ချစ်ခင်လေးစားအပ်ပါသော ပြည်သူ့လွှတ်တော် ဥက္ကဋ္ဌကြီး၊ ပြည်သူ့လွှတ်တော်ကိုယ်စားလှယ်များနှင့် ကြွရောက်လာကြတဲ့ ဧည့်သည်တော်အပေါင်း မင်္ဂလာအပေါင်းနှင့်ပြည့်စုံကြပါစေလို့ ဦးစွာပဏာမဆုတောင်းမေတ္တာပို့သအပ်ပါတယ်။ ကျွန်တော့် အနေနဲ့ ယနေ့တစ်နိုင်ငံလုံးရှိ ကျေးလက်ဒေသမှာကြုံတွေ့နေကြရတဲ့ ကျေးလက်မွေးမြူရေးနှင့် သားငါးထုတ်လုပ်မှုမှာအကျုံးဝင်တဲ့ အင်းများနဲ့ပတ်သက်တဲ့ကိစ္စ မေးမြန်းဆွေးနွေးခွင့်ပြုပါရန် တင်ပြအပ်ပါတယ်ခင်ဗျား။ ကျွန်တော်ကတော့ ပဲခူးတိုင်းဒေသကြီး၊ ကျောက်ကြီးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဉာဏ်ဆွေဝင်း ဖြစ်ပါတယ်။ ဒီနေ့နိုင်ငံတော်မှာရှိတဲ့ အင်းများကို ငွေကြေးချမ်းသာကြွယ်ဝတဲ့ပုဂ္ဂိုလ်များထံ လေလံစနစ်နဲ့ချပေးတဲ့အခါမှာ ဒီပုဂ္ဂိုလ်တွေဟာ ဒီအင်းကို လည်းမတွေ့ဖူးဘူး။ တချို့က ဒီဒေသမှာလည်းမနေဘဲနဲ့ ဒီအင်းတွေကိုလေလံဆွဲပြီးတော့ အကြောင်း အမျိုးမျိုးနှင့်ရရှိထားတဲ့အတွက် အဲဒီ အင်းပတ်ဝန်းကျင်မှာနေထိုင်တဲ့ပုဂ္ဂိုလ်တွေဟာ ဒီအင်းတွေကို ဈေးကြီးကြီးနှင့်ပေးပြီးတော့မှ လုပ်ကိုင်ရတဲ့အခြေအနေဖြစ်ပါတယ်။ ဒါကြောင့်လည်းပဲ ဒီကနေ့ ကျေးလက်သားငါးထုတ်လုပ်မှုဖွံ့ဖြိုးတိုးတက်ရေးနှင့်ပတ်သက်လို့ ဒီလုပ်ငန်းစဉ်တိုင်းဟာ ဒီလုပ်ရပ်ဟာ ဆိုလို့ရှိရင် သွားပြီးတော့ဆန့်ကျင်ဘက်ဖြစ်နေပါတယ်။ သားငါးဈေးနှုန်းကိုကြီးမားအောင်၊ ကြီးမြင့် အောင်လုပ်နေသလိုအခြေအနေရှိပါတယ်။ ဒါ့ကြောင့် အင်းတွေကို ငွေကြေးချမ်းသာကြွယ်ဝတဲ့ ပုဂ္ဂိုလ်များထံ လေလံစနစ်နဲ့ချထားပေးခြင်းမပြုတော့ဘဲနဲ့ အဲဒီအင်းပတ်ဝန်းကျင်မှာ အခြေချ နေထိုင်တဲ့ ရေလုပ်သားတွေဆီကိုလုပ်ပိုင်ခွင့်ပေးပြီးတော့ အင်းခွန်ကိုကြမ်းခင်းဈေးနဲ့ အရစ်ကျ ပေးချေတဲ့ စနစ်နဲ့လုပ်ကိုင်ခွင့်ပေးမယ်ဆိုရင် ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှု လျှော့ချရေးကိုလည်းပဲ လက်တွေ့အကောင်အထည်ဖော်ရာရောက်မှာဖြစ်ပါတယ်။ တစ်ဆက်တည်း မှာပဲ အင်းနဲ့တစ်ဆက်တစ်စပ်တည်းဖြစ်တဲ့ နွေစပါးစိုက်ပျိုးမှုကိုလည်း အဲဒီအင်းပတ်ဝန်းကျင်မှာရှိတဲ့ ကျေးရွာတွေမှာ တိုးတက်ဖွံ့ဖြိုးလာမယ်လို့ ဒီလိုတွေ့ရှိရပါတယ်။ ကျေးလက်ဒေသတွေမှာ ဟိုးရှေး ယခင်အခါတည်းက ချောင်း၊ မြောင်း၊ လျှိုမြောင်တွေနဲ့ လယ်ကြိုလယ်ကြားများမှာ ရေပေါ်ရေလျှံ သားငါးရှာဖွေစားသောက်ရေးလုပ်ငန်းကို လွတ်လပ်စွာရှာဖွေစားသောက်ခွင့်ပြုခဲ့ပါတယ်။ အခုအခါ မှာ ရေပေါ်ရေလျှံသားငါးရှာဖွေစားသောက်ရေးလုပ်ငန်းကို ခုနလိုပုဂ္ဂိုလ်တွေကို အင်းလေလံချထား ပေးတဲ့အတွက် သက်ဆိုင်ရာကိုအခွန်ဆောင်ပြီးမှသာ ရှာဖွေစားသောက်ရတဲ့အခြေအနေရှိပါတယ်။ ယခုအခါမှာ အင်းသူကြီးအများစုဟာ မိမိလယ်ကြိုလယ်ကြားမှာ သားငါးရှာဖွေစားသောက်တဲ့ တောင်သူလယ်သမားမိသားစုများကို အင်းအိုင်လက်စွဲဥပဒေတွေနဲ့ဖမ်းဆီးပြီးတော့ တရားရုံးတင် နေကြတဲ့အနေအထားများ တော်တော်များများဖြစ်ပေါ်နေတဲ့ အနေအထားရှိပါတယ်။ တစ်ဖက်က လည်းပဲ မွေးမြူရေးနှင့် ရေလုပ်ငန်းဝန်ကြီးဌာနရဲ့ ရှေ့လုပ်ငန်းစဉ်တစ်ခုမှာ ငါး၊ စပါးကို မွေးရမယ် ဆိုတဲ့အခါမှာ အဲဒီ လယ်ကြိုလယ်ကြားမှာရှိတဲ့သားငါးများကို သမားရိုးကျရှာဖွေစားသောက်တဲ့ တောင်သူလယ်သမားများရဲ့ သမားရိုးကျလုပ်ငန်းစဉ်နဲ့ ငါး၊ စပါးလုပ်ငန်းစဉ်ဟာလည်းပဲသွားပြီးတော့ ဆန့်ကျင်ဘက်ဖြစ်နေတဲ့အခြေအနေရှိပါတယ်။
ဥက္ကဋ္ဌကြီးခင်ဗျား။ ဒါကြောင့် မေးခွန်း ၂ ခုကို မေးခွင့်ပြုပါခင်ဗျား။ မေးခွန်းမှာ အင်း နယ်နိမိတ်ဝန်းကျင်မှာ အခြေချနေထိုင်လျက်ရှိတဲ့ သားငါးရှာဖွေစားသောက်တဲ့ ရေလုပ်သားများကို အင်းခွန်ကိုကြမ်းခင်းဈေးနှင့် အရစ်ကျချထားလုပ်ကိုင်ခွင့်ပြုရန် အစီအစဉ်ရှိ၊ မရှိ သိရှိလိုပါတယ် ခင်ဗျား။ နောက်မေးခွန်းတစ်ခုကတော့ ကျေးလက်ဒေသမှာ ရေပေါ်ရေလျှံသားငါးရှာဖွေစားသောက် တဲ့နေရာမှာ အခွန်အခမပေးဆောင်ရဘဲ ရှေးယခင်ကကဲ့သို့ လွတ်လပ်စွာရှာဖွေစားသောက်ခွင့်ပြုရန် အစီအစဉ်ရှိ၊ မရှိ သိရှိလိုပါကြောင်း မေးမြန်းတင်ပြထားပါသည် ။