အိမ်နီးချင်းနိုင်ငံများတွင် မြို့ပြလူနေမှုသည် တစ်နေ့တခြားတိုးတက်လာသည်နှင့်အမျှ Living Standard သည်လည်း မြင့်လာသည့်အတွက် ကားများအသုံးပြုမှု ပိုမိုများပြားလာပါကြောင်း၊ အသုံးပြုလာသည့်အတွက် အိမ်နီးချင်းနိုင်ငံများမှာ ကားကျပ်တည်းမှုကို နှစ်ထပ်လမ်း၊ အမြန်လမ်း Inner Ring Road၊ Outer Ring Road တို့ဖြင့် ဖြေရှင်းနေသည်ကို တွေ့ရှိရပါကြောင်း၊ ထို့ကြောင့် ယာဉ်ကြောကျပ်တည်းမှု လျော့ပါးစေရန် အမြန်လမ်းနှင့် ရိုးရိုးလမ်းဟုပိုင်းခြားပြီး ဆက်သွယ် တည်ဆောက် ထားရှိပါကြောင်း၊ လမ်းဆုံလမ်းခွများတွင်လည်း ယာဉ်ကျပ်တည်းမှု မရှိစေရန် တံတားများဖြင့် တည်ဆောက်ပြီး လမ်းများကို တည်ဆောက်ထားခြင်း ဖြစ်ပါကြောင်း၊ ထို့ကြောင့် မေးခွန်းမေးမြန်းသည်မှာ ရန်ကုန်တိုင်းဒေသကြီးအတွင်း ပြည်သူလူထုများ သွားလာမှုအဆင်ပြေရန်နှင့် ကားကျပ်တည်းမှုများ လျော့ပါးစေရန်အတွက် ဆောက်လုပ်ရေးဝန်ကြီးဌာနအနေဖြင့် Inner Ring Road ပြုလုပ်ရန် အစီအစဉ်ရှိသည်ကို သိရှိရပါကြောင်း၊ Inner Ring Road ကို မည်ကဲ့သို့ အစီအမံချပြီး လုပ်ဆောင်နေပါသနည်းနှင့် မည်သည့်အချိန်တွင်စမည်နည်း၊ နောက်ပြီး မည်သည့်အချိန်တွင် ပြီးဆုံးအောင်လုပ်မည်နည်း၊ တည်ဆောက်ပါကလည်းခိုင်ခံ့ပြီး အရည်အသွေး ကောင်းမွန်သော လမ်းမများဖြစ်စေရန် မည်ကဲ့သို့စီမံဆောက်လုပ်နေသည်ကို သိရှိလိုပါကြောင်း မေးမြန်းပါသည်။