လေးစားအပ်ပါသော ပြည်သူ့လွှတ်တော် ဥက္ကဋ္ဌကြီးနှင့် လွှတ်တော်ကိုယ်စားလှယ်များ၊ ဖိတ်ကြားထားသည်‌့ ဧည့်သည်တော်များ၊ ပြည်ထောင်စု ဝန်ကြီးများ၊ ဒုတိယဝန်ကြီးများအား မင်္ဂလာပါလို့ ကျွန်မ နှုတ်ဆက်ပါတယ်။ ကျွန်မကတော့ ရေနံချောင်းမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်ဝင်းမော်ထွန်း ဖြစ်ပါတယ်။ ကျွန်မ ဒီနေ့ မေးမယ့်မေးခွန်းကတော့ နိုင်ငံဖွံ့ဖြိုးတိုးတက်ရေးမှာ အရေးပါတဲ့ပြည်တွင်းစက်မှုလုပ်ငန်းများကို နိုင်ငံတော်အစိုးရမှ မည်ကဲ့သို့ပြောင်းလဲပုံဖော်ကူညီဆောင်ရွက်မည်ကို သိရှိလို၍ မေးမြန်းခြင်း ဖြစ်ပါတယ်။ ဥက္ကဋ္ဌကြီးရှင့်။ ကျွန်မအနေနဲ့ ဒီမေးခွန်းကိုမေးရခြင်းမှာ ပြည်တွင်းစက်မှုလုပ်ငန်းရှင် တစ်ယောက်အနေနဲ့သော်လည်းကောင်း၊ အခြားစက်မှုလုပ်ငန်းရှင်တွေအတွက်ပါ ထိရောက်သော ကူညီမှု၊ ကြိုတင်ပြင်ဆင်မှုရရှိလိမ့်မယ်လို့ယူဆမိပါတယ်။ အခု ကျွန်မတို့ စက်မှုလုပ်ငန်းအတော် များများဟာ ဆိုင်းငံ့နေတဲ့အ‌ြခေအနေမှာရှိပါတယ်။ နောက်ထပ် စက်မှုလုပ်ငန်းထူထောင်ဖို့ ဆိုလျှင်လည်း ဘယ်လိုများကြိုတင်ပြင်ဆင်ရမလဲလို့ ကျွန်မသိရှိလိုပါတယ်။ ဒါကြောင်‌့ ဒီမေးခွန်းကို မေးရခြင်း ဖြစ်ပါတယ်။ ကျွန်မ အနည်းငယ်တော့ရှင်းလင်းတင်ပြပါရစေ။ ဈေးကွက်စီးပွားရေးစနစ် တစ်ခုမှာ ပုဂ္ဂလိကကဏ္ဍဖြစ်တဲ့ စက်မှုလုပ်ငန်းတွေ၊ စီးပွားရေးလုပ်ငန်းရှင်တွေပါဝင်ပြီးတော့ အသေးစား၊ အလတ်စားမှအစ အမြဲပါဝင်နေတာကိုတွေ့ရပါတယ်။ စီးပွားရေးလုပ်ဆောင်ချက် တွေမှာလည်း အားကောင်းလာဖို့ ပုဂ္ဂလိကကဏ္ဍကို အားပေးမှုတော့ရှိရပါမယ်။ ကျွန်မ တစ်ခုတင်ပြ လိုပါတယ်။ အိမ်နီးချင်းနိုင်ငံကြီးတွေမှာ သူတို့ရဲ့ဈေးကွက်ကို ပိုမိုဖွင့်လှစ်နိုင်ဖို့ ကမ္ဘာ့စီးပွားရေး အခွင့်အလမ်းသစ်များ ကမ္ဘာကို စီးပွားရေးအခွင့်အလမ်းသစ်များနဲ့ကမ်းလှမ်းပြီး ဆွဲဆောင်နေတာ များစွာရှိပါတယ်။ ၎င်းတို့ရဲ့ဈေးကွက်ပိုဖွင့်လေလေ၊ သယံဇာတပေါကြွယ်ဝတဲ့ ကျွန်မတို့လိုနိုင်ငံ အတွက် စိုးရိမ်စိတ်ကြီးရပါတယ်။ ကျွန်မတို့နိုင်ငံအနေဖြင့် စက်မှုလုပ်ငန်းကို ဖွံ့ဖြိုးတိုးတက်အောင် မဆောင်ရွက်နိုင်ဘူး။ ဆောင်ရွက်မှုနှေးကွေးနေမယ်ဆိုရင် ကျွန်မတို့ရဲ့ သယံဇာတကုန်ကြမ်းဟာ ကျွန်မတို့ ပြည်တွင်းလုပ်ငန်းရှင်အတွက် လုပ်ငန်းများအတွက်မဟုတ်တော့ဘဲ အိမ်နီးချင်းနိုင်ငံများရဲ့ စက်မှုလုပ်ငန်းအတွက် သွင်းအားစုဖြစ်သွားနိုင်ပါတယ်။ ဆိုလိုတာကတော့ လယ်ယာ၊ သားငါး၊ သစ်တောထုတ်လုပ်မှုကဏ္ဍတွေရဲ့ ထွက်ကုန်အများစုဟာ ကုန်ကြမ်းပို့ကုန်အဖြစ်နဲ့သာ အိမ်နီးချင်း စက်မှုနိုင်ငံဆီကို အလုံးအရင်းဝင်ရောက်သွားနိုင်ပါတယ်။ တဖန်ပြန်ပြီးတော့ အိမ်နီးချင်းနိုင်ငံကြီး တွေက ပြန်လည်တင်ပို့လာလျှင် ကုန်ချောပစ္စည်းများကို ပြည်တွင်းဈေးကွက်မှာ ယှဉ်ပြိုင်မှုကျွန်မတို့ ထပ်မံခံစားရပါဦးမယ်။ ဒါကြောင့် ကုန်ကြမ်းများသာတင်ပို့နေရသဖြင့် ပို့ကုန်ဝင်ငွေနည်းပါးခြင်း၊ ဈေးသက်သာလွန်းသောကုန်ချောများ ပြန်လည်ဝင်ရောက်လာသဖြင့် တည်ရှိတဲ့ကျွန်မတို့ ပြည်တွင်း လုပ်ငန်းရှင်တွေရဲ့စီးပွားပျက်စီးလာနိုင်ပါတယ်။ လုပ်ငန်းသစ်များထူထောင်ရာမှာလည်း အင်မတန်ကို အခက်အခဲများပါတယ်။ လက်ရှိအ‌ြခေအနေမှတစ်ဆင့် ဆက်စပ်ပြီးတော့ စဉ်းစားလေလေ၊ တွေးတော လေလေ ပုဂ္ဂလိကစီးပွားရေးအဆောက်အဦတစ်ခုလုံးအတွက် ဆင့်ပွားဖြစ်ပေါ်လာမယ့် အခက်အခဲ များစွာရှိနေပါတယ်။ ဥက္ကဋ္ဌကြီးရှင့်။ အိမ်နီးချင်းနိုင်ငံကြီးများရဲ့ အနာဂတ်မည်သို့ပင်ရှိစေကာမူ ကျွန်မတို့နိုင်ငံမှာ လက်ရှိအခက်အခဲကြားက အခွင့်အလမ်းများကို မည်ကဲ့သို့ဆောင်ရွက်မည်ကို ကျွန်မသိလို၍ မေးမြန်းခြင်းဖြစ်ပါတယ်။ နိုင်ငံတော်အစိုးရရဲ့ စက်မှုဝန်ကြီးဌာန၊ စက်မှုလက်မှု ဖွံ့ဖြိုးတိုးတက်စေရေးအတွက် ရည်မှန်းချက်များစွာဖတ်ရှုခဲ့ရပါတယ်။ ကျွန်မ အချိန်ကိုငဲ့ညှာတဲ့အနေနဲ့ မတင်ပြတော့ပါဘူး။ အဓိကစက်မှုလုပ်ငန်းဖွံ့ဖြိုးတိုးတက်ဖို့အတွက် နိုင်ငံတော်ရဲ့ စီးပွားရေးဖွံ့ဖြိုး တိုးတက်ဖို့ဆိုရင်တော့ Economic Policy ကို စီးပွားရေးမူဝါဒ ပိုကောင်းဖို့တော့လိုလာပါတယ်။ စက်မှုလုပ်ငန်းဖွံ့ဖြိုးတိုးတက်ရေးအတွက် စီးပွားရေးအခင်းအကျင်းနဲ့ အနေအထား ဈေးကွက်ရဲ့ ဖြစ်မြောက်နိုင်စွမ်းအားလုံးကို သုံးသပ်ဖို့တော့လိုပါတယ်။ စီးပွားရေးဖြစ်မြောက်နိုင်စွမ်းနဲ့ ဈေးကွက်ရဲ့ ဖြစ်မြောက်နိုင်စွမ်းကို ကျယ်ပြန့်စွာသိဖို့လည်းလိုပါတယ်။ ကိုယ့်ပြည်တွင်းကလည်း စက်မှုထုတ်ကုန်ပိုင်း ကြီးထွားတိုးတက်ဖို့လိုပါတယ်။ ထုတ်ကုန်တစ်ခုချင်းစီမှာ Specialization ရှိရပါမယ်။ ဈေးကွက် ကျယ်ပြန့်ဖို့ဆိုရင် အာဆီယံနဲ့ရင်ပေါင်တန်းချင်တယ်။ ကမ္ဘာမှာထည်ဝါစွာ ရပ်တည်ချင်တယ် ဆိုရင်တော့ စက်မှုလက်မှုကဏ္ဍကိုမြှင့်တင်ပြီး Trade ကို ဦးဆောင်ရမယ်လို့ ကျွန်မထင်မြင်မိပါ တယ်။ စက်မှုလုပ်ငန်းဟာ အချိန်ယူတည်ဆောက်ရပါတယ်။ နည်းပညာ၊ စက်ကိရိယာ၊ ကုန်ကြမ်း၊ လျှပ်စစ်စတာတွေ ပြည့်စုံအောင်ကြိုတင်ဆောင်ရွက်ရပါတယ်။ ဒါ့အပြင် ကျွမ်းကျင်တဲ့လုပ်သား၊ ဈေးကွက်ရရှိမှု၊ ငွေပင်ငွေရင်းစိုက်ထုတ်မှု၊ စီမံခန့်ခွဲမှုကဏ္ဍများစွာပါဝင်ပါတယ်။ ကျွန်မတို့ စက်မှုကဏ္ဍမှာဆိုရင် အသေးစား၊ အလတ်စားကိုပဲ အတူပူးပေါင်းလုပ်ကိုင်ရပါတယ်။ အသေးစား၊ အလတ်စား ဖွံ့ဖြိုးတိုးတက်ဖို့အတွက်လည်းကောင်း၊ ငွေကြေးနဲ့ ဘဏ္ဍာရေးဆိုင်ရာမူဝါဒတွေ ကောင်းဖို့အတွက်လည်းကောင်း၊ တိုင်းရင်းသားလုပ်ငန်းရှင်တွေကို အကာအကွယ်ပေးဖို့အတွက် လည်းကောင်း၊ ချမှတ်ထားတဲ့မူဝါဒဟာ လုပ်သာကိုင်သာနဲ့ တည်ငြိမ်မှုရှိဖို့အတွက်လည်းကောင်း လုပ်ငန်းသစ်တစ်ခုစဖို့ခက်ခဲသလို ငွေပင်ငွေရင်း ရင်းနှီးစိုက်ထုတ်ဖို့လည်း သိပ်ခက်ပါတယ်။ ဒါကြောင့်မို့လို့ ပြည်တွင်းစက်မှုလုပ်ငန်းများဖွံ့ဖြိုးတိုးတက်စေရေးအတွက် နိုင်ငံတော်အစိုးရမှ မည်ကဲ့သို့ပြောင်းလဲပုံဖော်ကူညီဆောင်ရွက်ပေးနိုင်မည်ကိုသိရှိလိုပါ၍ ဤမေးခွန်းကို မေးထားပါသည် ။