ရန်ကုန်ဘူတာကြီးကို အခြေပြု၍ပြေးဆွဲနေသော မြို့ပတ်ရထားပြေးဆွဲမှုနှင့် လမ်းများ၊ ဘူတာရုံများကို မည်သည့်အဖွဲ့အစည်းနှင့်ပေါင်းစပ်၍ မည်သို့အဆင့်မြှင့်တင်နေသည်ဆိုသည့် စီမံကိန်းများကို ပွင့်လင်းမြင်သာအောင် ရှင်းလင်းတင်ပြရန်နှင့် မည်သည့်ခုနှစ်တွင်ပြီးစီးအောင် အကောင်အထည် ဖော်မည်ကိုသိလိုခြင်းတို့နှင့်စပ်လျဉ်းသည့်မေးခွန်း

လူဦးရေငါးသန်းကျော်ရှိသည့် မိမိတို့ရန်ကုန်မြို့တော်ကြီး၏ နိစ္စဓူဝခရီးသည် ပို့ဆောင်ရေး အခြေအနေနှင့်စပ်လျဉ်းပြီး အာရှဖွံ့ဖြိုးရေးဘဏ် (ADB  Bank)က ၂၀၁၆ ခုနှစ်တွင် လေ့လာတွေ့ရှိချက်အရ အစီရင်ခံစာတစ်စောင် ထုတ်ပြန်ခဲ့ပါကြောင်း၊ အဆိုပါ အစီရင်ခံစာတွင် ပါရှိသည့် ဖော်ပြချက်များအရ ရန်ကုန်မြို့နေ ပြည်သူလူထု၏ နေ့စဉ်သွားလာအသုံးပြုသည့် ယာဉ်အမျိုးအစားများကို ခွဲခြားကြည့်လျှင် စက်ဘီးအသုံးပြုမှုကို ၂၂.၅ ရာခိုင်နှုန်း၊ ဆိုင်ကယ်အသုံး ပြုသူဦးရေက ၇.၂ ရာခိုင်နှုန်း၊ ဘတ်စ်ကားကို အသုံးပြုသည့် ဦးရေက ၄၉.၄ ရာခိုင်နှုန်းစသည်ဖြင့် တွေ့ရှိရပြီး မြို့ပတ်ရထားကို အသုံးပြုခြင်းက ၁.၁ ရာခိုင်နှုန်း သာရှိကြောင်း တွေ့ရှိရပါသည်။ ၎င်းအချက်ကို ကြည့်မည်ဆိုလျှင် ခရီးသည် ၁၀၀ တွင် တစ်ယောက်သာ မြို့ပတ်ရထားကို အသုံးပြုနေကြောင်း တွေ့ရှိရပြီး အကျိုးဆက်အနေဖြင့် ရန်ကုန်မြို့တော်ကြီးတွင် ကားလမ်းများပိတ်နေခြင်း၊ လိုရာခရီးကိုရောက်ရှိရန် နာရီပေါင်းများစွာ လမ်းပေါ်တွင် အချိန်ကုန်နေရခြင်း၊ အချိန်မီရောက်ရှိရန် အိမ်မှ သုံး၊ လေးနာရီ စောထွက်ကြရခြင်း၊ အိမ်ပြန်နောက်ကျခြင်းစသည့် ဒုက္ခများကို ပြည်သူလူထုအနေဖြင့် နေ့စဉ်နှင့်အမျှ ခံစားနေရသည်ကို တွေ့ရှိရပါကြောင်း၊

