မင်္ဂလာပါခင်ဗျား။ လေးစားအပ်ပါသော ပြည်သူ့ လွှတ်တော်ဥက္ကဋ္ဌကြီးနှင့် ပြည်သူ့လွှတ်တော်ကိုယ်စားလှယ်များအားလုံး ကိုယ်စိတ်နှစ်ဖြာ ကျန်းမာ၊ ချမ်းသာပါစေလို့ ဆုမွန်ကောင်းတောင်းရင်း ဂါရဝပြုအပ်ပါတယ်။ ကျွန်တော်ကတော့ ပုဇွန်တောင် မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးအောင်ဇင် ဖြစ်ပါတယ်။ လေးစားအပ်ပါသော ဥက္ကဋ္ဌကြီးခင်ဗျား။ လယ်ယာကဏ္ဍဖွံ့ဖြိုးတိုးတက်ရေးအတွက် သက်ဆိုင်ရာမှ အားထုတ်ကြိုးပမ်းလျက် ရှိသည်မှာ အားလုံးအသိပင်ဖြစ်ပါတယ်။ သို့သော်လည်း တောင်သူလယ်သမားများအဖို့ စိုက်စရိတ် မလုံလောက်မှုနှင့်လယ်ယာမြေသိမ်းယူမှုအချို့လည်း ရှိနေပါသေးတယ်။ ဖွဲ့စည်းပုံအခြေခံဥပဒေ  ပုဒ်မ ၃၇ ပုဒ်မခွဲ(က)အရ လယ်ယာမြေများကို နိုင်ငံတော်အတွက် အကျိုးရှိစေမည့်စီမံကိန်းလုပ်ငန်း များအတွက် သိမ်းယူခြင်းပြုလျှင်တောင် ထိုက်သင့်သော လျော်ကြေးများပေးလျက်ရှိသည်ကိုလည်း သိရှိရပါတယ်။ ထို့အပြင် လိုအပ်သည့် ဧရိယာမျှသာလျှင်လည်း သိမ်းယူကြောင်း သိရှိရပါတယ်။ နိုင်ငံတော်သမ္မတကြီးကလည်းပဲ ညွှန်ကြားချက်များဖြစ်သော နိုင်ငံတော်မှ စီမံကိန်းအတွက် သော်လည်းကောင်း၊ အခြားအကြောင်းအမျိုးမျိုးအတွက်သော်လည်းကောင်း မြေသိမ်းတဲ့အခါ သက်ဆိုင်ရာ မြေရှင်၊ လယ်ပိုင်ရှင်များနှင့်ကျေနပ်အောင်ညှိနှိုင်းပြီးမှ သိမ်းယူခြင်းပြုရန်ဖြစ်ကြောင်း ညွှန်ကြားထားပါတယ်။ သို့သော် အချို့ဒေသများမှာဆိုရင် ပုဂ္ဂလိက အကျိုးစီးပွားအလို့ငှာ လယ်ယာ ခြံမြေများကို သိမ်းယူရာတွင် အနည်းငယ်မျှသော ငွေကြေးကိုသာပေးသည်ကိုသာ သိရှိရပါတယ်။ ထိုဒေသများရှိ တောင်သူလယ်သမားများမှာလည်း အလုပ်လက်မဲ့ဘဝသို့ရောက်ခဲ့ရသည်ကို တွေ့ရှိနေရပါတယ်။ သိမ်းယူသူများကတော့ ထို‌ြမေများကို အကွက်ရိုက်ပြီး တန်ဖိုးကြီးကြီးဖြင့် ရောင်းချလျက်ရှိနေပါတယ်။ မျက်မြင်တွေ့ခဲ့ရသော နေရာမှာ ချောင်းသာရှိ တောင်ကတုံးကျေးရွာမှ ကျောက်မောင်နှမ ကမ်း‌ြခေတစ်လျှောက်ရှိ အုန်းခြံများကို