ဆန်စပါးနှင့် ပဲမျိုးစုံအပါအဝင် လယ်ယာထွက်ကုန်သီးနှံများ၏ ထုတ်လုပ်မှုကုန်ကျစရိတ်ကို တောင်သူ များ တွက်ခြေကိုက်သည့် ဈေးကွက်နှင့် ဈေးနှုန်းရရှိအောင် ပြည်ပဈေးကွက်များသို့ ပိုမိုထိုးဖောက် ဝင်ရောက် လာနိုင်စေရေးအတွက် ဆောင်ရွက်ပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

နိုင်ငံလူဦးရေ ရာခိုင်နှုန်း ၇၀ ကျော်သည် လယ်ယာစိုက်ပျိုးရေးကို အဓိက ထားလုပ်ဆောင် နေကြရသော စိုက်ပျိုးရေးနိုင်ငံဖြစ်သော်လည်း ယခုအခြေအနေတွင် စပါးစိုက်ပျိုးရာမှာ ရာသီဥတု ဖောက်ပြန်နေသည့်အတွက် အထွက်နှုန်းများလျော့ကျပြီး ကြမ်းခင်းဈေးများ သတ်မှတ်ထားသော်လည်း  အထွက်နှုန်းလျော့ကျမှုကြောင့် လယ်ယာစိုက်ပျိုးရေး လုပ်ငန်းမှ ထွက်ကုန်တန်ဖိုးသည် အမှန်တကယ်ကုန်ကျသည့် စိုက်ပျိုးစရိတ်ထက် နည်းပါးခြင်းကြောင့် အရှုံးပေါ်မြဲ ဖြစ်နေရပါကြောင်း၊

 တစ်သီးစိုက်ပျိုးလုပ်ကိုင်လျှင် မည်သို့မျှအဆင်ပြေနိုင်ခြင်း မရှိခြင်းကြောင့် နောက်တစ်သီးအဖြစ် ပဲမျိုးစုံကို စိုက်ပျိုးကြရာတွင်လည်း အဓိကဝယ်ယူနေသော အိန္ဒိယနိုင်ငံမှ ပဲဝယ်ယူမှု အကန့်အသတ်ဖြင့် သတ်မှတ်လိုက်ခြင်းကြောင့် ဈေးကွက်ပျက်ကာ ပဲမျိုးစုံဈေးနှုန်းများ ကျဆင်းပြီး တောင်သူများအနေဖြင့် အရှုံးပေါ်နေပြီး နာလန်မထူနိုင်သည့် အခြေအနေဖြစ်ပေါ်နေပါကြောင်း၊  ထို့ကြောင့် တောင်သူများသည် လယ်ယာလုပ်ငန်းများကို စွန့်ခွာပြီး ပြည်ပကိုအလုပ်သွားရောက် လုပ်ကိုင်သူများ  တစ်နေ့တခြားများပြား နေပါကြောင်း၊  ဝယ်ယူတင်သွင်းသည့် နိုင်ငံများအနေဖြင့် ယင်းတို့နိုင်ငံ၏ စီးပွားရေးပေါ်လစီကြောင့် ဝယ်ယူတင်သွင်းမှုကို ကန့်သတ်လိုက်သော်လည်း မိမိတို့နိုင်ငံမှ စိုက်ပျိုးသူတောင်သူများ အထိမနာရေးအတွက် အစီအစဉ်များ လုပ်ပေးသင့်ပါကြောင်း၊

Import ကို ကန့်သတ်ခြင်းမရှိဘဲ Export ကို ကန့်သတ်ခံရခြင်း၏ အကျိုးဆက်ကို တောင်သူများကသာ ခံစားကြရသည့်အတွက် တောင်သူများ၏ အကျိုးစီးပွားကို ကာကွယ်နိုင်ရေးနှင့် မြှင့်တင်ရေးတို့ကို တာဝန်ယူပြီး လက်တွေ့အောင်မြင်စွာ ဆောင်ရွက်ပေးရန် လိုအပ်နေပြီ ဖြစ်ပါကြောင်း၊ ထို့ကြောင့် လယ်ယာထွက်ကုန် သီးနှံများ၏ ထုတ်လုပ်မှုကုန်ကျစရိတ်များကို မြေပြင်ပကတိ အခြေအနေအတိုင်း မှန်ကန်စွာလေ့လာပြီး တောင်သူများ၏ သီးနှံထွက်ကုန်များ ထွက်ရှိလာချိန်တွင် ထွက်ကုန်ဈေးနှုန်းကို အမှန်တကယ်ကုန်ကျသည့် စိုက်ပျိုးစရိတ်ထက် ပိုမိုမြင့်မားသည့် ဈေးနှုန်းမျိုးရရှိအောင် မည်သို့အစီအစဉ်များနှင့် ဆောင်ရွက်မည်ကို သိရှိလိုပါကြောင်း မေးမြန်းပါသည်။