ရန်ကုန်မြို့တွင် နေ့စဉ်ရင်ဆိုင်နေရသော ပြဿနာတစ်ခုမှာ ယာဉ်ကြောပိတ်ဆို့မှုပြဿနာ ဖြစ်ပါကြောင်း၊ တစ်ရက်ကို မြို့တွင်းခရီးသွား ၂.၇ သန်းလောက်ရှိပြီး လမ်းပေါ်တွင် လူတစ်သိန်းခန့် တစ်နာရီပိတ်မိနေလျှင် ယခု ၂၀၁၈ ခုနှစ် အနိမ့်ဆုံးလုပ်အားခ တစ်နာရီ ၆၀၀ ဖြင့်တွက်လျှင် သိန်းပေါင်း ၆၀၀ ခန့် ဆုံးရှုံးပါကြောင်း၊ ယာဉ်ကြောပိတ်ဆို့မှုကြောင့် လမ်းပေါ်တွင် နိုင်ငံသူနိုင်ငံသားများ၏ အဖိုးတန်အချိန်နှင့် လုပ်အားများ နေ့စဉ် ဘီလီယံနှင့်ချီပြီး ဆုံးရှုံးနေပါကြောင်း၊ ကုန်စည်သယ်ယူ ပို့ဆောင်ဖြန့်ဖြူးရေး စရိတ်မှာလည်း ၁၅ ရာခိုင်နှုန်းမှ ၂၀ ရာခိုင်နှုန်းအထိ ပိုမိုကြီးမြင့်နေရပါကြောင်း၊ ယာဉ်ကြောပိတ်ဆို့မှု အကြောင်းအရင်းများမှာ အများပြည်သူ သယ်ယူပို့ဆောင်ရေးစနစ် အားနည်းခြင်း၊ ယာဉ်စီမံခန့်ခွဲမှုအားနည်းခြင်း၊ ယာဉ်စည်းကမ်း၊ လမ်းစည်းကမ်းလိုက်နာမှုမရှိခြင်း၊ ယာဉ်ရပ်နားမှုဆိုင်ရာမူဝါဒအားနည်းခြင်း၊ လမ်းမြေပေါ်ကျူးကျော်ထားသည့် စီးပွားဖြစ်အမိုးအဖီများကြောင့် လမ်းကျဉ်းနေခြင်း၊ လမ်းဘေးဈေးသည်များကြောင့် လမ်းပိတ်ဆို့နေခြင်း တို့ကြောင့်ဖြစ်ပါကြောင်း၊ ယာဉ်မရပ်ရသည့်နေရာများတွင် ယာဉ်များရပ်တန့်ထားခြင်း၊ ယာဉ်နှစ်ထပ်ရပ်ခြင်း၊ နှစ်လမ်းမောင်းတွင် ကားရပ်ထားခြင်း၊ YBS ယာဉ်များ မှတ်တိုင်မှာမရပ်ဘဲ လမ်းပေါ်မှာစည်းမဲ့ကမ်းမဲ့ အတင်အချပြုလုပ်ခြင်း၊ နောက် ယာဉ်ရပ်နားရာ ကားပါကင်မရှိခြင်း၊ လမ်းများမကောင်းခြင်း စသည့် ပြဿနာများအား ဖြေရှင်းရမှာဖြစ်ပါကြောင်း၊ JICA ၏ လေ့လာမှုအရ ယာဉ်ကြောပိတ်ဆို့ရခြင်း အဓိကပြဿနာမှာ ယာဉ်ရပ်နားရန် နေရာမရှိခြင်း၊  ကားပါကင်မရှိခြင်းတို့ ဖြစ်ပါကြောင်း၊

ကျူးကျော်အမိုးအဖီများကြောင့် ယာဉ်ရပ်နားရန်နေရာ ပျောက်သွားပြီး လမ်းပေါ်တွင် ယာဉ်များရပ်ကြ၍ ယာဉ်ကြောပိတ်ဆို့မှုဖြစ်ရပါကြောင်း၊ လူသွားလမ်း ပလက်ဖောင်းပေါ်တွင် ဈေးရောင်းခြင်းကြောင့်လည်း လမ်းပိတ်ဆို့ခြင်းဖြစ်ပါကြောင်း၊ ကားလမ်းမပေါ်တွင် ဈေးတက်ရောင်းခြင်း၊ ယာဉ်များ စည်းကမ်းမဲ့ရပ်ခြင်း၊ လမ်းမကြီးများ ဆိုးရွားခြင်း စသည့် ပြဿနာများကို ဖြေရှင်းရန် ရန်ကုန်မြို့၏ မြေအောက်မြို့တော်ကြီးများ၊ မိုးပျံ လမ်းမကြီးများကို ခဏထားပြီး လက်ရှိကြုံတွေ့နေရသော ဖြေရှင်းဆောင်ရွက်လို့ရသည့် ယာဉ်ကြောပိတ်ဆို့မှုပြဿနာနှင့် ကားပါကင်အခက်အခဲကို ဖြေရှင်းရန် မည်သို့စီမံထားသည်ကို သိရှိလိုပါကြောင်း မေးမြန်းပါသည်။