သိမ်းရာတွင် အုန်းပင်ဖိုးသာပေးပြီး မြေဖိုးပါရှိခြင်းမရှိဘဲ၊ ၎င်းမြေများကို ဖြတ်ပိုင်း၍ သိမ်းယူသူတို့က တန်ဖိုးကြီးကြီးဖြင့် ပြန်လည် ရောင်းချနေသည်မှာ အသိမ်းခံရယူများအဖို့ ရင်နင့်ဖွယ်တွေ့ရှိရပါတယ်။ ပုဒ်မ ၂၃ ပုဒ်မခွဲ(က)အရ နိုင်ငံတော်သည် တောင်သူလယ်သမားများ၏ အခွင့်အရေးကို ကာကွယ်စောင့်ရှောက်ရန် လိုအပ်သည့် ဥပဒေများ ပြဋ္ဌာန်းဆောင်ရွက်မည်ဟု ပြဋ္ဌာန်းထားပါတယ်။ လေးစားအပ်သော ဥက္ကဋ္ဌကြီးခင်ဗျား။ လုပ်ငန်းရှင်များနှင့် လယ်သမားများပူးပေါင်း၍ ဧက ၁၀၀၀ကို ခေတ်မီစက်ကိရိယာများဖြင့် စက်မှုလယ်ယာစနစ်ကို ဒဂုံမြို့သစ်ဒေသ စိုက်ပျိုးရေးအထူးဇုန် (၁) နှင့် (၂) တွင် အကောင်အထည် ဖော်လျက်ရှိသည်ကိုလည်း သိရှိရပါတယ်။ ယင်းသို့ စက်မှုလယ်ယာစီမံကိန်းအဖြစ် လုပ်ကိုင်ခဲ့ သည်မှာ ၃ နှစ်ခန့် ကြာမြင့်ပြီး ဖြစ်ပါတယ်။ အဆိုပါ လယ်များကို နှစ် ၃၀ ဂရန် ချထား၍ စိုက်ပျိုးခွင့်ပြုမည်ဟုလည်း သိရပါတယ်။ သို့သော် လုပ်ကွက်ငယ်လယ်သမားအများစုအတွက် နှစ်ရှည်ဂရန်ချထား လုပ်ကိုင်ခွင့်ပါရှိခြင်းမရှိသည်ကိုတွေ့ရှိရပါတယ်။ သို့ဖြစ်ပါ၍ လယ်သမားများ ကိုယ်စား မေးမြန်းလိုသည်မှာ-
    (က)    ပုဂ္ဂလိကလုပ်ငန်းရှင်များ၏ အကျိုးငှာသိမ်းယူမှုများကို တောင်သူလယ်သမား များ၏အကျိုးငှာ မည်ကဲ့သို့ဆောင်ရွက်ပေးမည်ကိုသိရှိလိုပါတယ်။
    (ခ)    လယ်ယာစိုက်ပျိုးရေးနှင့်ဆည်‌ြမောင်းဝန်ကြီးဌာန၊ လယ်ယာစိုက်ပျိုးမှုအမှန်တကယ် လုပ်ကိုင်သူများကို နှစ် ၃၀ ရင်းနှီးလုပ်ကိုင်ခွင့်စနစ် ခွင့်ပြုသွားမည်ဟု ရှင်းလင်း ပြောကြားခဲ့သော်လည်း ကုမ္ပဏီကြီးများကသာ အဆိုပါအခွင့်အရေးကို ရရှိနေပြီး အဘယ်ကြောင့် ကွဲပြားသောခွင့်ပြုချက်များရှိနေသည်ကိုလည်းသိလိုပါတယ်။
    (ဂ)    အဆိုပါကုမ္ပဏီကြီးများ၏ စက်မှုလယ်ယာစိုက်ပျိုးရေးမှ တစ်ဧကထွက်နှုန်းတိုးမှု ရှိ၊ မရှိနှင့် မည်သို့သောဆန်မျိုးကို စိုက်ပျိုးထုတ်လုပ်၍ ပြည်ပသို့တင်ပို့ခြင်း ရှိ၊ မရှိကို မေးမြန်းထားပါသည် ။