ကျိုင်းတုံမြို့ရှိ နောင်ခမ်းကန်သည် အမှတ်(၃)ရပ်ကွက် လေယာဉ်ကွင်းဘေးမှာတည်ရှိပြီး အကျယ်အားဖြင့် ခြောက်ဧကကျော် ကျယ်ဝန်းပါကြောင်း၊ ကန်အတွင်း သာသနာ့ဗိမာန်တော်နှင့် စေတီတစ်ဆူတည်ထားသည့် အတွက် မြို့ကျက်သရေဆောင် ကန်တစ်ကန်လည်းဖြစ်ပါကြောင်း၊ ကျိုင်းတုံမြို့သို့ လေယာဉ်လမ်းကြောင်းမှ ရောက်ရှိလာသော ပြည်တွင်းပြည်ပဧည့်သည်များ၊ နိုင်ငံတော်အကြီးအကဲများ၏ လမ်းကြောင်းများအားလုံး နှင့် မိုင်းလားသို့သွားရောက်မည့်ဧည့်သည်တော် များသည် ၎င်းကန်အားမဖြစ်မနေ ဖြတ်သန်းရမည်ဖြစ်ပါကြောင်း၊ ၎င်းကန်အနီးနှင့် လေယာဉ်ကွင်းလမ်း AH-3 လမ်းပေါ်တွင် နိုင်ငံခြားသားများလာရောက်တည်းခိုနိုင်သည့် Motel များရှိပြီး ကျိုင်းတုံမြို့သို့ရောက်ရှိ လာသော ပြည်တွင်းပြည်ပဧည့်သည်တော်များသည် သာသနာ့ဗိမာန် တော်သို့ လာရောက်လေ့လာ မှတ်တမ်းတင် ဓာတ်ပုံရိုက်ကူးလေ့ရှိသောနေရာလည်းဖြစ်ပါကြောင်း၊ ယခုအခါ နောင်ခမ်းကန်ပတ်လည်နှင့် သာသနာ့ဗိမာန်ပတ်လည်ရှိ မြေသားတာပေါင်များ ပဲ့ကျခြင်းများကြောင့် အောက်ခြေကမ်းပါးများပြိုကျခြင်း နှင့်ကွန်ကရစ်လူသွားလမ်းများပဲ့ကျခြင်းများဖြစ်ပေါ်ပြီး ကန်၏အလှကို ပျက်စီးနေပါကြောင်း၊ ထို့ကြောင့် ကျိုင်းတုံမြို့၏ကျက်သရေဆောင် နောင်ခမ်းကန် ရေရှည်တည်တံ့ခိုင်မြဲ နိုင်ရေးအတွက် ကန်ပတ်ပတ်လည် ကျောက်စီမြေထိန်းနံရံပြုလုပ်ခြင်းနှင့် ကန်ပတ်လည် ကွန်ကရစ်လမ်း ခင်းခြင်းဆောင်ရွက်မည်ဆိုပါက ကန်ပက်လည်ကို ကျောက်စီမြေထိန်းနံရံပြုလုပ်ခြင်းလုပ်ငန်းများသည် ပေ အရှည် အားဖြင့်  ၂၈၅၀ ပေရှိပြီး ကုန်ကျမည့်ခန့်မှန်းငွေ ၁၉၇၂ သိန်း၊ ကန်ပက်လည်ကွန်ကရစ် ခင်းခြင်း လုပ်ငန်း (၁၀၇၅ ပေx ၁၀ ပေ)နှင့် (၅၂၅ ပေx ၁၄ ပေ)အတွက် ခန့်မှန်းကုန်ကျငွေကျပ် ၅၅၈ သိန်း၊ စုစုပေါင်းခန့်မှန်းကုန်ကျငွေ ကျပ် ၂၅၃၀ သိန်း ကုန်ကျမည်ဖြစ်ပါကြောင်း၊ သို့ဖြစ်ပါ၍ ၎င်းကုန်ကျငွေများအား ပြည်ထောင်စုဘဏ္ဍာရန်ပုံငွေမှ ကူညီပံံ့ပိုးဆောင်ရွက်ပေးနိုင်ခြင်းရှိ/မရှိကို သိလိုပါကြောင်းဖြင့် မေးမြန်းပါသည်။