(က)-လေးတောင်နယ်ဒေသရှိ ဆန်တင်မော်ဆိပ်ကမ်းနှင့် ကျောက်ဦးမော်ဆိပ်ကမ်းနေ ရေလုပ်သားများအတွက် မုန်တိုင်းအန္တရာယ်ကျရောက်လာပါက ခိုနားနိုင်ရန် ဘက်စုံသုံးမုန်တိုင်းဒဏ်ခံ အဆောက်အဦ (Multi Purpose Cyclone Shelter) တစ်လုံးစီဆောက်လုပ်ပေးရန် အစီအစဉ် ရှိ/မရှိနှင့်စပ်လျဉ်းသည့်မေးခွန်း

မိမိတို့ ရမ်းဗြဲမြို့နယ်သည် ပင်လယ်မြစ်ချောင်းများဝိုင်းပတ်ထားသော ရမ်းဗြဲကျွန်းပေါ်တွင်တည်ရှိ သော မြို့နယ်တစ်ခုဖြစ်ပါကြောင်း၊ ရမ်းဗြဲမြို့နယ်ရှိ လူအများစုသည် လယ်ယာလုပ်ငန်းဖြင့် အသက် မွေးသူများဖြစ်ကြပြီး ကျန်လူအများစုက ရေလုပ်ငန်းဖြင့် အသက်မွေးဝမ်းကျောင်းပြုသူများ ဖြစ်ကြပါကြောင်း၊ ရခိုင်ပြည်နယ်ရှိ ရေလုပ်ငန်းလုပ်ကိုင်သူများအနက် ရမ်းဗြဲမြို့နယ်၊ လေးတောင်နယ် ဒေသရှိ ဆန်တင်မော်ဆိပ်ကမ်းသည် ရခိုင်ပြည်နယ်ရှိ ရေလုပ်ငန်းလုပ်ကွက်များအနက် ကြီးမားသော လုပ်ကွက်တစ်ခုဖြစ်ပါကြောင်း၊ လေးတောင်နယ်ဒေသရှိ ကျောက်ဦးမော်ရေလုပ်ငန်းလုပ်ကွက်သည် လည်း ဒေသနေရေလုပ်သားများ မှီခိုအသက်မွေးနေရသည့် ရေလုပ်ငန်းလုပ်ကွက်တစ်ခု ဖြစ်ပါကြောင်း၊ လေးတောင်နယ်ဒေသရှိ ဆန်တင်မော်ဆိပ်ကမ်းသို့ ရေလုပ်ငန်းများ လုပ်ကိုင်နိုင်ရန် ရခိုင်ပြည်နယ်မြို့နယ်အသီးသီးမှ အိမ်ထောင်စုများ ရွှေ့ပြောင်းလာရောက်လုပ်ကိုင်ကြပြီး အခြေချ နေထိုင်လာကြသည်ကို မြင်တွေ့နေရပါကြောင်း၊ ဆန်တင်မော် ဆိပ်ကမ်းတွင် အိမ်ခြေ ၁၅၀ ခန့်နှင့် လူဦးရေ ၇၀၀ ကျော်ခန့်သည် အမြဲတမ်းနေထိုင်လျက်ရှိပြီး ဆန်တင်မော်ဆိပ်ကမ်း၏ တစ်ဖက်ကမ်းရှိ ကျောက်ဖြူမြို့နယ်၊ ကင်းဖက်ဆိပ်ကမ်းတွင်လည်း အိမ်ခြေ ၁၀၀ ခန့်နှင့် လူဦးရေ ၅၀၀ ခန့်သည် ငါးလုပ်ငန်းရာသီတွင် နေထိုင်လုပ်ကိုင်လျက်ရှိသည်ကို တွေ့ရှိရပါကြောင်း၊ ဆန်တင်မော်ဆိပ်ကမ်းနှင့် ၅ မိုင်ခန့်အကွာတွင် တည်ရှိသော ကျောက်ဦးမော်ဆိပ်ကမ်းတွင်လည်း အိမ်ခြေ ၁၀၀ ခန့်ရှိပြီး လူဦးရေ ၅၀၀ ခန့်နေထိုင်လုပ်ကိုင်လျက်ရှိသော ရေလုပ်ငန်းဆိပ်ကမ်း တစ်ခုဖြစ်ပါကြောင်း၊ ဆန်တင်မော် ဆိပ်ကမ်းသည် ဘင်္ဂလားပင်လယ်ကမ်းခြေနှင့် ကိန်းချောင်းဝတွင် တည်ရှိပြီး ငါးဖမ်းစက်လှေများ အချိန်မရွေးဝင်ထွက်သွားလာနိုင်သော ဆိပ်ကမ်းဖြစ်သဖြင့် ရေလုပ်သားများ တစ်နေ့ထက်တစ်နေ့ များပြားဝင်ရောက်လာသော ဆိပ်ကမ်းတစ်ခု ဖြစ်ပါကြောင်း၊ ဤဆန်တင်မော်ဆိပ်ကမ်းနှင့် ကျောက်ဦးမော် ဆိပ်ကမ်းတို့သည် ပင်လယ်ကမ်းခြေဒေသများဖြစ်ပြီး တောင်ကုန်း၊ တောင်တန်းများ လုံးဝမရှိသောဒေသဖြစ်သဖြင့် မုန်တိုင်းအန္တရာယ်ကျရောက်လာသောအခါ ခိုနားနိုင်မည့်နေရာမရှိ ဖြစ်နေရပါကြောင်း၊ ယခင်ကာလများက ဤဒေသတွင် မုန်တိုင်းကျရောက်ခဲ့စဉ်က ဤဒေသသို့ လာရောက်လုပ်ကိုင်ကြသော သံတွဲမြို့နယ်၊ မာန်အောင်မြို့နယ်တို့မှ ကျောပိုက်လုပ်သားများ သေဆုံး၊ ပျောက်ဆုံးမှုများရှိခဲ့ပြီး ကုန်းပေါ်တွင်ကျန်ရှိနေခဲ့သော မိသားစုများသည်လည်း ခိုနားရာမဲ့ ဖြစ်နေခဲ့ကြပါကြောင်း၊ ယခုအခါ မိုးလေဝသသတင်းထုတ်ပြန်ချက်များကို အချိန်နှင့်တစ်ပြေးညီ သိရှိနိုင်ပြီး ကြိုတင်ပြင်ဆင်ဆောင်ရွက်မှုများ ပြုလုပ်နိုင်မည်ဖြစ်သဖြင့် မုန်တိုင်းအန္တရာယ် ကျရောက်လာသောအခါ အကာအကွယ်မဲ့နေသော ဆန်တင်မော်ဆိပ်ကမ်းသည် ရေလုပ်သားများနှင့် ကျောက်ဦးမော်ဆိပ်ကမ်းသည် ရေလုပ်သားမိသားစုများ ဘေးအန္တရာယ်ကင်းစွာ ခိုနားနိုင်စေရန် အတွက် မုန်တိုင်းဒဏ်ခံအဆောက်အဦ (Multi Purpose Cyclone Shelter) တစ်လုံးစီတည်ဆောက် ပေးရန် အစီအစဉ်ရှိ/မရှိ သိရှိလိုပါကြောင်း  မေးမြန်းပါသည်။