လေးစားရပါသောပြည်သူ့လွှတ်တော်ဥက္ကဋ္ဌကြီး နှင့် ပြည်သူ့လွှတ်တော်ကိုယ်စားလှယ်များ ကြွရောက်လာသော ပြည်ထောင်စုဝန်ကြီးများ အားလုံးကို မင်္ဂလာပါလို့ နှုတ်ခွန်းဆက်သဂါရဝပြုအပ်ပါတယ်။ ကျွန်တော်ကတော့ စစ်ကိုင်းတိုင်းဒေသကြီး၊ မြင်းမူမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဇော်ဝင်းအောင် ဖြစ်ပါတယ်။ ကျွန်တော့် အနေနဲ့ လျှပ်စစ်ဓာတ်အားခွဲဝေသုံးစွဲ ကွန်ရက်စနစ်နဲ့ပတ်သက်ပြီး မေးမြန်းလိုခြင်းဖြစ်ပါတယ်။ လေးစားရပါသော ပြည်သူ့လွှတ်တော်ဥက္ကဋ္ဌကြီးခင်ဗျား။ စစ်ကိုင်းတိုင်းဒေသကြီး၊ စစ်ကိုင်းခရိုင်၊ မြင်းမူမြို့သို့ ဆက်သွယ်ပေးထားသော ၃၃ ကေဗွီ လျှပ်စစ်ဓာတ်အားလိုင်းဟာ စစ်ကိုင်းခရိုင်၊ ကန်တလူအနီးမှာ တည်ဆောက်ထားတဲ့ အုန်းတောဓာတ်အားခွဲရုံနဲ့ ၂၆ မိုင်ကွာဝေးပါတယ်။ အဆိုပါ ၃၃ ကေဗွီ လျှပ်စစ်ဓာတ်အားလိုင်းမှ ကန်တလူဘုရား၊ ရွှေတောင်လမ်းဖြတ်ဂိတ်၊ အမှတ် ၇၂ သံချပ်ကာ စစ်ဆင်ရေးနှင့် ကွပ်ကဲမှုတပ်မဌာနချုပ်၊ စစ်ကိုင်းမြို့နယ်အတွင်းရှိ ကျေးရွာ ၆ ရွာ၊ မြင်းမူမြို့နယ် အတွင်းရှိ ကျေးရွာ ၂ ရွာ၊ စုစုပေါင်း ကျေးရွာ ၈ ရွာအား လျှပ်စစ်ဓာတ်အားပေးပြီးမှ မြင်းမူမြို့သို့ လျှပ်စစ်ဓာတ်အား ရောက်ရှိဖြန့်ဖြူးပေးလျက်ရှိကြောင်း သိရှိရပါတယ်။ မြင်းမူမြို့သို့ ရောက်ရှိလာတဲ့ လျှပ်စစ်ဓာတ်အားကို မြင်းမူမြို့မှာရှိတဲ့ ၃၃/ ၁၁ ကေဗွီ  ၅၀၀၀ ကေဗွီအေ၊ ၅ အမ်ဗွီအေ လျှပ်စစ်ဓာတ်အားခွဲရုံမှ မြင်းမူမြို့အတွင်း ၁၁ ကေဗွီလိုင်း နှစ်ဖီဒါ၊ မြောင်မြို့သို့ တစ်ဖီဒါနှင့် မြင်းမူမြို့အတွင်းမှာရှိတဲ့  ဝမ်းမြစ်ကျေးရွာနဲ့ အာလက်ကဝကျေးရွာများသို့ လျှပ်စစ်ဓာတ်အားဖြန့်ဖြူး ပေးထားလျက်ရှိပါတယ်။ ပြည်သူ့လွှတ်တော်ဥက္ကဋ္ဌကြီးခင်ဗျား။ စစ်ကိုင်းခရိုင်၊ ကန်တလူအနီးရှိ အုန်းတောဓာတ်အားခွဲရုံမှ မြင်းမူမြို့သို့ လျှပ်စစ်ဓာတ်အားပေးပို့ဖြန့်ဖြူးရာမှာ လျှပ်စစ်ဓာတ်အားလိုင်း ချို့ယွင်း၍သော်လည်းကောင်း၊သဘာဝဘေးအန္တရာယ်ကြောင့်သော်လည်းကောင်း၊ လျှပ်စစ်ဓာတ်အား ရယူသုံးစွဲသော ကျေးရွာတစ်ရွာမှသော်လည်းကောင်း၊ နေရာတစ်နေရာမှသော်လည်းကောင်း ဓာတ်အားချို့ယွင်းမှုဖြစ်ခဲ့လျှင် လျှပ်စစ်ဓာတ်အားလိုင်း ပြတ်တောက်ခဲ့ရပါတယ်။ ပြတ်တောက် သွားသည့် ဓာတ်အားလိုင်းပြုပြင်ခြင်း လုပ်ငန်းများဆောင်ရွက်ရာမှာလည်း တစ်ခါတစ်ရံမှာ နှစ်ရက် သို့မဟုတ် သုံးရက် ကြာမြင့်ခဲ့ရပါတယ်။ လျှပ်စစ်ဓာတ်အားလိုင်း ပြတ်တောက်ပါက အချိန်တိုအတွင်း လျှပ်စစ်ဓာတ်အား အမြန်ပြန်လည်ရရှိရန်အတွက် မြင်းမူမြို့နှင့် မိုင် ၂၀ သာ ဝေးကွာတဲ့ မုံရွာခရိုင်၊ ချောင်းဦးမြို့မှာရှိတဲ့ ၃၃ ကေဗွီ လျှပ်စစ်ဓာတ်အားခွဲရုံမှ လျှပ်စစ်ဓာတ်အားလိုင်းအား ချိတ်ဆက် အသုံးပြုမည်ဆိုပါလျှင် လျှပ်စစ်ဓာတ်အား အဆက်မပြတ်ရရှိပြီး မြင်းမူမြို့နဲ့ မြောင်မြို့တို့မှာ စက်ရုံ၊ အလုပ်ရုံများ တည်ဆောက်နိုင်မှု အခြေအနေရှိလာနိုင်သလို ဒေသအတွင်းမှာရှိတဲ့ အိမ်တွင်းစက်မှု လက်မှုလုပ်ငန်းများလည်း လုပ်ကိုင်နိုင်ကြမှာဖြစ်လို့ ပြည်သူများဟာလည်း စိတ်ဝင်စားလျက်ရှိကြ ပါတယ်။ သို့ပါ၍ စစ်ကိုင်းခရိုင်၊ မြင်းမူမြို့နှင့် မုံရွာခရိုင်၊ ချောင်းဦးမြို့တို့မှ ၃၃ ကေဗွီ လျှပ်စစ် ဓာတ်အားလိုင်းအား လျှပ်စစ်ဓာတ်အားခွဲဝေသုံးစွဲကွန်ရက်စနစ် ချိတ်ဆက်တည်ဆောက်ပေးနိုင်ခြင်းရှိ၊ မရှိကို မေးမြန်းထားပါသည် ။