မိမိတို့နိုင်ငံတွင် ၂၀၁၂ ခုနှစ် အရေးကြီးကုန်စည်နှင့် ဝန်ဆောင်မှုဥပဒေတွင် ကျွဲ နွားများကို အရေးကြီး ကုန်စည်အဖြစ်သတ်မှတ်ခဲ့ပြီး ကျွဲ၊ နွားအရှင်များကို ပြည်ပသို့ တရားဝင်တင်ပို့ခွင့်နှင့်စပ်လျဉ်း၍ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနမှ ၉-၁၀-၂၀၁၇ ရက်စွဲပါ အမိန့်ကြော်ငြာစာအမှတ် (၄၉/၂၀၁၇) ဖြင့် ထုတ်ပြန်ခဲ့ပါကြောင်း၊ နိုင်ငံတော်အနေဖြင့် တိုင်းပြည်အခွန် ဘဏ္ဍာပိုမိုရရှိစေရန်၊ မှောင်ခိုဈေးကွက်များ ပပျောက်ရန်၊ ဒေသခံတောင်သူများ ကျွဲ၊ နွားများမွေးမြူသူများ ဈေးကောင်းကောင်း ရရှိရန် ရည်ရွယ်ခဲ့သော်လည်း အောက်ခြေတွင် အခွန်ဘဏ္ဍာကို ထိထိရောက်ရောက် ရရှိအောင် မကောက်နိုင်ခြင်းများသည် မည်သည့်အတွက်ကြောင့် ဖြစ်နေပါသနည်း၊ ဥပဒေ၊ လုပ်ထုံးလုပ်နည်း၊ အမိန့်ညွှန်ကြားချက်များကို မသိခြင်း သို့မဟုတ် မသိချင်ယောင် ဆောင်နေခြင်းလားဆိုသည်မှာ မေးစရာဖြစ်လာပါကြောင်း၊ ထိုသို့ပြောရခြင်းမှာ တိုင်းဒေသကြီး/ပြည်နယ်များရှိ ခိုင်းကျွဲ၊ ခိုင်းနွားများသည် အမြို့မြို့အနယ်နယ်တွင် ဝယ်ယူ မည်ဆိုပါက သက်ဆိုင်ရာ မြို့နယ်အုပ်ချုပ်ရေးမှူးထံ လိပ်မူ၍ သယ်ဆောင်ခွင့်ပြုမိန့်ကို ကြိုတင်ပြီး သယ်ဆောင်မည့်ကျွဲ၊ နွားအကောင်အရေအတွက်၊ ရပ်ကွက်ကျေးရွာအုပ်ချုပ်ရေးမှူး၏ ထောက်ခံချက်၊ မြို့နယ်မွေးမြူရေးနှင့် ကုသရေးဦးစီးဌာန၏ ထောက်ခံချက်ဖြင့် ခရိုင်အတွင်း ဝယ်ယူစုဆောင်း သယ်ဆောင်မည်ဆိုပါက ခရိုင်စီမံခန့်ခွဲမှုကော်မတီခွင့်ပြုချက်ဖြင့် ဆောင်ရွက်ရမည်ဖြစ်သော်လည်း အမှန်တကယ်မြေပြင်တွင် ထင်သလိုသယ်၊ ထင်သလိုသွားနေပါကြောင်း၊ မိမိမဲဆန္ဒနယ်တွင် ၁၃-၄-၂၀၁၈ ရက်နေ့တွင် ငဖဲမြို့နယ်ဘက်မှ ကျွဲ ၁၀ ကောင်ကို မိုးကာအလုံပိတ်ပြီး သယ်ဆောင်လာသည့် ကားတစ်စီးကို တံတားလုံခြုံရေးအဖွဲ့များမှ မသင်္ကာ၍ စိစစ်သည့်အခါ တရားမဝင်သယ်ဆောင် လာသည့် ကျွဲများဖြစ်နေပါကြောင်း၊ ထိုကျွဲများသည် တရားရုံးရောက်နေလား၊ ရဲစခန်းရောက်နေလား ဆိုသည်မှာ ယနေ့အထိ မသိရသေးပါကြောင်း၊ တိုင်းဒေသကြီး/ပြည်နယ်အတွင်း ခရိုင်ကျော်ဝယ်ယူ စုဆောင်းသယ်ယူ မည်ဆိုပါက ခရိုင်အချင်းချင်းချိတ်ဆက်ပြီး ထောက်ခံချက်စာရွက်စာတမ်း အပြည့်အစုံဖြင့် တိုင်းဒေသကြီး/ပြည်နယ် အစိုးရအဖွဲ့ထံ တင်ပြဆောင်ရွက်ပြီးမှ သယ်ဆောင်ခွင့် ခွင့်ပြုခြင်းဖြစ်သော်လည်း တိုင်းဒေသကြီး/ ပြည်နယ်အစိုးရမသိဘဲ တိုင်းဒေသကြီး၊ ပြည်နယ်များအား ကျော်၍သယ်ဆောင်ပြီး နယ်စပ်တွင် ဖမ်းမိခြင်းများ၊ သယ်ဆောင်ခွင့်လက်မှတ်များအား နှစ်ကျော့ပြန် သုံးခြင်းများရှိပါကြောင်း၊ ပြည်ထောင်စုအစိုးရမှ ခွင့်ပြုပေးလိုက်သည့် ကုမ္ပဏီများ စုဆောင်းထားရှိမည့် စုရပ်များကို တိုင်းဒေသကြီး/ပြည်နယ် အစိုးရမှမသိသည်များရှိပါကြောင်း၊ ထိုကိစ္စများသည် ပြည်ထောင်စုအစိုးရနှင့် တိုင်းဒေသကြီး/ပြည်နယ် အစိုးရတို့အချိတ်အဆက် မမိခြင်းဖြစ်ပါကြောင်း၊ သက်ဆိုင်ရာ အုပ်ချုပ်ရေးအဖွဲ့အစည်းများမှလည်း ထိထိရောက်ရောက်ဆောင်ရွက်မှုများ အားနည်း နေပါကြောင်း၊ အမှန်တကယ် နိုင်ငံတော်မှတိုင်းပြည် အခွန်ဘဏ္ဍာတိုးအောင် မွေးမြူရေးသမားများ၊ တောင်သူလယ်သမားများ အကျိုးရှိစေရန် စေတနာထားဆောင်ရွက်သော်လည်း လုပ်ထုံးလုပ်နည်း လွဲမှားခြင်း၊ ကိုယ့်အတွက်အကျိုးမရှိသဖြင့် မသိကျိုးကျွံပြု နေခြင်းများသည် တိုင်းပြည်အတွက်၊ နိုင်ငံအတွက်များစွာနစ်နာပြီး လူတစ်စု၊ အဖွဲ့အစည်းတစ်ခုအတွက် အကျိုးစီးပွားဖြစ်ထွန်းမည် ဖြစ်သည့်အတွက် ပြည်သူလူထုကိုယ်စား သိရှိလို၍ မေးခွန်းမေးမြန်းခဲ့သည်။