ရန်ကုန်-မန္တလေးအမြန်လမ်းမကြီး ရန်ကုန်မြို့အဝင် တိုးဂိတ်တွင် သတ်မှတ်မိုင်နှုန်းအရှိန်ထက် ပိုမိုမောင်းနှင်သော ကားများကိုဖမ်းဆီးအရေးယူနေသော ယာဉ်ထိန်းရဲများကို အများအပြား တွေ့ရှိရပါကြောင်း၊ ထိုနေရာမှ ငါးမိနစ်ခန့်မောင်းရုံနှင့် ရောက်ရှိနိုင်သည့် ထောက်ကြန့်လမ်းဆုံတွင် ယာဉ်ကြောပိတ်ဆို့မှုများဖြစ်ပြီး မီးပွိုင့်ကိုလည်း ဂရုမပြုဘဲ မောင်းနှင်နေသည့် မော်တော်ယာဉ်များကို ထိန်းကျောင်းပေးမည့် ယာဉ်ထိန်းရဲမရှိသည်မှစတင်ပြီး သတိထားမိပြီး မေးခွန်းပေါ်ပေါက်လာရခြင်း ဖြစ်ပါကြောင်း၊ ယခုဆိုလျှင် ယာဉ်ကြောပိတ်ဆို့မှုကို အကြောင်းပြပြီး ၂၀၁၈-၁၉ ဘတ်ဂျက်တွင် ခုံးကျော်တံတား တည်ဆောက်မည်ဟု ဆောက်လုပ်ရေးဝန်ကြီးဌာနက ဘတ်ဂျက်ထည့်သွင်း တောင်းဆိုထားသည်ကိုလည်း တွေ့ရှိရပါကြောင်း၊

ထို့ကြောင့် ယနေ့ ရန်ကုန်-မန္တလေးအမြန်လမ်းမကြီးတွင်ရှိသည့် တိုးဂိတ်များမှာ သတ်မှတ်မိုင်နှုန်း အရှိန်ထက်ပိုမိုမောင်းနှင်နေသော ကားများကို ဒဏ်ငွေတပ်၍ ဖမ်းဆီးနေခြင်းကြောင့် ယာဉ်မတော်တဆမှုများ ပိုမိုလျှော့နည်းလာသည်ဟု ထင်ရပါကြောင်း၊ သို့သော်လည်း ထိုစီမံချက်ကို မည်သည့်ဌာန၊ မည်သည့်အဖွဲ့အစည်းက ဦးဆောင်နေခြင်းဖြစ်သနည်း၊ မည်သူတို့နှင့်ဖွဲ့စည်း ထားသနည်းနှင့် စတင်ဖွဲ့စည်းချိန်ကနေပြီး ယနေ့အချိန်အထိ တိကျစွာသိရှိလိုပါကြောင်း၊ ထို့အပြင် ဖမ်းဆီးအရေးယူခံရသော ယာဉ်မောင်းများအား တရားရုံးမှ ဒဏ်ရိုက်သည့် ငွေကြေးများသည်လည်း နောက်ဆုံး မည်သည့်ဌာနသို့ ရောက်ရှိသွားပါသနည်း ဆိုသည်ကိုလည်း သိရှိချင်ပါကြောင်း၊ ဒဏ်ကြေးငွေကို မည်သူက မည်သည့်ရည်ရွယ်ချက်ဖြင့် ၅၀၀၀၀ ကျပ်သတ်မှတ်ခဲ့ပါသနည်း ဆိုသည်ကိုလည်း သိရှိလိုပါကြောင်း၊ ၎င်းကိစ္စများသည် မျှတမှုရှိ/မရှိကိုလည်း သိချင်ပါကြောင်း၊ သတ်မှတ်မိုင်နှုန်းထက် အရှိန်ပိုမောင်းသည့် ကားများကို မည်ကဲ့သို့သော အထောက်အထားဖြင့် ဖော်ပြဖမ်းဆီး နေပါသနည်း၊ ဖမ်းဆီးအရေးယူနေသည့် တာဝန်ရှိပုဂ္ဂိုလ်များကိုလည်း အဂတိတရား ကင်းစင်မှုရှိအောင် မည်ကဲ့သို့ထိန်းကျောင်းထားပါသနည်း၊ ယခုကဲ့သို့ ဖမ်းဆီး အရေးယူမှုပြုလုပ်သည်ကို လူထုအားအသိပညာပေးမှုသည် လုံလောက်မှု ရှိပါသလား၊ ၎င်းစီမံချက်ကို မည်သည့်ကာလအချိန်အထိ သတ်မှတ်သွားမည်ဆိုသည်ကို သိရှိလိုပါကြောင်း မေးမြန်းပါသည်။