မိမိတို့နိုင်ငံတွင် အိမ်နီးချင်းငါးနိုင်ငံရှိပြီး နယ်နိမိတ်တိုင်းတာမှုများကို ထိုင်းကလွဲပြီး အားလုံးပြီးစီးနေပြီ ဖြစ်ပါကြောင်း၊ အချို့က ကုန်းနယ်နိမိတ်ဖြစ်ပြီး၊ အချို့က မြစ်၊ ချောင်းများအတိုင်း သတ်မှတ်ကြ ပါကြောင်း၊ ကုန်းနယ်နိမိတ်ဆိုရာတွင် (Water Ship) ဟု ခေါ်သော ရေဖြူကြောကို အခြေခံသည်မှာ များပါကြောင်း၊ မြစ်၊ ချောင်းများအတိုင်းသတ်မှတ်သည့်အခါ ချောင်း၏အရှေ့ဘက်ကို ထိုင်း၊ အနောက်ဘက်ကို မြန်မာပိုင်ဆိုင်သည်ဟု သတ်မှတ်သည့် နယ်နိမိတ်ရှိသကဲ့သို့ တာချီလိတ်အနီးက မယ်ဆိုင်ချောင်းနှင့် မယ်ဟောင်ချောင်းတွင် Fix Boundary သတ်မှတ်ထားပါကြောင်း၊ ဘင်္ဂလားဒေ့ရှ် နှင့် တိုင်းတာရာတွင် ကုန်းနယ်နိမိတ် ၁၂၈.၅ မိုင်နှင့် နတ်မြစ်အတိုင်း ရေနယ်နိမိတ်က ၃၉.၈ မိုင် ဖြစ်ပါကြောင်း၊ နတ်မြစ်အတိုင်းကို ရေနက်စီးချောင်းဟုခေါ်သည့်အတွက် သဲဝက်သတ်မှတ် ထားပါကြောင်း၊ သဲဝက်၏အရှေ့ကို မိမိတို့ပိုင်ပါကြောင်း၊ ဘင်္ဂလားဒေ့ရှ်နိုင်ငံက ရှမ်းပြည်နယ်ခန့်သာ ကျယ်ပြီးလူဦးရေက သန်း ၁၆၀ ကျော်ရှိသည့်အတွက် Space Over Effect အရ ၎င်းတို့လူများ မြန်မာနိုင်ငံ၊ ရခိုင်ပြည်နယ်ဘက်စိမ်‌့ဝင်သည့် သဘာဝတရားကြီးက မဆန်းပါကြောင်း၊  ၎င်းတို့နှင့် နယ်နိမိတ်ထိစပ်နေသော အိန္ဒိယဘက်ကို စိမ့်ဝင်မှုမရှိနိုင်မည်လားဟု မေးစရာရှိပါကြောင်း၊ သို့သော်လည်း အိန္ဒိယဘက်က နယ်နိမိတ်ကြောင်းတစ်လျှောက် ခြံစည်းရိုးကာရံထားပြီး တပ်ရင်း ၃၀၀ ကျော်ဖြင့် စောင်‌့ကြပ်နေသည့်အတွက် အခွင်‌့မသာပါကြောင်း၊ မိမိတို့ဘက်ကို စိမ့်ဝင်နေသည်ကို ကာကွယ်ရန် တပ်မတော်အစိုးရလက်ထက်တွင် ဘင်္ဂလားဒေ့ရှ်နှင့် မြန်မာကြား ခြံစည်းရိုးကာရံသည့် လုပ်ငန်းကိုစတင်ခဲ့ပါကြောင်း၊ ရေထဲတွင် နယ်နိမိတ်မှတ်တိုင်စိုက်၍ မရသည့်အတွက် ကမ်းစပ် ကနေပြီး ၁၅ ကိုက်ခန့်ကွာသည့်နေရာတွင် မြေပြင်အနေအထားအရ ဆောက်လုပ်ရပါကြောင်း၊ ကုန်းပေါ်တွင်လည်း အလားတူ ခြံစည်းရိုးမကာရံထားသည့်နေရာက မိုင် ၃၀ ခန့် ကျန်ရှိနေပါကြောင်း၊ ကာရံပြီးသော်လည်း မလုံခြုံသည့်အတွက် လူသာမက ကျွဲ၊ နွားပါ ခိုးသွင်း၊ ခိုးထုတ် လုပ်နေပါကြောင်း၊ ၂၀၁၇ ခုနှစ် သြဂုတ်လတွင် ဖြစ်ပေါ်ခဲ့သော ARSA အကြမ်းဖက်တို့၏ စခန်း ၃၀ ကျော် တိုက်ခိုက်မှု နောက်ပိုင်းတွင် ၎င်းတို့နောက်ကွယ်က လက်မည်းကြီးများ၏ အစီအမံအတိုင်း တစ်ဘက်နိုင်ငံကို လူသိန်းချီ ထွက်ခွာသွားပါကြောင်း၊ တာဝန်ရှိသူများက မသွားရန်တားဆီးသော်လည်း လက်မည်းကြီး၏ အမိန့်အတိုင်း တစ်သွေမတိမ်းလိုက်နာခဲ့ကြပါကြောင်း၊ မိမိတို့ကစိစစ်ပြီး ပြန်လည်လက်ခံရန် ဆောင်ရွက်နေသည့်ကာလတွင် တစ်ဖက်က ပြဿနာပေါ်ပြဿနာဆင်‌့ပြီး တက်လာအောင် အကွက်ကျကျစီမံလာပါကြောင်း၊ နှစ်နိုင်ငံနယ်စပ်အဆောက်အဦ မဆောက်ရ၊ လူမနေရဆိုသည့် နေရာတွင် လူအင်အား ၆၀၀၀ ခန့်လာရောက်ပြီး အခြေချနေထိုင်ပါကြောင်း၊ မြန်မာ၊ ဘင်္ဂလားဒေ့ရှ် ခရိုင်အဆင်‌့နယ်စပ် အာဏာပိုင်များအဖွဲ့တွေ့ဆုံ ကွင်းဆင်းကြည်‌့ရှုဆိုသော သတင်းစာတွင် နယ်နိမိတ်စာချုပ်တွင် မပါဝင်သော အသုံးအနှုန်းဖြစ်သည့် Zero Line တွင် ဘင်္ဂါလီများက နေထိုင်ကြသည်ဟု မြန်မာ့အလင်းသတင်းစာက ၂၁-၂-၂၀၁၈ ရက်နေ့က အတိအလင်း ရေးသား ထားသည့်အပြင် Zero Line Area, No Man Land ဟုလည်း သုံးနှုန်း ထားပါကြောင်း၊ နှစ်နိုင်ငံအကြား ချုပ်ဆိုသော နယ်နိမိတ်စာချုပ်ပါ စကားလုံးအသုံးအနှုန်းများကိုသာ သုံးနှုန်းကြရန် လိုအပ်ပါကြောင်း၊ အလွယ်သုံး၍ မရပါကြောင်း၊ ယခုကဲ့သို့သုံးနှုန်းသည်မှာ Revocation ဝင်နိုင်ပါကြောင်း၊ အဓိကအနေဖြင့် No Man Land အသုံးအနှုန်းဖြစ်ပါကြောင်း၊ လူမနေရနယ်မြေ၊ လတ်တလော သူမပိုင်၊ ကိုယ်မပိုင်အနေအထားကို ဖော်ပြခြင်းဖြစ်ပါကြောင်း၊ မြန်မာနှင့်ထိုင်း အကြားတွင် ကော့သောင်းဘက်က ကျွန်းသုံးကျွန်းနှင့် မြဝတီကရေလက်ကျွန်းတို့ကို နှစ်နိုင်ငံ သဘောတူညီချက်အရ No Man Land အဖြစ် သတ်မှတ်ထားသည်မှလွဲပြီး