မြို့ပတ်ရထားဆိုတာ လက်မှတ်ခက ၁၅ မိုင်အတွင်း ၁၀၀ ကျပ်သာပေးရပြီး ၁၅ မိုင်ကျော်မှ ၂၀၀ ကျပ်သာ ပေးရသည့်အတွက် ရန်ကုန်မြို့နေ ပြည်သူလူထုအတွက် အင်မတန်မှ အားကိုးအားထားပြုသည့် ခရီးသည်ပို့ဆောင်ရေး စနစ်ဖြစ်ပါကြောင်း၊ အိမ်နီးချင်းနိုင်ငံများကို လေ့လာကြည့်မည်ဆိုပါက ဘတ်စ်ကား အသုံးပြုခြင်းထက် အများစုက ရထားပို့ဆောင်ရေးကိုသာ အဓိကအားထားကြသည်ကို တွေ့မြင်ကြရမည် ဖြစ်ပါကြောင်း၊ ရန်ကုန်မြို့ပတ်ရထား ခရီးစဉ်များကို လေ့လာကြည့်သည့်အခါ မြို့ပတ်ဘူတာပေါင်း ၃၈ ဘူတာရှိပြီး ဆင်ခြေဖုံးဘူတာအနေဖြင့် ၁၇ ဘူတာ ရှိသည့်အတွက် မြို့တွင်း/မြို့ပြင် ခရီးသွားလာရေးအတွက် အင်မတန်မှ ထိရောက်သည့် အနေအထားတွင် ရှိနေပါကြောင်း၊ ခရီးစဉ်ကြာချိန်ကလည်း မြို့ပတ်တစ်ပတ်တွင် သုံးနာရီဝန်းကျင် ကြာခြင်းဖြစ်ပြီး တစ်ခါတည်းမြို့လယ်ခေါင်ကို ရောက်ရှိနိုင်သည့်အတွက် ရန်ကုန်၏ လတ်တလော ရင်ဆိုင်နေရသည့် ကားလမ်းပိတ်ဆို့မှုပြဿနာ၊ ကားကြပ်မှုပြဿနာ၊ ညနေမိုးချုပ် Out site ကား ပြဿနာ၊ Taxi စီးသူများ၏ မလုံခြုံသည့် ပြဿနာစသည်များကို ကျော်လွှားနိုင်ရန်အတွက် အဓိကထွက်ပေါက်ဖြစ်သည့် မြို့ပတ်ရထားပို့ဆောင်ရေး စနစ်မဖြစ်မနေ အဆင့်မြှင့်တင် ဖြေရှင်းရေးသာ ဖြစ်သည်မှာ အလွန်ထင်ရှားနေပါကြောင်း၊

ဂျပန်နိုင်ငံ ဖွံ့ဖြိုးရေးအေဂျင်စီ (JICA) အကူအညီဖြင့် ရန်ကုန်မြို့ပတ်ရထား အဆင့်မြှင့်တင်ရေး စီမံကိန်းကို ၂၀၁၃ ခုနှစ်ခန့်က စတင်ဆောင်ရွက်နေသည်ဟု ကြားသိရပါကြောင်း၊ ရန်ကုန်မြို့ပတ် ရထားလမ်း (အနောက်ခြမ်း)၊ (အရှေ့ခြမ်း) အဆင့်မြှင့်တင်ရေးကိုလည်း ပုဂ္ဂလိကကုမ္ပဏီများနှင့် ပူးပေါင်းဆောင်ရွက်နေသည်ဟု သိရှိရပါကြောင်း၊ မိုးပျံရထားလုပ်ရန် မလိုသေးမီ လက်ရှိလမ်း၊ ဘူတာနှင့် ရထားအမြန်နှုန်း စသည်များကို မြှင့်တင်ရန်လည်း ကြားသိနေရပါကြောင်း၊ ယခုကဲ့သို့ လုပ်မည်ဆိုလျှင် သတိပြုသင့်သည်များကိုလည်း Awareness Campaign များ လုပ်နေခြင်းလည်း သတိထားမိသည့်အတွက် ၎င်းလုပ်ငန်းစဉ်များ မည်သည့်အဆင့်ရောက်နေခြင်း၊ မည်ကဲ့သို့ အခြေအနေရှိနေခြင်း၊ ရေရှည်/ရေတို စီမံကိန်းများကို မည်ကဲ့သို့ ချမှတ်ဆောင်ရွက် နေသည်ဆိုသည့် အချက်အလက်များကို မိမိတို့ခရီးသွား ပြည်သူများ ရှင်းရှင်းလင်းလင်း သိလိုပါကြောင်း၊

ထို့ကြောင့် မိမိအနေဖြင့် ရန်ကုန်မြို့နယ် မိဘပြည်သူများ၏ကိုယ်စား ရန်ကုန်ဘူတာကြီးကို အခြေပြုပြေးဆွဲနေသည့် မြို့ပတ်ရထား ပြေးဆွဲမှုနှင့် လမ်းများ၊ ဘူတာရုံများကို မည်သည့်အဖွဲ့အစည်း နှင့် ပေါင်းစပ်၍ မည်သို့အဆင့်မြှင့်တင် နေသည်ဆိုသည်‌့ စီမံကိန်းများကို ပွင့်လင်းမြင်သာအောင် ရှင်းလင်းတင်ပြရန်နှင့် မည်သည့်ခုနှစ်တွင်ပြီးစီးအောင် အကောင်အထည်ဖော် ဆောင်ရွက်မည်ကို သိလိုပါကြောင်း မေးမြန်းပါသည်။