မြန်မာနိုင်ငံတွင် မှီတင်းနေထိုင်ကြသည့် လူ ၇၀ ရာခိုင်နှုန်းမှာ တောင်သူလယ်သမားများဖြစ်ပြီး ယနေ့ကြုံတွေ့နေရသည့်အခက်အခဲမှာ လယ်ယာမြေသိမ်းဆည်းခံရမှုနှင့် အငြင်းပွားမှုပြဿနာများပင် ဖြစ်ကြောင်း၊ အကယ်၍ လယ်ယာမြေအငြင်းပွားမှုဖြစ်လျှင် သက်ဆိုင်ရာရပ်ကွက်/ကျေးရွာ လယ်ယာမြေ စီမံခန့်ခွဲရေးအဖွဲ့တွင် မူလလယ်ယာမြေမှုခင်း ဖွင့်လှစ်ရပါကြောင်း၊ ဤအဖွဲ့က မြေပြင်ကို ကွင်းဆင်းပြီး စုံစမ်းစစ်ဆေးခြင်း၊ ကြားနာခြင်း၊ ဆုံးဖြတ်ချက်ချမှတ်ခြင်းတို့ကို ဆောင်ရွက်ရပါကြောင်း၊ မူလရုံး ဆုံးဖြတ်ချက်ကို မကျေနပ်လျှင် မြို့နယ်လယ်ယာမြေ စီမံခန့်ခွဲရေးအဖွဲ့ကို သတ်မှတ်ကာလတွင် အယူခံဝင်နိုင်ကြောင်း၊ မြို့နယ်လယ်ယာမြေ စီမံခန့်ခွဲရေးအဖွဲ့၏ ဆုံးဖြတ်ချက်ကို မကျေနပ်ပါက ခရိုင်လယ်ယာမြေ စီမံခန့်ခွဲရေးအဖွဲ့ကို သတ်မှတ်ကာလတွင် အယူခံဝင်နိုင်ပါကြောင်း၊ ခရိုင်လယ်ယာမြေ စီမံခန့်ခွဲရေးအဖွဲ့၏ ဆုံးဖြတ်ချက်ကို မကျေနပ်လျှင် သတ်မှတ်ကာလအတွင်း ပြည်နယ်နှင့်တိုင်းဒေသကြီး လယ်ယာမြေ စီမံခန့်ခွဲရေးအဖွဲ့ကို နစ်နာသူက အယူခံဝင်နိုင်သည့်အကြောင်း ၂၀၁၂ ခုနှစ်၊ လယ်ယာမြေ ဥပဒေတွင် ပြဋ္ဌာန်းထားသည်ကို တွေ့ရပါကြောင်း၊

ဤအမှုများမှာ အယူခံဝင်လိုသူ နစ်နာသူအနေဖြင့် အမှုတွဲကို ကူးယူနိုင်ပါမှ မိမိအမှု၏ စုံစမ်းစစ်ဆေးခြင်း၊ ကြားနာခြင်း၏ အားသာချက်၊ အားနည်းချက်များကို သိရှိနိုင်မည်ဖြစ်ပြီး မိမိ၏အယူခံ လျှောက်လွှာတွင် ပြည့်ပြည့်စုံစုံ တင်ပြနိုင်မည် ဖြစ်ပါကြောင်း၊ လယ်ယာမြေအငြင်းပွားသည့် မှုခင်းများတွင် စုံစမ်းစစ်ဆေးခြင်း၊ ကြားနာခြင်းတို့ကို ဆောင်ရွက်ရသည့်အတွက် ဤသို့ဆောင်ရွက်ချက်များသည် Co-sign Judicial တရားစီရင်ရေးသဘောဆောင်သည့် ဆောင်ရွက်ချက်များ ဖြစ်ပါကြောင်း၊ လယ်ယာမြေ အငြင်းပွားမှု မှုခင်းများသည် တရားစီရင်ရေးသဘောဆောင်သည့် ဆောင်ရွက်ချက်များ ဖြစ်သည့်အတွက် အမှုစစ်ဆေးကြားနာခြင်းနှင့် ပတ်သက်သည့် စာရွက်စာတမ်းများသည်လည်း သက်သေခံဥပဒေ ပုဒ်မ ၇၄ အရ အများပြည်သူနှင့် သက်ဆိုင်သည့် စာရွက်စာတမ်း အမျိုးအစားတွင် ပါဝင်ကြောင်း၊ ထို့ကြောင့် နစ်နာသူများသည် အမှုတွဲ၏တစ်စိတ်တစ်ဒေသ (သို့မဟုတ်) အမှုတွဲတစ်ခုလုံးကို ကူးယူခွင့် ပေးသင့်ပါကြောင်း၊ ထို့ကြောင့် လယ်ယာမြေစီမံခန့်ခွဲရေး အဆင့်ဆင့်စစ်ဆေးလျက်ရှိသော လယ်ယာမြေ အငြင်းပွားမှု အမှုတွဲများကို သက်ဆိုင်သူများက ကူးယူခွင့်ရှိ/မရှိနှင့် ကူးယူခွင့်မရှိပါက မည်သည့် အတွက်ကြောင့် ကူးယူခွင့်မရှိသည်ကို သိရှိလိုကြောင်း မေးမြန်းပါသည်။