ကျွဲ၊ နွားအရှင် များကိုပြည်ပသို့တင်ပို့ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ၅-၁၀-၂၀၁၇ ရက် နေ့တွင် (၄၉/၂၀၁၇) စာအမှတ်ဖြင့် ခွင့်ပြုခဲ့ပါကြောင်း၊ ယခုလိုရောင်းသည့်အတွက် မိမိတို့နိုင်ငံအနေဖြင့် စက်မှုလယ်ယာကိုအပြည့်အဝ မကူးပြောင်းနိုင်သေးသည့်အခြေအနေတွင် ခိုင်းကျွဲနှင့် နွားများ ပြတ်လပ်သွား မည်စိုးပါကြောင်း၊ ထို့ကြောင့် ပြည်ပတင်ပို့မှုနှင့် ပြည်တွင်းနွားမွေးမြူမှု ဟန်ချက်ညီရန် လိုအပ်ပါကြောင်း၊ ပြည်ပတင်ပို့ရသည့် ရည်ရွယ်ချက်များကို ကြည့်မည်ဆိုပါက လွတ်လပ်သည့် ဈေးကွက်ဖော်ဆောင်မှု၊ တရားမ ဝင် လမ်းကြောင်းမှ တရားဝင်လမ်းကြောင်းပေါ်ရောက်ရန်၊ မွေးမြူသူ တောင်သူလယ်သမားများ အလုပ်အကိုင် အခွင့်အလမ်းတိုးရန်၊ တောင်သူလယ်သမားအကျိုးစီးပွား ကာကွယ်နိုင်ရန်အတွက်  ရည်ရွယ်ထားသည်ကို တွေ့ရပါကြောင်း၊ သို့သော် ပြည်တွင်း တွင်  ကျွဲ၊ နွား သယ်ယူမှုများ မှ  အခက်အခဲများ နှင့် ကြုံတွေ့နေရပါကြောင်း၊ မြို့နယ်ကျော်၊ ခရိုင်ကျော်၊ တိုင်းကျော် စသည်ဖြင့် သယ်ရသည့်နေရာတွင်လည်း တကယ့်မွေးမြူသည်တောင်သူလယ်သမားများမှ မိမိနွားကို သယ်ယူရတာတောင်မှ ခက်ခဲနေပါကြောင်း၊ ရောင်းချသည့်နေရာတွင်လည်း မွေးမြူရေးနှင့်ကုသရေး ဦးစီးဌာနက ထိန်းကျောင်းမှုများလုပ်ထားပါကြောင်း၊ တစ်ကြိမ်ကို အကောင် ၁၀၀ တစ်ခါတည်းသယ်ရမည်၊ စုဆောင်းရပ်ရှိသည့်ခရိုင်တွင်သာ ဝယ်ရမည်၊ ငါးနှစ် အထက်ဖြစ်ရမည်၊ နွားအထီးဆိုပါက သင်းကွပ် ပြီးသားဖြစ်ရမည်၊ Animal Quarantine Certificate လက်မှတ် တိရစ္ဆာန်ရောဂါကင်းရှင်းကြောင်း လက်မှတ်ရယူပေးရမည်ဆိုသည့် အချက်များနှင့် ထိန်းကွပ်ထား ပါကြောင်း၊  တစ်ကြိမ် အကောင် ၁၀၀ သယ်ဖို့ ဆိုသည်မှ သာမန်တောင်သူတွေအနေဖြင့် မဖြစ်နိုင်ပါကြောင်း၊  တရားမဝင် လမ်းကြောင်းနှင့် သယ်နေသည့်သူများကို တရားဝင်လမ်းကြောင်းနှင့်သယ်နိုင်ရန်အတွက်ကို လုပ်ပေးသလို၊ အကောင် ၁၀၀ တစ်ခါတည်းသယ်ရန်ဆိုသည့်အခါမှာ အခက်အခဲများရှိနေသည့်အတွက် Permit ရောင်းစား သည့်ပြဿနာများလည်း ကြုံလာရနိုင်ပါကြောင်း၊  ၂၂-၃- ၁၉၆၆ ရက်နေ့ လယ်ယာ စိုက်ပျိုးရေးနှင့်သစ်တောရေးရာဌာန၊ စိုက်ပျိုးရေးဌာနစု၏ အမိန့်ကြော်ငြာစာနှင့် ၁၀-၈- ၂၀၁၂ ရက် အရေးကြီးကုန်စည်နှင့်ဝန်ဆောင်မှုဥပဒေများကြောင့် ပြည်တွင်းနွားသယ်ရသည်မှလည်း ခက်ခဲနေပါကြောင်း၊  နွားများထုတ်ရောင်းပြီး ပြည်တွင်းတွင် နွားမွေးမြူမှုမည်မျှတိုးတက်လာပြီး နွားမွေးမြူမှုဆိုသည်မှာ နွားမျိုး၊ အစားအစာဖြစသည့် စားကျက်၊ နောက် မွေးမြူပုံနည်းစနစ်များဖွံ့ဖြိုးရန်လိုပါကြောင်း၊ နွားမျိုးများအနေဖြင့် ဌာနမှ မျိုးချောင်းများဖြန့်ပေးနေသည်မှာ  မှန်သော်လည်း  ဌာနမှာရှိသည့် နွားသိုးများသည်လည်း အကန့် အသတ်နှင့်သာရှိပြီး စားကျက်များလည်း လုံလုံလောက်လောက် မရှိပါကြောင်း၊  နည်းစနစ်ပိုင်းဆိုင်ရာအရ မွေးမြူရေးဆိုင်ရာဆေးတက္ကသိုလ်မှ Master များ၊ Ph.D များစသည်ဖြင့် ထုတ်ပေးနေသော်လည်း စာရွက် ပေါ်တွင်သာသင်ပြီး တကယ်လက်တွေ့ကင်းဆင်းနိုင်သည့် Demonstration Farm၊ စားကျက်များ လုံလောက် အောင်မရှိသည့်အခါမှာ လက်တွေ့ပိုင်းဆိုင်ရာ ဆောင်ရွက်မှု မှာလည်း အားနည်ချက်များ ရှိနေပါကြောင်း၊  ထို့ကြောင့် နွားမွေးမြူသည့်သူများနှင့် တောင်သူများ နည်းစနစ်ပိုင်းများတွင် အဆင်ပြေအောင်၊ တကယ် မွေးမြူသည့် တောင်သူလယ်သမားများ ရောင်းချရသည့်နေရာတွင် အဆင်ပြေအောင်မည်ကဲ့သို့ ဆောင်ရွက် ထားပြီး ယခုကြုံတွေနေရသည့် အခက်အခဲများကို တကယ်ကုန်သွယ်မည့်သူများ နှင့် နွားမွေးမည့်တောင်သူ များ အဆင်ပြေရန်နှင့် တောင်သူလယ်သမားများ အလုပ် အကိုင် အခွင့်အလမ်းများ တိုးတက်ရန်မည့်ကဲ့သို့ ဆောင်ရွက်ပေးရန် အစီအစဉ်ရှိ/မရှိကို သိလိုပါကြောင်းဖြင့် မေးမြန်းသွားပါသည်။