မိမိတို့မြန်မာနိုင်ငံသား ရဟန်းရှင်လူ၊ ပြည်သူများသည် အကြောင်းအမျိုးမျိုးကြောင့် ပြည်ပနိုင်ငံများကို ခရီးသွားလိုလျှင် ရှေးယခင်က ရန်ကုန်မြို့တွင် နိုင်ငံကူးလက်မှတ် (Passport) သွားရောက် လျှောက်ထားထုတ်ယူ၍ ရပါကြောင်း၊ ထို့နောက် မန္တလေးမြို့တွင်လည်း နိုင်ငံကူးလက်မှတ် ထုတ်ပေးသည့်ရုံး ဖွင့်လှစ်ပေးခဲ့သည့်အပြင် နိုင်ငံတော်အစိုးရ၏ ပထမသက်တမ်းကာလ‌အတွင်း တိုင်းဒေသကြီးနှင့်ပြည်နယ် ၁၄ ခု၏ အစိုးရရုံးစိုက်ရာ မြို့ကြီးများတွင် နိုင်ငံကူးလက်မှတ် ထုတ်ပေးသည့် ရုံးခွဲများအသီးသီး ဖွင်‌့လှစ်ခဲ့သည်ကို တွေ့ရှိရပါကြောင်း၊ ရှမ်းပြည်နယ် (အရှေ့ပိုင်း)၊ (တောင်ပိုင်း)၊ (မြောက်ပိုင်း) ဆိုပြီးရှိရာ ရှမ်းပြည်နယ် (အရှေ့ပိုင်း) ကျိုင်းတုံမြို့၌လည်းကောင်း၊ ရှမ်းပြည်နယ် (တောင်ပိုင်း) တောင်ကြီးမြို့၌လည်းကောင်း၊ ရှမ်းပြည်နယ် (မြောက်ပိုင်း) လားရှိုးမြို့၌ လည်းကောင်း နိုင်ငံကူးလက်မှတ် ထုတ်ပေးသည့် ရုံးခွဲများအသီးသီးဖွင်‌့လှစ် ထားရှိပေးခဲ့ပါကြောင်း၊ ၂၀၁၇ ခုနှစ်တွင် တာချီလိတ်မြို့၌လည်း နိုင်ငံကူးလက်မှတ်ထုတ်ပေးသည့် ရုံးခွဲတစ်ခု ထပ်မံဖွင်‌့ လှစ်ပေးခဲ့ပါကြောင်း၊ မူဆယ်ခရိုင် မူဆယ်မြို့နယ်၊ နမ့်ခမ်းမြို့နယ်နှင်‌့ ကွတ်ခိုင်မြို့နယ်တို့ ပါဝင်ကြပါကြောင်း၊ လူဦးရေအားဖြင်‌့ မူဆယ်မြို့နယ်တွင် ၁၅၂၈၂၆ ယောက်၊ နမ့်ခမ်းမြို့နယ်တွင် ၁၁၅၂၁၃ ယောက်၊ ကွတ်ခိုင်မြို့နယ်တွင်    ၁၈၈၁၃၉ ယောက် အသီးသီးရှိကြပြီး မူဆယ်ခရိုင်၏ လူဦးရေ စုစုပေါင်း ၄၅၆၁၇၈ ယောက်ရှိကြောင်း၊ ၂၀၁၇ ခုနှစ် စက်တင်ဘာလ ကုန်အထိ ပြုစုသည့် ပြည်ထဲရေးဝန်ကြီးဌာန၊ အထွေထွေအုပ်ချုပ်ရေး ဦးစီးဌာန၏ မှတ်တမ်းများအရ သိရှိရပါကြောင်း၊ မူဆယ်ခရိုင်အတွင်းရှိ ရဟန်းရှင်လူ၊ ပြည်သူများသည် နိုင်ငံကူးလက်မှတ် ပြုလုပ်ရန်အတွက် လားရှိုးမြို့ရှိ နိုင်ငံကူးလက်မှတ် ထုတ်ပေးသည့်ရုံးသို့ နှစ်ကြိမ်သွားရောက် ပြုလုပ်ရမည် ဖြစ်ပါကြောင်း၊ ပထမအကြိမ်က နိုင်ငံကူးလက်မှတ် သွားရောက်လျှောက်ထားခြင်းဖြစ်ပြီး တစ်ပတ်၊ ၁၀ ရက်ကြာလျှင် ဒုတိယအကြိမ်အဖြစ် နိုင်ငံကူးလက်မှတ် သွားရောက်ထုတ်ယူ ရပါကြောင်း၊ တစ်ကြိမ်လျှင်အနည်းဆုံး တစ်ညအိပ်ပြီး နိုင်ငံကူးလက်မှတ် ပြုလုပ်ရပါကြောင်း၊ မူဆယ်၊ နမ့်ခမ်းမြို့များနှင်‌့ လားရှိုးမြို့အကွာအဝေးတွင် မိုင် ၁၂၀ ကျော်ခန့်ရှိပြီး Oriental High Way ကုမ္ပဏီမှ တာဝန်ယူ ဆောက်လုပ်လျက်ရှိသည့် အာဆီယံအဝေးပြေး လမ်းမကြီးသည် ၂၀၁၈-၁၉ ခုနှစ်တွင် ပြီးစီးမည် ဆိုသော်လည်း လားရှိုး-မူဆယ်လမ်းပိုင်းတွင် နေ့စဉ်သွားလာသည့် အတက်/အဆင်း ယာဉ်မျိုးစုံ၏ အရေအတွက်သည် အဆမတန်များပြား နေခြင်းကြောင့် သွားချိန်/လာချိန်နှင့် ရောက်ရှိမည့် အချိန်များကို ကြိုတင်မှန်းဆ၍ မရခြင်း ဖြစ်နေပါကြောင်း၊ နိုင်ငံကူးလက်မှတ်ကို ၎င်းလမ်းခရီးဖြင်‌့ သွားလာပြုလုပ်ရာတွင် လူငယ်၊ လူရွယ်များအတွက် အခက်အခဲမရှိသော်လည်း အသက်ကြီးသူများ၊ ရဟန်း/သံဃာများနှင့် ကျန်းမာရေးမကောင်း သူများအတွက် အချိန်ကုန်၊ ငွေကုန်စေသည့်အပြင် ကိုယ်စိတ်နှစ်ပါး ပင်ပန်းစေခြင်းကြောင့် အဆင်မပြေပါကြောင်း၊ အထက်ဖော်ပြပါ အကြောင်းအချက်များအပြင် မူဆယ်မြို့တွင် နယ်စပ်ကုန်သွယ်ရေး ဇုန်ဖြစ်ခြင်းနှင်‌့ မြန်မာနိုင်ငံ၏ အရှေ့မြောက်တံခါးပေါက် ရှိနေခြင်း၊ မြန်မာ၊ တရုတ် နှစ်နိုင်ငံအစိုးရများ၏ ညှိနှိုင်းသဘောတူညီမှုအရ မကြာမီကာလတစ်ခုတွင် မူဆယ်မြို့၌ တတိယနိုင်ငံများကပါ ဖြတ်သန်းသွားလာနိုင်မည့် အပြည်ပြည်ဆိုင်ရာ နယ်စပ်စိစစ်ရေး ဂိတ်တစ်ခု ဖွင်‌့လှစ်ပေးမည်ဖြစ်ခြင်း စသည့်တို့ကြောင့် မူဆယ်ခရိုင်၊ မူဆယ်မြို့တွင် နိုင်ငံကူးလက်မှတ် ထုတ်ပေးသည့် ရုံးခွဲတစ်ခု ဖွင့်လှစ်ထားရှိပေးစေ လိုပါကြောင်း၊ ဖွင်‌့လှစ်ပေးမည်ဆိုပါက မူဆယ်ခရိုင်အတွင်းရှိ ရဟန်းရှင်၊ ပြည်သူများသာမက မူဆယ်ခရိုင်နှင့် ထိစပ်လျက်ရှိသည့် ကချင်ပြည်နယ်မှ မံစီနှင့်လွယ်ဂျယ်ဒေသရှိ ပြည်သူများကပါ နိုင်ငံကူးလက်မှတ်ကို ပိုမိုလွယ်ကူစွာ ပြုလုပ်နိုင်မည် ဖြစ်ပါကြောင်း၊ သို့ဖြစ်ပါ၍ မူဆယ်ခရိုင်၊ မူဆယ်မြို့တွင် နိုင်ငံကူးလက်မှတ် (Passport) ထုတ်ပေးသည့် ရုံးခွဲဖွင့်လှစ်ထားပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။