(က)-မေးခွန်းများမေးမြန်းခြင်း၊ အဆိုတင်သွင်းခြင်း၊ ဆွေးနွေးခြင်းများ ဆောင်ရွက်ရာတွင် မေးခွန်းမေးမြန်းချိန်ကို (၅) မိနစ်အစား (၆) မိနစ်သို့လည်းကောင်း၊ အဆိုဆွေးနွေးချိန်ကို (၆) မိနစ်အစား (၅) မိနစ်သို့ ပြောင်းလဲသတ်မှတ်ပေးရန် အစီအစဉ်ရှိ၊မရှိနှင့် စပ်လျဉ်းသည့်မေးခွန်း

ပြည်သူ့လွှတ်တော်တွင် အဆိုဆွေးနွေးခြင်း၊ မေးခွန်းမေးမြန်းခြင်းများ ဆောင်ရွက်ခဲ့ခြင်းမှာ ခုနစ်နှစ် ကျော်ရှိပါကြောင်း၊ ယေဘုယျအားဖြင့် လွှတ်တော်မှ သတ်မှတ်ပေးခဲ့သည့် အချိန်သည် တချို့ကိစ္စများ တွင် လက်တွေ့ကျင့်သုံးသည့်အခါ အဆင်မပြေပါကြောင်း၊ အဆိုဆွေးနွေးသည့်အခါ နည်းဥပဒေ ၁၇၀ (က) တွင် ဖော်ပြထားသည်မှာ ဥက္ကဋ္ဌက သတ်မှတ်သည့် အစီအစဉ်အတိုင်း လွှတ်တော်ကိုယ်စားလှယ် များက ဆွေးနွေးရမည်၊ ဆွေးနွေးရာတွင် နည်းဥပဒေ ၃၀ ပါ သတ်မှတ်ချိန် ထက် ကျော်လွန်ဆွေးနွေး ခြင်းမပြုရဟု ပါရှိပါကြောင်း၊ နည်းဥပဒေ ၃၀ တွင် လွှတ်တော်ကိုယ်စားလှယ်တစ်ဦးသည် တစ်ကြိမ်လျှင် အများဆုံး ၁၅ မိနစ်အထိသာ ဆွေးနွေးရမည်ဟု ဖော်ပြထားပါကြောင်း၊ သို့သော် အဆိုတစ်ခု ဆွေးနွေး သည့်အခါ စံချိန်တင် ၄၄ ယောက်အထိ ပါဝင် ဆွေးနွေးခဲ့ကြပြီး တစ်ဦးလျှင် ဥက္ကဋ္ဌက ၆ မိနစ်သာ ခွင့်ပြုသည်ဆိုသော်လည်း ဆွေးနွေးချိန် ၄ နာရီကျော် ကြာပါကြောင်း၊ ကိုယ်စားလှယ်တစ်ဦးချင်း၏ ဆွေးနွေးမှုသည် အဆိုကို ဦးတည်ပြီးမှသာ အထောက်အကူဖြစ်ရာဖြစ်ကြောင်း ဆွေးနွေးသော်လည်း ဆုံးဖြတ်ရာတွင် ကြီးမားသည့် အထောက်အပံ့ဖြစ်စေသည်ဟု မယူဆနိုင်ပါကြောင်း၊ ထို့ကြောင့် လွှတ်တော်၏ တန်ဖိုးရှိသည့်အချိန် Save လုပ်နိုင်ရန်အတွက် အဆိုဆွေးနွေးသည့် ကိုယ်စားလှယ်များ ကို  ဥက္ကဋ္ဌကြီးက ယခင်ခွင့်ပြုထားခဲ့သည့် ၆ မိနစ်အစား ၅ မိနစ်သို့ ပြောင်းလဲသတ်မှတ်ပေးပါက ပိုမိုသင့်လျော်မည်ဟု ယူဆပါကြောင်း၊ ထို့နောက် ပြည်သူပလွှတ်တော်နည်းဥပဒေ ၁၄၄ (ဂ) တွင် လွှတ်တော်ကိုယ်စားလှယ်များသည် ဥက္ကဋ္ဌက မိမိအမည်ကို ခေါ်သည့်အခါ ကြယ်ပွင့်ပြထားသော