တောင်ဥက္ကလာပမြို့နယ် မေတ္တာလမ်းရှိ ပဒေသာဈေးမှ ဈေးသူဈေးသားများသည် ယခင်က မင်္ဂလာဈေးနှင့် ဆက်စပ်ရောင်းဝယ်မှုများရှိနေခဲ့ပြီး ပဒေသာဈေးနှင့် မင်္ဂလာဈေးတို့အား မထသကား များဖြစ်သော (၃၁) ဗိုက်ပူကား၊ ‌ဇေယျာမင်းကား၊ အောင်သိဒ္ဓိ (၂၃၇) အစရှိသောကားများ ပြေးဆွဲခဲ့ပါကြောင်း၊ ၂၀၁၇ ခုနှစ် ဇန်နဝါရီလတွင် မထသကားများအစား YBS ကားများဖြင့် အစားထိုးပြောင်းလဲ ပြေးဆွဲခဲ့ပါကြောင်း၊

ယခင် မထသကားအဟောင်းများ နေရာတွင် YBS ကားအသစ်များဖြင့် ပြောင်းလဲပြေးဆွဲခဲ့သည့်အတွက် ခရီးသွားပြည်သူများမှာ ပိုမိုသက်တောင့်သက်သာရှိသော အခြေအနေတစ်ခုကို ရောက်ရှိခဲ့သော်လည်း မေတ္တာလမ်းရှိ ပဒေသာဈေးနှင့် မင်္ဂလာဈေးသို့ ဖြတ်သန်းသော ခရီးစဉ်လမ်းကြောင်း YBS ကားလိုင်း တစ်လိုင်းမှ မပါရှိခဲ့သောကြောင့် YBS ကားအသစ်၏ ခရီးစဉ်လမ်းကြောင်းများသည် တောင်ဥက္ကလာပ မြို့နယ်အတွက် လိုအပ်ချက်ဖြစ်ပေါ်လျက် ရှိနေပါကြောင်း၊ ထိုသို့ဖြစ်နေသည့်အတွက် ခရီးသည်များမှာ ယနေ့တိုင် ဒုက္ခရောက်နေပြီး လွှတ်တော်ကိုယ်စားလှယ်များနှင့် ပြည်သူလူထု တွေ့ဆုံပွဲများ တွင်လည်းကောင်း၊ လူမှုကွန်ရက်စာမျက်နှာများတွင်လည်းကောင်း ၎င်းခရီးသည်များ၏ အခက်အခဲများကို ဖြေရှင်းပေးပါရန် တောင်းဆိုခဲ့ကြပါကြောင်း၊ တိုင်းဒေသကြီးလွှတ်တော် ကိုယ်စားလှယ်များ အနေဖြင့်လည်း နဂိုမထသယာဉ်လိုင်းအတိုင်း ပြေးဆွဲပေးနိုင်ရေးကို ကြိုပမ်းဆောင်ရွက်ခဲ့ပါကြောင်း၊ ခရီးသွားပြည်သူများ အနေဖြင့်လည်း YBS ခရီးစဉ်အဆင်ပြေရန်အတွက် ဌာနဆိုင်ရာများကို တင်ပြထား သည့် အပိုင်းများလည်း ရှိခဲ့ပြီး YBS ကားများ စတင်သောကာလဖြစ်သဖြင့် အဆင်မပြေသေးသော်လည်း နောင်တွင် အဆင်ပြေလာပါမည်ဟု ခရီးသွားပြည်သူများအား ပြောကြားနေရသော်လည်း YBS စတင်ပြီး တစ်နှစ်ခွဲကျော်ကြာ ယနေ့အချိန်အထိ အဆင်မပြေဘဲ ဖြစ်နေပါသဖြင့် ၎င်းရပ်ကွက်များတွင် ပြည်သူလူထု တွေ့ဆုံပွဲများကို မလုပ်ရဲသည့်တိုင် ဖြစ်နေရပါကြောင်း၊ ထိုသို့သော အခြေအနေများကြောင့် တောင်ဥက္ကလာပမြို့နယ် မေတ္တာလမ်းရှိ ပဒေသာဈေးနှင့် မင်္ဂလာဈေးသို့ ဖြတ်သန်းသွားသော ယခင် မထသယာဉ်လိုင်း အချိန်ကိုက်ရှိခဲ့သော ခရီးစဉ်အတိုင်း ယာဉ်လိုင်းတစ်ခု ပြန်လည်ဆောင်ရွက်ပေးနိုင် ခြင်းရှိ/မရှိနှင့် မဆောင်ရွက်ပေးနိုင်ပါက မည်သည့်အတွက်ကြောင့် မဆောင်ရွက်ပေးနိုင်သည်ကို သိရှိလိုပါ ကြောင်း၊ ဆောင်ရွက်ပေးမည်ဆိုပါက မည်သည့်အချိန်တွင် ဆောင်ရွက်ပေးမည်ကို သိရှိလိုပါကြောင်း၊ ထိုသို့ဆောင်ရွက်ပေးမည်ဆိုလျှင် နဂိုမထသယာဉ်လိုင်း ခရီးစဉ်ဖြစ်သော မေတ္တာလမ်း၊ သုမင်္ဂလာလမ်း၊ ရတနာလမ်း၊ (၁၆) ကွေ့ ခရီးစဉ်လမ်းကြောင်းအပြင် မေတ္တာလမ်း၊ ဝေဇယန္တာလမ်း၊ (၁၆)ကွေ့ ခရီးစဉ်လိုင်းအတိုင်း ကားအစီးရေတချို့ကို ထည့်သွင်းပြေးဆွဲ စေချင်ပါကြောင်း၊ မေတ္တာလမ်းသည် လမ်းမကြီးတစ်ခု ဖြစ်သော်လည်း ယခင်မထသအချိန်တွင်လည်းကောင်း၊ ယခု YBS အချိန်တွင် လည်းကောင်း ယနေ့အချိန်အထိ လိုင်းကားတစ်စီးမှ ဖြတ်သန်းသွားလာခြင်း မရှိသောကြောင့် ဖြစ်ပါသည်။ ခရီးသွားပြည်သူများ၏ လိုအပ်ချက်ဖြစ်သော ယခင်က (၃၁)ဗိုက်ပူကား၊ ဇေယျာမင်း၊ အောင်သိဒ္ဓိ၊ (၂၃၇) လိုင်း ကားတို့၏ ခရီးစဉ်များသည် ခရီးသွားပြည်သူများ၏ လိုအပ်ချက်နှင့် အံ့ဝင်ခွင်ကျ ဖြစ်နေသည့်အတွက် ထိုကဲ့သို့ ပြန်လည်မဆောင်ရွက် ပေးနိုင်ပါက ခရီးသွားပြည်သူများ နေ့စဉ်ကြုံတွေ့ နေရသော ဆင်းရဲဒုက္ခများကို ဖြေလျော့စေရန်အတွက် ဌာနဆိုင်ရာအနေဖြင့် မည်သို့စီစဉ်ထားသည်ကို သိရှိလိုပါကြောင်း မေးမြန်းပါသည်။