လေးစားရပါသော ပြည်သူ့လွှတ်တော်ဥက္ကဋ္ဌကြီးနှင့်  ဖိတ်ကြားထားသော ပြည်ထောင်စုဝန်ကြီးများ၊ ပြည်သူ့လွှတ်တော်ကိုယ်စားလှယ်များနှင့် အထူးဖိတ် ကြားထားသော ဧည့်သည်တော်များအားလုံးကို မင်္ဂလာပါလို့ နှုတ်ခွန်းဆက်သပါတယ်။ ကျွန်တော် ကတော့ နောင်မွန်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဂျီဖုန်ဆားရ် ဖြစ်ပါတယ်။ ဥက္ကဋ္ဌကြီးခင်ဗျား။ နောင်မွန်းမြို့နယ်ဟာ ကချင်ပြည်နယ်ရဲ့ မြောက်ဘက်စွန်းမှာတည်ရှိပြီးတော့ လမ်း ပန်းဆက်သွယ်ရေးလည်းပဲ ခက်ခဲနေသေးတဲ့ မြို့နယ်ဖြစ်ပါတယ်။ ဒါပေမယ့်လို့ ၂၀၀၉-၂၀၁၀ မှာ မြန်မာ့ဆက်သွယ်ရေးလုပ်ငန်းများနဲ့ မိုဘိုင်းဆက်သွယ်ရေးစနစ်တပ်ဆင်ထားပေးခဲ့တဲ့အတွက်ကြောင့် ဆက်သွယ်ရေးလုပ်ငန်းမှာ များစွာပဲ အဆင်ပြေလာခဲ့ပါတယ်။ နောင်မွန်းမြို့နယ်မှ ပန်နန်းဒင်မြို့နယ်ခွဲ၊ ခေါင်လန်ဖူးမြို့နယ်၊ နောင်မွန်းမြို့နယ် မြို့နယ် ၃ မြို့နယ်ရဲ့ နိုင်ငံ့ဝန်ထမ်းများရဲ့ လစာနှင့်စရိတ်ကို ထုတ်ပေးနိုင်တဲ့ဘဏ်၊ မြန်မာ့စီးပွားရေးဘဏ်ရှိပါတယ်။ ငွေတိုက်လည်းပဲရှိပါတယ်။ ဒါပေမယ့်လို့ ငွေလွှဲငွေပို့ကိစ္စများကို ဆောင်ရွက်တဲ့နေရာမှာ အမြန်ချောစာပို့တဲ့လုပ်ငန်းပုံစံနဲ့ပဲ သွားနေကြတဲ့ အတွက်ကြောင့် မလိုလားအပ်ဘဲ နှောင့်နှေးကြန့်ကြာမှုများအများကြီးရှိပါတယ်။ ဒါကြောင့် နောင်မွန်း မြို့နယ်မှာ မိုဘိုင်းဆက်သွယ်ရေးစနစ်လည်းပဲရှိနေပြီဖြစ်တဲ့အတွက်ကြောင့် နောင်မွန်းမြို့နယ်မှာရှိတဲ့ မြန်မာ့စီးပွားရေးဘဏ်မှ Fax နဲ့ အမြန်ငွေပို့ငွေလွှဲစနစ်ထားရှိပေးရန် သက်ဆိုင်ရာမှ အစီအစဉ် ရှိ၊ မရှိ ဆိုတာကို သိရှိလိုပါ၍ လေးစားစွာမေးမြန်းထားပါသည် ။