မြန်မာနိုင်ငံရှိ လူမှုကူညီရေးအသင်းအဖွဲ့များ အမှန်တကယ်အသုံးပြုနေသည့် မော်တော်ယာဉ်များ တရားဝင်အသုံးပြုခွင့်ရရှိရေးအတွက် ဖြေလျှော့ဆောင်ရွက်ပေးနိုင်မည့် အစီအစဉ်များကို သိလိုခြင်းနှင့် နိဗ္ဗာန်ယာဉ်(HSE)ကဲ့သို့သော လိုင်စင်ခွင့်ပြုပေးနိုင်ရေးအတွက် မည်သည့်ကန့်သတ်ချက်များ သတ်မှတ်ထားသည်ကို သိလိုခြင်းနှင့်စပ်လျဉ်းသည့်မေးခွန်း

ယနေ့ ဒီမိုကရေစီခေတ်နိုင်ငံတော် ထူထောင်ရာတွင် အရပ်ဘက်အဖွဲ့အစည်းများ၏ အခန်းကဏ္ဍသည် များစွာအရေးပါလာသကဲ့သို့ မြို့တိုင်းရွာတိုင်းတွင်လည်း လူမှုကူညီရေးအသင်းအဖွဲ့များ ဖွဲ့စည်းဆောင်ရွက် လာကြသည်ကို တွေ့မြင်နေရပါကြောင်း၊ အသင်းအဖွဲ့များသည် တဖြည်းဖြည်းတိုးတက်များပြား လာသကဲ့သို့ တစ်ဖက်ကလည်း မသုံးမဖြစ်/မရှိမဖြစ် မော်တော်ယာဉ်သုံးစွဲမှု ကိစ္စများ ပါဝင်လာပါကြောင်း၊ သတ်မှတ်ချက် စည်းမျဉ်း/စည်းကမ်းများနှင့်တကွ စနစ်တကျမှတ်ပုံတင်ကြသည့် မော်တော်ယာဉ်များ ရှိသကဲ့သို့ မိမိတို့အသင်းအဖွဲ့ရန်ပုံငွေ အင်အားအခြေအနေအရပ်ရပ်အပေါ် မူတည်၍ ဈေးပေါသက်သာသည့် လိုင်စင်မဲ့ယာဉ်များကိုပါ ဝယ်ယူသုံးစွဲကြရပါကြောင်း၊ ဒေသအသီးသီးတွင် လူမှုကူညီရေး လုပ်ငန်းများအတွက် အမှန်တကယ် အသုံးပြုနေကြသော လိုင်စင်မဲ့ယာဉ်များက ပိုမိုများပြားနေသည်ကို တွေ့မြင်ရမည် ဖြစ်ပါကြောင်း၊ သို့ဖြစ်ပါ၍ တရားဝင်မှတ်ပုံတင်ထားသည့် အသင်းအဖွဲ့များအတွက် အမှန်တကယ်အသုံးပြုမည့် မော်တော်ယာဉ် လိုအပ်ချက်များကို ဖြေလျှော့ဆောင်ရွက် ပေးစေလိုသဖြင့် မြို့တိုင်း၊ နယ်တိုင်းတွင် မရှိမဖြစ်လိုအပ်သည့် နာရေးယာဉ်၊ နိဗ္ဗာန်ယာဉ်များကိုလည်း တရားဝင်ဆောင်ရွက်ခွင့် ရရှိရေးအတွက် မြန်မာနိုင်ငံတစ်ဝန်းလုံးရှိ လူမှုကူညီရေးအသင်းအဖွဲ့များ လက်ရှိအမှန်တကယ် အသုံးပြုနေသော မော်တော်ယာဉ်များ တရားဝင် အသုံးပြုခွင့် ရရှိရေးအတွက် ဖြေလျှော့ဆောင်ရွက် ပေးနိုင်မည့်အစီအစဉ်များနှင့် နိဗ္ဗာန်ယာဉ် (HSE) ကဲ့သို့သော လိုင်စင်ခွင့်ပြုပေးနိုင်ရေးအတွက် မည်သည့်ကန့်သတ်ချက်များ သတ်မှတ်ထားသည်ကို သိရှိလိုပါကြောင်း မေးမြန်းပါသည်။