မေးခွန်းမေးမြန်းရခြင်း၏ အဓိကအကြောင်းအရင်းသည် စနစ်ကျသည့် စီးပွားရေးအဆောက်အအုံကို ပုံဖော်နိုင်ဖို့ရန်အတွက် ဖြစ်ပါကြောင်း၊ ယနေ့ခေတ်သည် ဒီဂျစ်တယ်နည်းပညာခေတ်ဖြစ်ပြီး ဒီဂျစ်တယ် နည်းပညာ ဖွံ့ဖြိုးတိုးတက်လာသည်နှင့်အမျှ ဝန်ဆောင်မှုလုပ်ငန်းများ၊ စီးပွားရေးလုပ်ငန်းများ လုပ်သည့် ပုံသဏ္ဌာန်သည်လည်း ပြောင်းလဲလာပါကြောင်း၊ ပစ္စည်း၊ အစားအသောက်များ ဝယ်ယူချင်သည့်အခါ ဖုန်းဖြင့်မှာယူ၍ ဝယ်ယူရနိုင်သည့်ခေတ် ဖြစ်ပါကြောင်း၊ Taxi စီးချင်လျှင် ဖုန်းမှဆစ်ဆင့် မှာ၍ရသည့် ခေတ်ဖြစ်ပါကြောင်း၊ ထိုသို့ နည်းပညာများ ဖွံ့ဖြိုးလာတာနှင့်အမျှ ထိုနည်းပညာများကို စနစ်တကျသုံးစွဲနိုင် လျှင် နိုင်ငံ၏စီးပွားရေး ဖွံ့ဖြိုးတိုးတက်နိုင်ရန် အထောက်အပံ့ဖြစ်စေသလို နည်းပညာများကို စနစ်တကျ မသုံးစွဲနိုင်လျှင် ပြောင်းပြန်အကျိုးရလဒ် ရမည်ဖြစ်ပါကြောင်း၊ စနစ်မကျသည့် စီးပွားရေးဖွံ့ဖြိုးမှုမျိုး ဖြစ်လာမည်ဆိုလျှင် အခွန်ဆောင်ရသူနှင့် မဆောင်ရသည့်သူနှင့် Level Playing ပျက်ပြီး မညီမမျှမှုများ ဖြစ်လာနိုင်ပါကြောင်း၊ ထိုနည်းပညာအခြေခံ စီးပွားရေးလုပ်ငန်းများတွင် Online Shopping များ၊ Online Parches အခြားရောင်းဝယ် မှုလုပ်ငန်းများ၊ အခြားဝန်ဆောင်မှုလုပ်ငန်းများ ရှိပါကြောင်း၊ Online Shopping များဆိုလျှင် Social Media များဖြစ်သည့် Facebook နှင့် Website များကဲ့သို့ ပလက်ဖောင်းမှ အခမဲ့တင်ပြီး ရောင်းကြပါကြောင်း၊ Online Parches ဝန်ဆောင်မှုများ အမျိုးမျိုးရှိပါကြောင်း၊ ကြောငြာ လုပ်ငန်းများ၊ ပစ္စည်းရောင်းဝယ်မှုလုပ်ငန်းများ၊ Software နှင့်ပတ်သက်သည့် လုပ်ငန်းများ အများကြီး ရှိပါကြောင်း၊ အခွန်စည်းကြပ်မှု ကင်းလွတ်နေသည့် လုပ်ငန်းများ အများကြီးရှိနေပြီး အချို့လုပ်ငန်းများ သည် အခွန်စည်းကြပ်သင့်ပါကြောင်း၊ လုပ်ငန်း အများစုသည် ပြည်တွင်းအပြင် ပြည်ပလုပ်ငန်းများလည်း ပါဝင်နေပါကြောင်း၊ ဥပမာအားဖြင့် ယနေ့ခေတ်အရ ရုပ်မြင်သံကြား၊ သတင်းစာ၊ ဂျာနယ် စသည်တို့မှ ကြော်ငြာမည့်အစား Facebook ကို အသုံးပြုပြီး ကြော်ငြာဆိုဒ်တစ်ခုအနေနှင့် အသုံးပြုကြပါကြောင်း၊ Alibaba ကဲ့သို့ နိုင်ငံတကာ Online လုပ်ငန်းများရှိသလို Shop Dot Com ကဲ့သို့ မြန်မာပြည်မှ လုပ်ငန်း များလည်း ရှိသည့်အတွက် ထိုလုပ်ငန်းများသည် အစိုးရဆီတွင် စနစ်တကျ မှတ်ပုံတင်ထားရန် လိုအပ်ပါကြောင်း၊ အခွန်ကောက်သင့်သည့် လုပ်ငန်းများကို အခွန်ကောက်သင့်ပါကြောင်း၊ ထို့ကြောင့် ဒီဂျစ်တယ်နည်းပညာအခြေခံ စီးပွားရေးလုပ်ငန်းများကို မှတ်ပုံတင်နိုင်ရေးနှင့် အခွန်မှန်ကန်စွာ စည်းကြပ်နိုင်ရေး မည်သို့ဆောင်ရွက်မည်၊ မည်သည့်အချိန်အပိုင်းအခြားဖြင့် အကောင်အထည်ဖော်မည်၊ မလိုက်နာသူများကို မည်သို့ အရေးယူဆောင်ရွက်ပေးမည်ကို သိလိုကြောင်း မေးခွန်းမေးမြန်းခဲ့သည်။