပ်ကွက်အတွင်းရှိ နိုင်ငံတော်အစိုးရပိုင် ဆည်မြောင်းဦးစီးဌာနက ၁၉၆၇-၆၈ ခုနှစ်တွင် တာဝန်ယူဆောက်လုပ်ခဲ့သည့် ငပလီရေလှောင်တမံစီမံကိန်းသည် ၁၉၇၀-၇၁ ခုနှစ်တွင် ပြီးစီးခဲ့ပါကြောင်း၊ ၎င်းရေလှောင်တမံကို တည်ဆောက်ရသည့် ရည်ရွယ်ချက်က ငပလီလူရည်ချွန် စခန်းရေရရှိရေးနှင့် ဒေသခံကျေးရွာများသို့ ရေပေးဝေ‌ရေး၊ ငပလီကမ်းခြေ တစ်လျှောက်ရှိ ဟိုတယ်များ၊ ရေလုံလောက်စွာ ရရှိရေးနှင့် နွေစပါးစိုက်ပျိုးရေးတို့အတွက် အကောင်အထည်ဖော် ဆောင်ရွက်ခဲ့ခြင်း ဖြစ်ပါကြောင်း၊ ရေလှောင်တမံ၏ ဧရိယာအကျယ်အဝန်းသည် ၂၄၉ ဧကရှိပြီး ဆည်မြောင်းဦးစီးဌာနပိုင် နယ်နိမိတ်အဖြစ် တည်ရှိရာ သတ်မှတ်ထားသော်လည်း ဒေသခံပြည်သူများအနေဖြင့် နယ်နိမိတ်သတ်မှတ်ချက်များ၊ ခြံစည်းရိုးကာရံထားခြင်းများ မရှိသည့်အတွက် ရေလှောင်တမံ၏ နယ်နိမိတ်များကို ကောင်းစွာ မသိရှိကြပါကြောင်း၊

ထိုအခြေအနေကို အခွင့်ကောင်းယူ၍ ဒေသခံပြည်သူအချို့နှင့် ကုမ္ပဏီအချို့က ရေလှောင်တမံ၏ ဧရိယာနယ်နိမိတ်အတွင်း ကျူးကျော်ဝင်ရောက်၍ ခြံကွက်ရိုက်ခြင်း၊ တစ်ဆင့်ပြန်လည်ရောင်းချခြင်း၊ နေထိုင်ခြင်းတို့ ပြုလုပ်နေသည်ကို သိရှိရပါကြောင်း၊ ၎င်းအပြင် ကောင်းမြန်မာအောင် ကုမ္ပဏီလီမိတက်မှ ရေလှောင်တမံဧရိယာအတွင်း ၇၆ ဧကကို ဟိုတယ်နှင့် အပန်းဖြေ Resort လုပ်ငန်းအတွက် နှစ် (၃၀) လုပ်ပိုင်ခွင့်ကို မြေလွတ်၊ မြေလပ်နှင့်မြေရိုင်းများ စီမံခန့်ခွဲရေး ဗဟိုကော်မတီ၏ ၂၄-၁၂-၂၀၁၄ ရက်နေ့ အစည်းအဝေးအမှတ်စဉ် (၆/၂၀၁၄) ဆုံးဖြတ်ချက် ၅(ခ) အရ လက်မှတ်ရေးထိုးပြီး ထုတ်ပေးထားသည်ကိုလည်း သိရှိရပါကြောင်း၊

ငှက်ပျောချောင်းရေလှောင်တမံကို ၆-၃-၂၀၁၅ ရက်နေ့မှစ၍ ဆည်မြောင်းဦးစီးဌာနပိုင် နယ်နိမိတ်အဖြစ် သတ်မှတ်ထားကြောင်းကိုလည်း အခြားဌာနဆိုင်ရာများသို့ အမိန့်ကြော်ငြာစာ ထုတ်၍သတိပေး အကြောင်းကြား ထားခဲ့သည်ကိုလည်း သိရှိရပါကြောင်း၊ ပြစ်မှု ကျူးလွန်သူများအား မြန်မာနိုင်ငံတူးမြောင်း အက်ဥပဒေအခန်း (၁၁) ပုဒ်မ ၇၅ အောက်ရှိ ပြစ်ဒဏ်များအလိုက် အပ်နှင်းထားသော လုပ်ပိုင်ခွင့်များအရ လိုအပ်သလို အရေးယူခံရမည် ဖြစ်ကြောင်းကိုလည်း ပြည်သူလူထုသို့ အသိပေးထုတ်ပြန်ကြေညာ ထားတာကိုလည်း သိရှိရပါကြောင်း၊ ရေလှောင်တမံ၏ ရေဆင်းဧရိယာအတွင်း ကျူးကျော်အဆောက်အဦများ များပြားလာပါက ရေလှောင်တမံ အတွင်းသို့ ရေဆိုးရေညစ်များစီးဝင်၍ သောက်သုံးရန် မသင့်သည့် ဆိုးကျိုးများကို ကြုံတွေ့လာရနိုင်သည်ကို ဒေသခံမိဘပြည်သူများအနေဖြင့် မလိုလားကြပါကြောင်း၊ ငပလီရေလှောင်တမံ၏ အမိန့်ကြော်ငြာစာ ထုတ်ပြန်ထားသည်ကို တွေ့ရှိရခြင်း ဖြစ်ပါကြောင်း၊ ရေလှောင်တမံ၏ ဧရိယာ ၂၄၉ ဧကဖြစ်ပြီး ကွင်းခြားနယ်နိမိတ်ဖြစ်ပါကြောင်း၊ ယခုက ကွင်းခြားနယ်နိမိတ်အတွင်း ရေလှောင်တမံ၏ ဧရိယာအတွင်း ဝင်ရောက်ပြီး ကျူးကျော်နေခြင်းများကို တွေ့ရှိရပါကြောင်း၊ ၎င်းက ကောင်းမြန်မာအောင် ကုမ္ပဏီလီမိတက်ကနေပြီး ၇၆ ဧကကို  ရေလှောင်တမံဧရိယာအတွင်း ကျူးကျော်ပြီး နေရာယူထားသည်ကို သိရှိရပါကြောင်း၊ ပလပ်မြေ မြေလွတ်၊ မြေရိုင်းဌာနကနေပြီး လက်မှတ်ထိုးပြီး ထုတ်ပြန်ထားသည့် စာရွက်ဖြစ်ပါကြောင်း၊ ရေကန်၏ ပတ်ပတ်လည် တစ်လျှောက်လုံးကိုလည်း ကောင်းမြန်မာအောင်ကုမ္ပဏီကနေ ယူထားသည့် ဧရိယာများဖြစ်ပါကြောင်း၊ ထို့ကြောင့် ရေလှောင်တမံ၏ ဧရိယာကို သတ်မှတ်ပေးသည့်အပြင် ရေလှောင်တမံ၏ ဧရိယာအတွင်း ကျူးကျော်ပြီး ဝင်ရောက်နေထိုင်သူများကို အရေးယူပေးရန်ရှိ/မရှိ သိရှိလိုပါကြောင်း မေးမြန်းပါသည်။