(က)-မြို့နယ်များတွင် ဖွင့်လှစ်ထားရှိသည့် ပြည်သူ့ဝန်ဆောင်မှုရုံး(OSS) လုပ်ငန်းများအောင်မြင်စွာ ဆက်လက်အကောင်အထည်ဖော်နိုင်ရေးအတွက် မည်ကဲ့သို့စီစဉ်ဆောင်ရွက်ထားသနည်း၊ ပြည်သူ့ ဝန်ဆောင်မှုရုံး (OSS)အတွက် လိုအပ်သောအထောက်အကူပြုပစ္စည်းကိရိယာများနှင့် ရုံးလုပ်ငန်း အသုံးစရိတ်များအတွက် သီးခြားရန်ပုံငွေ ခွင့်ပြုချထားပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

ပြည်သူတို့၏ အခြေခံလိုအပ်ချက်များ ဖြည့်ဆည်းဆောင်ရွက်ရာတွင် အဆင်ပြေချောမွေ့စေသည့် ဝန်ဆောင်မှုများ ဆောင်ရွက်ပေးရန်၊ လာဘ်ပေးလာဘ်ယူမှု၊ အဂတိလိုက်စားမှုများကို တားမြစ်၍ ထိရောက်သော ဝန်ဆောင်မှုအလေ့အကျင့်များ ပြုစုပျိုးထောင်ပေးနိုင်ရန်၊ ပြည်သူများက အစိုးရနှင့် ဌာနဆိုင်ရာဝန်ထမ်းများအပေါ် အားကိုးယုံကြည်မှု တိုးပွားလာစေရန်၊ တာဝန်ထမ်းဆောင်နေသော ဝန်ထမ်းများနှင့် ဦးစီးဌာနများအလိုက် အပြန်အလှန်ထိန်းကျောင်းမှု ပြုပြင်နိုင်ရေးအ‌ထောက်အကူပြု နိုင်ရန်စသည့် ရည်ရွယ်ချက်များဖြင့် ၂၀၁၅ ခုနှစ်တွင် ခရိုင်နှင့်မြို့နယ် ပြည်သူ့ဝန်ဆောင်မှုရုံးများ စတင်ဖွင့် လှစ်ခဲ့ပါကြောင်း၊ နယ်မြေအခြေအနေအရ မဖွင့်လှစ်သေးနိုင်သောမြို့နယ်များ အနည်းငယ် ကျန်ရှိနေသေးကြောင်းလည်း သိရှိရပါကြောင်း၊ မြို့နယ်အသီးသီးတွင် One Stop Shop ကောင်တာများကိုယ်စီဖြင့် ဌာနအလိုက်ဖွင့်လှစ်ခြင်း၊ တာဝန်ချထားခြင်းများ ဆောင်ရွက်နေသည်ကို တွေ့ခဲ့ရပါကြောင်း၊ အချို့နေရာများတွင် ရုံးများဆောက်လုပ်ပြီးစီးပြီ ဖြစ်ပါကြောင်း၊

ယနေ့အချိန်တွင် ပြည်သူ့ဝန်ဆောင်မှုရုံး (OSS) နှင့်ပတ်သက်၍ ကောင်တာခုံများပြန်လည် ပိတ်သိမ်းပြီး ကြော်ငြာဆိုင်းဘုတ်များကိုသာ မြင်တွေ့ရပါကြောင်း၊ ပြည်သူ့ဝန်ဆောင်မှုရုံးများ အကောင်အထည်ဖော် ဆောင်ရွက်နိုင်ရန် အားနည်း၍ ပြန်လည်ပိတ်သိမ်းသွားခြင်းလား၊ နည်းပညာရပ်များဖြစ်သော Online System ၊ E-Government စသည့် စနစ်များ ပြည့်စုံလုံလောက်မှု မရှိ၍လား၊ ပြည်သူလူထုပူးပေါင်းပါဝင်မှု၊ အားကိုးယုံကြည်မှု နည်းပါး၍လားဆိုသည်ကို မေးခွန်းထုတ်ရမည့် အနေအထားမျိုး ဖြစ်နေပါကြောင်း၊ ပြည်သူ့ဝန်ဆောင်မှုရုံးများက ဆောင်ရွက်ပေးသော လုပ်ငန်းများသည်လည်း ပြည်သူလူထုအမှန်တကယ် လိုအပ်သောလုပ်ငန်းများ ဖြစ်နေပါကြောင်း၊ ဥပမာ-နိုင်ငံသားစိစစ်ရေးကတ်ပြား လျှောက်ထားခြင်းကိစ္စ၊ မြေစာရင်းပုံစံ (၁၀၅) ရေးကူးခြင်းကိစ္စ၊ ပွဲမိန့်လျှောက်ထားခြင်း၊ သတင်းပေးတိုင်ကြားခြင်း စသည့်ကိစ္စရပ်များ ဖြစ်နေပါကြောင်း၊ ပြည်သူ့ဝန်ဆောင်မှုရုံး (One Stop Shop) စနစ်အောင်မြင်စွာ အကောင်အထည်ဖော် ဆောင်ရွက်နိုင်ပါက ပြည်သူများအတွက် အချိန်နှင့်ငွေကြေး သက်သာစေခြင်း၊ အဂတိလိုက်စားမှု (ကြိုးနီစနစ်) လျော့နည်းစေခြင်း၊ ဗဟိုချုပ်ကိုင်မှုစနစ် လျှော့ကျစေခြင်း၊ အစိုးရအဖွဲ့ အစည်းများ၏ ဂုဏ်သိက္ခာတိုးတက် ကောင်းမွန်လာစေခြင်း စသည့်အကျိုးများ ရရှိလာနိုင်မည် ဖြစ်ပါကြောင်း၊ သို့ဖြစ်ပါ၍ ပြည်သူတို့၏ အခြေခံလိုအပ်ချက်များအား ကူညီဖြည့်ဆည်းပေးနိုင်မည့် ဝန်ဆောင်မှုကောင်းများ ပေါ်ထွက်လာစေရေးအတွက် မေးခွန်း (၁) မြို့နယ်များတွင် ဖွင့်လှစ်ထား ရှိသည့် ပြည်သူ့ဝန်ဆောင်မှုရုံး (OSS) လုပ်ငန်းများ အောင်မြင်စွာ ဆက်လက်အကောင်အထည်‌ ဖော်နိုင်ရေးအတွက် မည်ကဲ့သို့ စီစဉ်ဆောင်ရွက်ထားပါသနည်း၊ မေးခွန်း (၂) ပြည်သူ့ဝန်ဆောင်မှုရုံး (OSS) အတွက် လိုအပ်သော အထောက်အကူပြုပစ္စည်း ကိရိယာများနှင့် ရုံးလုပ်ငန်းအသုံး စရိတ်များအတွက် သီးခြားရန်ပုံငွေ ခွင့်ပြုချထားပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။