(ဃ)-မင်းတုန်းမြို့နယ် ပြည်သူ့ဆေးရုံကြီးတွင် လစ်လပ်နေသော လက်ထောက်ဆရာဝန်တစ်ဦး ခန့်ထားပေး ရန်နှင့် ဘွဲ့လွန်တက်နေသောဆရာဝန်များအစား မည်သို့ဆောင်ရွက်ပေးမည်ကို သိလိုခြင်းနှင့် စပ်လျဉ်းသည့်မေးခွန်း
ယခုမေးခွန်းကဲ့သို့ အလားတူ မေးခွန်းမျိုးကို ပြည်သူ့လွှတ်တော် ဒုတိယပုံမှန်အစည်းအဝေး ၂၇-၇-၂၀၁၆ တွင် မိမိ မေးမြန်းခဲ့ပြီးဖြစ်ပါကြောင်း၊ မေးမြန်းပြီးစဉ်အခါက မိမိတို့မင်းတုန်းမြို့နယ် ပြည်သူ့ ဆေးရုံကြီးကို လက်ထောက်ဆရာဝန်နှစ်ဦးနှင့် မြောက်ပြင်တိုက်နယ်ဆေးရုံကို ဆရာဝန်တစ်ဦး၊ ကျောက်တိုင်တိုက်နယ် ဆေးရုံကို ဆရာဝန်တစ်ဦး ရောက်ရှိပြီး တာဝန်ထမ်းဆောင် ခဲ့ကြပါကြောင်း၊ တိုက်နယ်ဆေးရုံများတွင် ဆရာဝန်တစ်ဦးစီ လုံလောက်မှုရှိသော်လည်း မြို့နယ်ဆေးရုံကြီးတွင် လုံလောက်မှုမရှိ ဖြစ်နေပါကြောင်း၊ ဖွဲ့စည်းပုံအရ မင်းတုန်းမြို့နယ် ပြည်သူ့ဆေးရုံကြီးတွင် ဆရာဝန် ငါးဦး ခန့်ထားရမည် ဖြစ်သည့်အတွက် လက်ထောက်ဆရာဝန်တစ်ဦး လိုအပ်နေပါကြောင်း၊
၆-၂-၂၀၁၇ ရက်နေ့နှင့် ၂-၆-၂၀၁၇ ရက်နေ့တို့တွင် လက်ထောက်ဆရာဝန်နှစ်ဦး မိမိတို့ မင်းတုန်းမြို့နယ်ကို ရောက်ရှိလာခဲ့ပါကြောင်း၊ လက်ထောက်ဆရာဝန်နှစ်ဦးသည် ၁၀ လ နီးပါးခန့် တာဝန်ယူပြီး On Duty ဖြင့် နှစ်ဦးစလုံးတစ်ပြိုင်နက် ဘွဲ့လွန်တက်ရန် ပြန်သွားခဲ့ကြပါကြောင်း၊ မိမိတို့မြို့နယ်၏ လိုအပ်ချက်ဖြစ်သော ဆရာဝန်ရရှိရေး တောင်းဆိုလာခဲ့ခြင်း ဖြစ်ပါကြောင်း၊ တောင်းဆိုသည်နှင့်အညီ ရောက်ရှိလာခဲ့ကြသော်လည်း ပေးသော်လည်း မရရှိဘဲ ဖြစ်နေပါကြောင်း၊ ယခုကဲ့သ့ို ဖွံ့ဖြိုးမှု နောက်ကျနေသော မြို့လေးတွင် ဆေးဝါးပစ္စည်းကအစ မပြည့်စုံ၊ ဆရာဝန်က မပြည့်စုံ၊ ကျန်းမာရေးအတွက် အခက်အခဲမျိုးစုံနှင့် ရင်ဆိုင်နေရပါကြောင်း၊ ဘွဲ့လွန်သင်တန်း တက်သည့် နှစ်နှစ်တာကာလအတွင်း လစ်လပ်နေခြင်းကို အစားထိုးခန့်အပ်နိုင်ရန် အစီအစဉ်ရှိ/မရှိနှင့် မည်ကဲ့သို့ စီမံဆောင်ရွက် ထားသည်ကို သိရှိလိုပါကြောင်း မေးမြန်းပါသည်။