ကျောက်ဖြူမြို့၊ ဦးပိုင်အမှတ် (၁၁၈/ခ) မြေကွက်သည် မြို့နယ်မြေစာရင်းဌာနတွင် မှတ်ပုံတင်ထား ခြင်းရှိ/မရှိ၊ ပြည်သူ့လွှတ်တော် ကိုယ်စားလှယ်သည် မြေပုံမိတ္တူများကိုရရှိနိုင်ရန် လျှောက်ထားသည့်အခါ သက်ဆိုင်ရာဝန်ကြီးဌာနက မိတ္တူထုတ်ပေးရန် တာဝန်ရှိသော်လည်း မည်သည့်အတွက် လိုက်နာခြင်း မပြုသည်ကို သိလိုခြင်းနှင်‌့စပ်လျဉ်းသည့်မေးခွန်း

မေးခွန်းတွင် အပိုင်းသုံးပိုင်း ပါရှိပါကြောင်း၊ နိုင်ငံတော်ဖွဲ့စည်းပုံအခြေခံဥပဒေပုဒ်မ ၃၅၆ နှင့် ၃၅၇ တို့တွင်  နိုင်ငံသားများ၏ ရွှေ့ပြောင်းနိုင်သည့် ပစ္စည်း၊ မရွှေ့ပြောင်းနိုင်သည့်ပစ္စည်း၊ နေအိမ်ဥပစာလုံခြုံမှုများကို နိုင်ငံတော်မှ မည်သို့လုပ်မည်ဆိုသည်ကို ပြဋ္ဌာန်းထားပါကြောင်း၊ ကျောက်ဖြူမြို့နယ်မြေစာရင်းရုံးတွင် ကျောက်ဖြူမြို့အလယ်ပိုင်းရပ်ကွက် ဦးပိုင်အမှတ် (၁၁၇/ဃ) နှင့် (၁၁၈/ခ) မြေကွက်တို့ကို မြေပုံ လျှောက်ထားခဲ့ပါကြောင်း၊ ဦးပိုင်မှ (၁၁၇/ဃ) မြေပုံရပြီး (၁၁၈/ခ) မြေပုံကို ဝန်ကြီးဌာနသို့ တင်ပြတောင်းခံခဲ့သော်လည်း မရရှိပါကြောင်း၊ (၁၁၇/ဃ) နှင့် (၁၁၈/ခ) မြေကွက်နှစ်ကွက်သည် တစ်ဆက်တစ်စပ်တည်းဖြစ်ပါကြောင်း၊ ပြည်ထောင်စုလွှတ်တော်ဆိုင်ရာ ဥပဒေနှင့် ပြည်သူ့လွှတ်တော် ဆိုင်ရာ ဥပဒေအရဆိုလျှင် တစ်ခြားဌာနဆိုင်ရာများတွင် လွှတ်တော် ကိုယ်စားလှယ်များက နိုင်ငံတော်တွင် တာဝန်ရှိသည့်ပုဂ္ဂိုလ်နှင့် လွှတ်တော်ဆိုင်ရာကိစ္စများတွင် ပြောဆိုရန်အတွက် အချက်အလက်များ တောင်းလျှင် ပေးရမည်ဟု ပြဋ္ဌာန်းထားပါကြောင်း၊ နိုင်ငံသားတစ်ယောက်၏ အခွင့်အရေးကို ချိုးဖောက်ခံရသည့် အကြောင်းအရာများကို နိုင်ငံတော်အကြီးအကဲများနှင့် လွှတ်တော်အကြီးအကဲများကို လွှတ်တော်တွင် တင်ပြနိုင်ရန်အတွက် မြေပုံမိတ္တူတောင်းခဲ့ခြင်း ဖြစ်ပါကြောင်း၊ ထိုသို့တောင်းသည့်အခါ တစ်ခုကိုရပြီး နောက်တစ်ခုကို မရသောကြောင့် ဝန်ကြီးကို လူချင်းတွေ့ပြီး ပြောခဲ့သော်လည်း မရသဖြင့် ကျောက်ဖြူမြို့၊ ဦးပိုင်အမှတ်(၁၁၈/ခ)မြေကွက်သည် မြို့နယ်မြေစာရင်းဌာနတွင် မှတ်ပုံတင်ထား ခြင်းရှိ/မရှိ၊ ပြည်သူ့လွှတ်တော်ကိုယ်စားလှယ်သည် မြေပုံမိတ္တူများကိုရရှိနိုင်ရန် လျှောက်ထားသည့်အခါ သက်ဆိုင်ရာဝန်ကြီးဌာနက မိတ္တူထုတ်ပေးရန် တာဝန်ရှိသော်လည်း မည်သည့်အတွက် လိုက်နာခြင်း မပြုသည်ကို သိလိုကြောင်း မေးမြန်းပါသည်။