မေးခွန်းကို မေးမြန်းရမည်၊ ထိုသို့မေးမြန်းရာတွင် ဥက္ကဋ္ဌ၏ ခွင့်ပြုချက်မရလျှင် မေးမြန်းချိန် ၃ မိနစ်ထက် မပိုစေရဟု ဖော်ပြထားပါကြောင်း၊ သာမန်ကျောင်းအဆင့်တိုး ဝန်ထမ်းတိုးမြှင့်ခန့်ထားရေးကိစ္စများတွင် ဥပဒေတွင်ပါရှိသည့် ၃ မိနစ်အတွင်း အချိန်ကိုက်မေးမြန်းနိုင်သော်လည်း တချို့ကိစ္စရပ်များသည် ချုံငုံမိ အောင်  ရှင်းလင်းတင်ပြရမည်ဖြစ်သဖြင့် ဥက္ကဋ္ဌကြီးက ၅ မိနစ်အထိ မေးခွင့်ပြုသည်ကိုလည်း လွှတ်တော် ကိုယ်စားလှယ်များအားလုံးကိုယ်စား ကျေးဇူးအထူးတင်ရှိပါကြောင်း၊ သို့သော် အချို့သော ကိစ္စရပ်‌များ တွင် မေးခွန်းမေးမြန်းသည့်နေရာတွင် ဘာသာရပ်မှာလည်း ကျယ်ပြန့်ပြီး ဝန်ကြီးဌာနနှင့် အစိုးရအဖွဲ့ကို ကောင်းမွန်သည့်၊ ပြည့်စုံသည့် Message များ ပေးနိုင်ရန် ဆောင်ရွက်သည့်အခါ ဥက္ကဋ္ဌကြီးက ခွင့်ပြုထားသည့်အချိန် ၅ မိနစ်မှာ မလုံလောက်သည်ကို လက်တွေ့ကြုံတွေ့နေရပါကြောင်း၊ နေ့စဉ် မေးမြန်းခွင့်ပြုသည့် မေးခွန်းသည် စုစုပေါင်း ငါးခုမှ ခုနစ်ခု အထိသာရှိပါကြောင်း၊ အကယ်၍ ဥက္ကဋ္ဌကြီးက မေးခွန်းမေးမြန်းသူကို လက်ရှိခွင့်ပြုထားသည့် လက်ရှိ ၅ မိနစ်အစား ၆ မိနစ်အထိ တစ်မိနစ်တိုးမြှင့်ခွင့်ပြုခဲ့မည်ဆိုလျှင် အများဆုံး ၇ မိနစ်အထိသာ ပိုမိုကြာမြှင့်မည်ဖြစ်ပါကြောင်း၊ မေးခွန်း မေးမြန်းသူအချို့မှာ တိုးမြှင့်ခွင့်ပြုသည့်အချိန်ကို အချိန်ပြည့် သုံးချင်မှသုံးမည်ဖြစ်ပါကြောင်း၊ မေးခွန်း မေးမြန်းသူကို ၅ မိနစ်အစား ၆ မိနစ်သာ ဥက္ကဋ္ဌကြီးမှ ခွင့်ပြုမည်ဆိုပါက လွှတ်တော်ကိုယ်စားလှယ်များ တက်သုတ်ရိုက်ပြောကြားနေသည့် ဒုက္ခမှ ကင်းဝေးပြီး Comprehensive ဖြစ်သည့် မေးခွန်းများ မေးမြန်းနိုင်မည်ဖြစ်ပါသောကြောင့် အဆိုဆွေးနွေးသူကို ယခင်ခွင့်ပြုထားသည့် ၆ မိနစ်အစား ၅ မိနစ်သို့ လည်းကောင်း၊ မေးခွန်းမေးမြန်းသူကို ယခင်ခွင့်ပြုထားသည့် အချိန် ၅ မိနစ်အစား ၆ မိနစ်သို့ လည်းကောင်း ပြောင်းလဲခွင့်ပြုပေးရန် အစီအစဉ်ရှိ/မရှိ မေးမြန်းခဲ့သည်။