မည်သည့်နိုင်ငံနှင့်မျှ No Man Land သတ်မှတ်မထားပါကြောင်း၊ အမှန်တကယ် ဘင်္ဂါလီများယခုနေသည့်နေရာသည် များသောအားဖြင့် မိမိတို့ပိုင်သော Boundary Line နှင့် ခြံစည်းရိုးအကြားနယ်မြေဖြစ်ပြီး မိမိတို့က ပိုင်သည်ကို No Man Land ဟုခေါ်သည်မှာ ကိုယ့်နယ်မြေကို သူများပေးလိုက်သည့်သဘော သက်ရောက်နေပါကြောင်း၊ ၎င်းကိစ္စကို Zero Line ဆိုပြီး Private Media ၊ Facebook တို့တွင် ရေးသားတင်ပြခဲ့ဖူးပါကြောင်း၊

နောက်ပိုင်းတွင် ပြန်ကြားရေးဝန်ကြီးဌာနက Zero Line စကားလုံးကို မသုံးနှုန်းဘဲ Media များ ကိုလည်း မသုံးရန်အတွက် လမ်းညွှန်သည်ကို တွေ့ရသည့်အတွက် ဝမ်းသာပါကြောင်း၊ မိမိတို့က အစိုးရအမှားများကို ထောက်ပြရာတွင် အပျက်သဘောမဟုတ်ဘဲ အပြုသဘောဆောင်ပြီး အမျိုးသား အကျိုးစီးပွားကို ရှေးရှု၍ အပင်ပန်းခံဆောင်ရွက်နေကြသည်ကို အားလုံးနားလည်ကြရန် လိုအပ်ပါကြောင်း၊ နှစ်နိုင်ငံနယ်နိမိတ်ကြောင်းအနီး လူမနေရသည့်နေရာတွင် ယခုချိန်ထိ အချို့က ဆက်ရှိနေပါကြောင်း၊ ဘန်ကာပါ‌တည်ဆောက်ထားသည်ဟု သိရပါကြောင်း၊ တပ်ရင်းမှူးအဆင်‌့ အလံတင် အစည်းအဝေးတွင်လည်း အဆိုပါကိစ္စများ ဆွေးနွေးသကဲ့သို့ ဝန်ကြီးဦးကျော်တင်က တစ်ကြိမ်၊ ဝန်ကြီးဦးသာထွန်းကတစ်ကြိမ် ဘင်္ဂလားဒေ့ရှ်သံအမတ်ကြီးကို ခေါ်ယူပြီးပြောကြား သော်လည်း ဖယ်ရှားခြင်းမရှိသေးသည်ကို သိရပါကြောင်း၊ လူ၊ အဆောက်အဦများ၊ ဘန်ကာများ တားမြစ်နေရာက ပျောက်ကွယ်သွားအောင် သံတမန်နည်းလမ်းကို အသုံးပြုပြီး ကြိုးပမ်းဆောင်ရွက် ကြရန်လိုအပ်ပါကြောင်း၊ နိဂုံးချုပ်အားဖြင့် မည်သည်‌့အတွက်ကြောင်‌့ မိမိတို့အတွက် အကျိုးမရှိ ရုံသာမက အကျိုးပါယုတ်လျော့စေမည့် Zero Line, Zero Line Area, No Man Land စကားလုံးများ သုံးစွဲခဲ့သည်ကို ရှင်းပြပေးပါရန်နှင့် အဆိုပါနယ်စပ်မျဉ်းအနီးတွင် နေထိုင်သူများမရှိစေရေးအတွက် မည်ကဲ့သို့ ဆက်လက်ဆောင်ရွက်သွားမည်ကို သိရှိလိုပါကြောင်း မေးမြန်းပါသည်။