(ခ)-၂၀၁၇-၂၀၁၈ ခုနှစ်၌ ကျင်းပခဲ့သည်‌့ ရပ်ကွက် သို့မဟုတ် ကျေးရွာအုပ်စုအဆင့် အုပ်ချုပ်ရေးမှူးများ ရွေးချယ်တင်မြှောက်ပွဲများတွင် မည်သည့်ငွေစာရင်းခေါင်းစဉ်ဖြင့် စီစဉ်ဆောင်ရွက်ခဲ့ပါသနည်း၊ နောင်တွင် ကျင်းပမည့် ရပ်ကွက် သို့မဟုတ် ကျေးရွာအုပ်စု ရွေးချယ်ပွဲများတွင် အဆင်ပြေစွာ ကျင်းပဆောင်ရွက်သွားနိုင်ရန် ဘဏ္ဍာငွေစာရင်းခေါင်းစဉ် သီးသန့်ခွဲဝေချမှတ်ပေးရန် အစီအစဉ် ရှိ/မရှိနှင့် သက်ဆိုင်ရာကျေးရွာတာဝန်ခံများကိုလည်း ချီးမြှင့်ထောက်ပံ့ငွေ သတ်မှတ်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။

မိမိတို့နိုင်ငံသည် ဒီမိုကရေစီလမ်းကြောင်းပေါ်သို့ ရောက်ရှိနေပြီဖြစ်သဖြင့် ဒီမိုကရေစီလမ်းစဉ်အရ အများပြည်သူ ပါဝင်သော ရွေးကောက်တင်မြှောက်ပွဲများသည် အဓိကကျသော အခန်းကဏ္ဍ၌ပါဝင်လာပြီး အဆင့်ဆင့်သော ရွေးချယ်တင်မြှောက်ပွဲနှင့် ရွေးကောက်ပွဲများကို လိုအပ်လျှင် လိုအပ်သကဲ့သို့ ကျင်းပဆောင်ရွက် သွားနေရမည် ဖြစ်ပါကြောင်း၊ ၂၀၁၇ ခုနှစ် ဒီဇင်ဘာလနှင့် ၂၀၁၈ ခုနှစ် ဇန်နဝါရီလအတွင်း အောက်ခြေအဆင့် ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးမှူးများကို ဥပဒေနှင့်ညီညွတ်စေရန် ပြန်လည်ရွေးချယ်ခဲ့ပါကြောင်း၊ ထိုသို့ရွေးချယ်ရာတွင် ပြည်သူကတိုက်ရိုက် ရွေးချယ်သောစနစ် ပေါ်ပေါက်လာစေရန် သက်ဆိုင်ရာရပ်ကွက်နှင့် ကျေးရွာအုပ်စုအတွင်း နေထိုင်သော ရပ်မိရပ်ဖငါးဦးကို ကြီးကြပ်ရေးအဖွဲ့အဖြစ် ဖွဲ့စည်းပြီး တာဝန်ပေးအပ်ခဲ့ပါကြောင်း၊ ၎င်းကြီးကြပ်ရေးအဖွဲ့က ဆယ်အိမ်စုအဖွဲ့၊ ရာအိမ်စုအဖွဲ့များမှတစ်ဆင့် အုပ်ချုပ်ရေးမှူးကောင်းတစ်ယောက် ထွက်ပေါ်လာသည်အထိ တာဝန်ယူဆောင်ရွက် ပေးခဲ့ကြပါကြောင်း၊ ဆက်သွယ်သွားလာရေး လွယ်ကူသော ရပ်ကွက်နှင့်ကျေးရွာအုပ်စု အဆင့်များတွင် ကြီးကြပ်ရေးမှူးငါးဦးအနေဖြင့် ရွေးကောက်ပွဲဆိုင်ရာ လုပ်ငန်းစဉ်များ စီစဉ်သွားလာဆောင်ရွက်သည့် နေရာတွင် အခက်အခဲ မရှိသော်လည်း ဆက်သွယ်သွားလာရေးခက်ခဲသည့် ဒေသမ‌ျားဖြစ်သည့် မြစ်ဝကျွန်းပေါ်ဒေသ၊ တောင်ပေါ်ဒေသ၊ ကျေးရွာအုပ်စုကျယ်ပြန့်သည့် ဒေသများတွင် ရက်ရှည်ခရီးစဉ်များရေးဆွဲ၍ အကောင်အထည်ဖော် ဆောင်ရွက်ခဲ့ကြသည်ကို တွေ့ရှိရပါကြောင်း၊ ထို့သို့သွားလာ ဆောင်ရွက်ကြသည့် နေရာတွင် နေထိုင်စားသောက်စရိတ်များ၊ ဆိုင်ကယ်ဆီဖိုး၊ မော်တော်ယာဉ်ခများကို မိမိတို့ကိုယ်ပိုင် ငွေကြေးများဖြင့် သုံးစွဲကြရသည့်အပြင် ရွေးကောက်ပွဲ အစမှအဆုံးအထိ စာရွက်စာတမ်းကြေးများ၊ ကွန်ပျူတာမိတ္တူ ကိစ္စများပါ သုံးစွဲကြရမည် ဖြစ်ပါကြောင်း၊ ရွေးကောက်တင်မြှောက်ပွဲဆိုင်ရာ နည်းဥပဒေများ ထွက်ပေါ်ခြင်း မရှိသေးသည့်အတွက် အထူးသတိကြီးစွာဖြင့် ဆောင်ရွက်ခဲ့ကြသည့် ပွဲတစ်ပွဲဖြစ်ပါကြောင်း၊ ရပ်ကွက် သို့မဟုတ် ကျေးရွာအုပ်စုအဆင့် အုပ်ချုပ်ရေးမှူးများသည် အစိုးရအဖွဲ့၏ အောက်ခြေအဆင့် ယန္တရားဖြစ်ပြီး ပြည်သူလူထုနှင့် နေ့စဉ်ထိတွေ့ ဆက်ဆံနေရသော ပုဂ္ဂိုလ်များ ဖြစ်ကြပါကြောင်း၊  ပြည်သူလူထုမှ ဝိုင်းဝန်းရွေးချယ်သော အရည်အချင်းပြည်‌့ဝသည့် အုပ်ချုပ်ရေးမှူး ကောင်းများ ထွက်ပေါ်လာစေရေးအတွက် ဤအောက်ခြေအဆင့် ရွေးကောက်ပွဲများသည် အဓိကကျသည့် လုပ်ငန်းစဉ်တစ်ခု ဖြစ်နေပါကြောင်း၊ ထို့ပြင် ကျေးရွာအုပ်စုအဆင့်များတွင် ရွေးချယ်ခန့်အပ်ခြင်းခံရသည့် ကျေးရွာတာဝန်ခံ သို့မဟုတ် ရွာသူကြီးများသည်လည်း ကျေးရွာအုပ်စု အုပ်ချုပ်ရေးမှူးများကိုယ်စား မိမိတို့ကျေးရွာအလိုက် တာဝန်ယူဆောင်ရွက် ကြရသည့်အတွက် ဆယ်အိမ်မှူး၊ ရာအိမ်မှူးများထက် တာဝန်ပိုသည့်အတွက် ချီးမြှင့်ထောက်ပံ့ကြေးများလည်း ခံစားခွင့်ရရှိသင်‌့သည်ဟု ယူဆမိသည့်အတွက် ၂၀၁၇-၁၈ ခုနှစ်တွင် ကျင်းပခဲ့သည်‌့ ရပ်ကွက် သို့မဟုတ် ကျေးရွာအုပ်စု အဆင့်အုပ်ချုပ်ရေးမှူးများ ရွေးချယ်တင်မြှောက်ပွဲတွင် မည်သည့်ငွေစာရင်းခေါင်းစဉ်ဖြင့် စီစဉ်ဆောင်ရွက်ခဲ့ပြီး နောင်တွင်ကျင်းပမည်‌့ ရပ်ကွက် သို့မဟုတ် ကျေးရွာအုပ်စု ရွေးချယ်ပွဲများတွင် အဆင်ပြေစွာကျင်းပ ဆောင်ရွက်သွားနိုင်ရန် ဘဏ္ဍာငွေစာရင်းခေါင်းစဉ် သီးသန့်ခွဲဝေချမှတ်ပေးရန် အစီအစဉ်ရှိ/မရှိနှင့် သက်ဆိုင်ရာကျေးရွာ တာဝန်ခံများကိုလည်း ချီးမြှင့်ထောက်ပံ့ငွေများ သတ်မှတ်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။